台北如日本,無時無刻都有新景點好東西,一不留神,就會跟車太遠。以下台北人近期最常打卡的 check point,有好多都未去過或聽過。好似玩懷舊的家具店「香色」又或是專賣文具的小店「叁拾選物」及「直物生活文具」又或是人氣日式咖喱飯店「寅樂屋」等等。未去過?唔緊要,而家立刻速速報上,等你可以快人一小步,呃多幾個like。
以滑浪做主題的 SWELL CO. CAFÉ,入店前,必定會被門口的浪花圖案的石屎牆吸引,繼而自拍打個卡,而店舖設計都滿陽光與海灘 style,好似原木大枱、仙人掌盆栽及大大塊的滑浪板作為牆上裝飾。
神農市場好似一個大型的超級市場,所有糧油雜貨一應俱全之餘,更食到台灣懷舊味,好似眷村辣醬及台南皮蛋等等,仲不定時舉行戶外美食展,對出亦有個適合野餐的公園。
小農鍋物可能你未必食過,店內 sell 的是來自台灣各地小農場種植的蔬菜,店內裝潢以農村木材為主,仲有少女們最愛的盆栽形 yogurt,加上門口更有唔少影相位,吸引一眾少女們打卡。
Meat Up 吸睛又夢幻!好似超 heavy 奶昔,外層加配無數 toppings,打卡呃 like 一流,如果覺得卡路里超標,仲有色彩配搭勁繽紛的生果冰。最多人自拍打卡的就是店外的一道畫上紅鶴的牆,不可錯過。
獨立雜誌《小日子》介紹台灣人日常生活的小幸福二三事,早前更開了實體文創店兼 café,除咗有小家品及自家雜誌售賣外,去得的人都會在店門口影相打卡,沾沾文青車邊。
二十輪旅店是歐洲的設計,簡約的外形,加上青碧木框玻璃餐廳設計,連大堂都簡約得像一般住宅,不少人都坐在門口的長椅影相自拍,以假亂真以為去咗歐洲。
陳三鼎黑糖青蛙撞奶賣點是用黑糖煮成珍珠及有古早味配方調校奶茶,台灣人話飲落茶味特別香濃,未飲過,唔敢講,但下次去一定會試。
叁拾選物走日本歐洲 style,走一圈會覺得自己的生活品味突然會 level up,而且門口的磚牆及大玻璃設計,自拍呃 like 一流。
一入去就有一股回到六七十年代台灣的感覺,古老的地板牆身枱面椅子,更閒到淡淡的木香,加上生锈的鐵門框,感覺真係好似拍緊穿越劇,自拍打卡應該是常識吧!
雖然店內只賣兩款咖喱,選擇好似唔係好多,但勝在裝潢走日本古舊居酒屋 style,有種去咗深夜食堂的感覺。店舖細,但每處都是影相打卡位。