鍾意食榴槤嘅你要留意喇!5,6月係榴槤當造嘅月份,所以我同三個朋友率先為咗榴槤而去馬來西亞,出發!
第一日
Lexis Hibiscus Port Dickson
第一日一落機就返酒店,因為我哋book咗2千蚊一晚嘅渡假村,房入面有一個細細地嘅私人泳池同埋桑拿房,當然要好好享受下先。之後就去咗游水,酒店範圍內都收到wifi,打卡超級方便呀!到夜晚,我哋都係喺酒店入面食,地道風味之餘價錢唔貴。其實仲有好多嘢玩架,好似水上活動同埋單車,建議大家留多一兩日,玩埋其他設施。
第二日
榴槤及水果園
行程嘅重點之一就係食榴槤,我哋來到呢度首先參觀咗d榴槤樹嘅生長過程先,地下亦有好多榴槤果實,之後就坐低食咗幾款當造嘅榴槤品種,例如:公主,tiramisu,貓山王等。食完都唔怕熱氣,只要用榴槤殼裝住d鹽水飲就得,至於手呢,用榴槤殼背沖水,就可以洗走手上嘅榴槤味架喇!
馬六甲河
乘船遊覽馬六甲河,兩旁係水中高腳屋,河入面仲有好多大過我屋企果啲好多嘅四腳蛇。
雞場街
來到雞場街當然要食雞啦,呢個雞飯簡直係平靚正,我哋四個人每人都係食咗RM20,即係HKD40都唔洗呀!食飽飽就去咗買手信,即使手信店內價錢都唔貴,抵買!
荷蘭紅屋廣場
呢度主要係風景靚,上來睇睇,打個卡。
第三日
蝴蝶公園
雖然呢度叫蝴蝶公園,但係都有好多其他動物架,適合一家大細嚟參觀,近距離接觸下小動物。好多時都唔係用玻璃將遊客同小動物隔開,咁樣可以真正認識小動物嘅生活環境。
布達拉廣場粉紅清真寺
粉紅色嘅清真寺無論內內外外都係咁靚,入到去影靚相之餘個人都會好平靜。
第四日
印度教聖地
彩色嘅樓梯真係好靚,建議大家行中間果行,漸變效果最好。另外,一定要小心果度嘅馬騮,佢哋唔係幾善良,咁啱比我見到有一隻馬騮兩隻手上都拎住冬甩,係搶返黎嘅戰利品。
黑風洞
行曬條長樓梯之後就係黑風洞喇, 果日太熱, 我地無再繼續行上去, 只係喺洞裏影左幾張相。提提大家, 行上彩色樓梯要著長褲, 如果唔係加RM3 (~HKD6) 租借披肩也可。
第五日
三井 Outlet Park
來到行程嘅尾聲,要盡情shopping。呢個outlet有好多大牌子,當中New Balance平得都幾多,簡單來講係越買得多越平,當場有好多香港人,搵人夾絕對唔難。
發表回應