沖繩好多人都諗起陽光與海灘,但原來冬天既沖繩都好多野玩,天氣又唔太凍好值得去呢。
第一日
香港→沖繩
由香港去沖繩大約2個鍾頭,機程時間比較短,好啱同小朋友去,食下飛機餐睇下電影好快就到。
機場取12景點Enjoy Pass
到機場出左境,就去攞之前一早預訂了的12景點Enjoy Pass,景點Pass可以5日內每景點入場1次,預計都會去到6個或以上收費景點,所以買Pass比較划算。
去到沖繩機場需要由國際線行去國內線換票,需要注意哦!
到OTS取車
出到機場已經見到ots職員,然後再坐OTSshuttle bus取車。
取車時通知由5人車upgrade去8人車。GPS有廣東話導航 (good)~
Lunch:無添くら寿司
取車後到無添くら寿司沖縄豊崎店食lunch,到達後都多人等位,好在一早上網預約左,到預約時間就可以入坐,幸運地入了10隻碟就中了1個扭蛋。
玉泉洞
食飽飽後向玉泉洞出發,繩世界文化王國‧玉泉洞。
(用Enjoy Pass換門票只包玉泉洞+王國村)
裡面結合了王國村、鐘乳石玉泉洞、毒蛇博物館三大區域。
玉泉洞係沖繩有名景點之一,一直都好想去,所以行程都排了去看看那裡超壯觀的鐘乳石洞。玉泉洞內比較熱同濕,小朋友又驚驚地,要我地快快地行完就出來了。
文化王國到有DIY可以自行比錢參加,我地行下睇下。玉泉洞+文化王國行了大約行了1.5小時。
入住Rizzan Sea-Park Resort
時間都唔早了,回恩納Rizzan Sea-Park Resort checkin,今次訂了豪華海景房,入到去間房勁大。(超幸運,原來酒店UPGARDE左我地去轉角房)
經酒店官網訂房還送了一大堆設施券。
Dinner:沖縄ダイニング海の家
放好行李就去海の家食dinner。
食物不過不失,食飽後回酒店終於玩。
酒店內遊戲機中心/兒童樂園/浜之湯泡湯/琉球舞同太鼓表演/放煙花
酒店設施券送了設施券,可以免費享用酒店的指定設施,到海灘放煙花。
例如:遊戲機中心/兒童樂園/室內泳池(可惜無帶泳衣)/浜之湯泡湯
酒店內仲有免費琉球舞同太鼓表演,便利店,紀念品店。超級方便!
性價比高,就算成日留係酒店都唔會悶親,係值得推介的酒店!
第二日
美麗海水族館免費海豚接觸體驗
一早9:30am到達美麗海水族館,參加摸海豚體驗,首先到海洋劇場到報到。報到完10:15am再集合,見仲有時間行埋海牛館和海龜館。
海豚體驗小朋友同大人都同樣開心,今次所有參加者都係外國人,有國語職員做翻譯講解。
限定活動: 星期六/日或公眾假期
需要1個月前到官網預約
費用: 免費
體驗分為:
1) 講座 - 講解海豚分類和身體結構
2)餵養,訓練經驗,觸摸海豚等
體驗完時間剛好,可以睇埋海洋劇場。
海洋博公園玩繩網
小朋友要求先到海洋博公園玩繩網,地方都幾大,仲有分小童和大童區,放電一流。
美麗海水族館
用Enjoy Pass換門票入美麗海水族館
水族館參觀(大約行了2小時)
沖繩美麗海水族館是親子旅遊必去的行程之一,館內有近30000種海洋生物,去到沖繩水族館一定唔可以錯過最有名的「黑潮之海」。
Lunch:燒肉本部牧場
叫了3個和牛燒肉套餐+1個紫菜。(Show網上coupon再有95折)
2位小朋友都話好食,燒完一舊又一舊。
古宇利大橋
食飽出發到去到古宇利大橋見到風景好靚就走落去影相,去到仲可以踏下水玩下。
古宇利海洋塔
去到古宇利海洋塔,用Enjoy Pass換門票去乘坐海洋塔電車同入去古宇利海洋塔。塔入面仲有個貝殼館,行完貝殼館再上塔頂(勁大風),影完相極速落返去。
八重岳櫻花
見仲有時間就出發去八重岳看櫻花,有少量檔口買野食,隔離仲有公園可以比小朋友放電。
Dinner : 冨着58番地
Dinner到酒店附近的冨着58番地,餐廳入面仲有人唱歌添。
第三日
萬座毛
朝早已經落雨,當時仲考慮去唔去萬座毛,反正都順路就去埋啦。
去到見到大風又微雨,老公加仔女都唔落車,為有自己做勇士沖去影返幾張相啦!
Orion啤酒廠
好快就去到Orion啤酒廠,可以免費參加Orion啤酒廠既導賞團。(建議預先到官網登記參加)
一入登記處就見到創業時期的糖化槽。(參觀時間約35分鐘+試飲時間20分鐘)
唔識日文都唔緊要,工作人員會比本中文導賞資料你睇。
有得了解ORION啤酒製造過程,參觀完可以免費試飲新鮮 ORION 啤酒,每人兩杯。駕駛人士或未成年人士(20歲以下)則可選一杯不含酒精飲品(都有5款選擇)。每人仲有1包送酒花生,食完仲可以行去隔離買返少少ORION特產做手信添。
名護動植物公園
參觀啤酒廠後見無雨就即刻去名護動植物公園,到達後用Enjoy Pass換門票。
一入到去d雀係周圍走,可以近距離餵動物,仔女每人買了1包糧餵動物,雀仔見到有野食就跟住黎,阿女又要驚又要餵。園區入面有好多不同的動物,鐘意動物一定唔可以錯過呀!
Lunch: 暖慕拉麵
Lunch去左名護暖慕拉麵,一泊好車已經見不斷有人走入拉麵鋪,好在等了一陣就有位。
老公覺得個湯咸左D,反而仔個款拉麵無咁咸。
菠蘿園
用Enjoy Pass去到菠蘿園換門票,坐完菠蘿車之後就可以係園區到行 ,菠蘿園入面都有個少少既貝殼館同買手信既地方。
水果樂園
菠蘿園隔離就係水果樂園,用Enjoy Pass去到水果樂園換門票。
去到水果樂園要做任務,解開機關同有解謎遊戲,救出水果國王,收集蓋印,2個小朋友玩得好開心。除左有水果仲有動物睇,可惜我地去時都有雨所以只在園內玩,無行到室外地方呢!
Dinner : ゆきの食堂(Yukino)
晚餐Book了名護ゆきの食堂(Yukino),我地18:00到達,門口已經泊滿車,入到店內都坐了好多人,食物唔錯而且幾抵食。
第四日
黑糖工廠
落宜野灣順路去埋黑糖工廠,去到門口有製黑糖過程參觀,入去就係買黑糖,行完好快就走了。
宜野灣Round 1
其實去埋南國製菓會順路d,但11點前到round 1玩3個鍾有優惠,玩完之後剛好食lunch,所以去Round 1到玩左先。
入左場後每人有條手帶,如果無特別消費都唔需要再加錢,大人小朋友都啱玩,一D都唔會悶,而且地方室內為主,落雨去就啱晒,真係可以玩足一日。
我地玩到13:20倒走人,點知...職員又送左4張夾公仔卷+4張(每張換10個代幣卷)+1個影貼紙相卷代幣,最後玩埋要14:10先走人。
Lunch : 鮮魚と魚の唐揚げ 琉球
看圖點餐,刺身飯好抵食¥1400多到爆晒碗~
南国製菓
食完又上返嘉手納個邊既南国製菓
個邊既金楚糕好平¥15/包,每包有2塊,做手信返公司派一流。買完仲送左袋試食比我地添~
(不過我自己覺得味道偏甜)
那霸自由花園酒店checkin
酒店較細,不過只住一晚無所謂啦,入住時仲送左塊面膜,小朋友12歲以下可免費入住(無得加床)。酒店對面有藥房可以買藥品。
酒店亦好近DFS還車方便還車,第2日坐單軌去機場都好方便。
Dinner : 目利きの銀次 新都心本舗
係酒店hea左一陣就出發食晚餐 (已BOOK 18:30)
但由於LUNCH好遲食所以唔太肚餓
間餐廳真係好受歡迎,可能大家都推介,但我覺得無想像中好食。
入坐後職員給小朋友每人一杯橙汁。
(其實呢幾晚都食居酒屋小朋友開始食到悶悶地
第五日
Maxvalue
小朋友還未起床,自己到maxvalue行超市(路程約6分鍾)
沖繩回香港
由於11:25機,8:30 am就由酒店行去單軌站,坐單軌到機場。
在機場食早餐及行下店鋪就回程了。
去到機場好多人排隊等checkin,之後去國內線食飯糰就回程了。
發表回應