大阪と京都の旅

落機到達關西空港後,就搭南海電鐵去難波,再轉御堂筋線3個站到淀屋橋站去酒店check in

呢間酒店我比好評,好推廌!
位置於淀屋橋站付近,距離心齋橋2個站,由淀屋橋站12號出口行去酒店,只需要8-10分鐘,沿途平直路
價錢唔錯(睇你book咩日子)
我地book左兩間房,一間雙人床,一間兩張單人床雙人房.
兩張單人床雙人房呢間係有兩個浴室!!兩個浴室!!(浴缸+洗手盤+廁所)非常方便!

而check out亦只需將房卡放於指定箱內就可以,好方便的.

另外酒店嘅正樓下就已經有7仔,酒店行返出大街即係車站出口,亦都有間幾大嘅超市.
最好嘅係,係超市買完野食,超市裹面有個位置間左出黎,係可以係埋裹面食野!而且每當夜晚就關舖時間會有好多野食半價,啱晒晚夜行完街買宵夜食!不過要留意佢每日關舖時間都唔一樣,個門口會有個牌睇到,我去個陣一日關20點,一日關22點.
每日朝早都去個度買早餐,係個度食埋就出發.

去完酒店check in後,搭2個站就黎到大阪必去地標心齋橋行街食晚飯.
第一晚去左道頓堀食燒肉.
食完行左一段心齋橋,去到10點好多店都開始閉門,就返酒店.
剩如未行個D就安排左係第2日行程.

每日係酒店付近超市食完早餐後出發.
第兩日先去左位於日本橋站付近嘅黑門市場.
就算唔買唔食,睇下都好熱鬧嫁~

去完黑門市場,再行返去第一日未行完嘅心齋橋(心齋橋真係好長>_

行完心齋橋,再去埋難波行千日前通.
千日前通其實都係同心齋橋個D商店街差唔多.
行完呢度時間大約5點幾,搭車去下個景點.

第2日最尾一站.好值得去嘅地方!我地坐左日本最高摩天輪!
搭去千里中央站轉一架單軌車!!萬博記念公園站一出就見到!
LaLaport EXPOCITY係位於萬博記念公園站,地方會比較遠小小,但好值得去!由難波去呢度,大約45分鐘,轉一程車,如果覺得搭45分鐘都唔算遠的話,真係要黎一黎啊!
EXPOCITY係日本最大購物中心,鐘意shopping就一定要黎囉,加上2016年7月1日啱啱開左呢個全日本最高+世界第五高「REDHORSE OSAKA WHEEL」摩天輪!!
摩天輪高度為123m,地板全為透明玻璃嘅「穿透式」構造.
價錢方面1位當日票1,000日圓(含稅)
詳細可以參閱:http://www.expocity-mf.com/tw/osaka-wheel/

*我坐個日個摩天輪先啱啱開左11日,係星期一,完全唔洗排隊!!(笑)

呢度絕對可以花一日時間黎!!
有大商場,又有餐廳,仲有摩天輪.以下地方我無行到去,其實呢度有埋水族館,仲有類似兒童天地,而睇圖都見到有個比卡超專門店.另外,離開商場,就係付近有個萬博記念公園,睇圖都可以見到有個叫太陽之塔係個度,如果櫻花,紅葉時節去呢個公園應該會仲正!
行完商場,坐完摩天輪,食埋晚餐,就返酒店,完結第2日行程~

第3日會由大阪去京都.
check out後,早餐後,會先去新大阪站.
由新大阪站轉乘JR京都線新快速(另有分普通車,快速車,而新快速是最快,價錢是一樣的),就直達京都站.

順帶一提,新大阪站內有買手信嘅店,書店等等,未夠鐘上車都可以買下野,周圍睇睇.

坐到去京都站後,轉JR嵯峨野線(山陰線)去二條站,即我今次京都住嘅酒店.

京都二條城高級城市酒店,呢間我都好like,都會推薦!!
呢間酒店位置於二條站付近,距離京都大站2個站,去嵯峨嵐山4個站,都好方便!
由二條站東出口行去酒店,只需要10分鐘左右,沿途平直路
價錢唔錯(睇你book咩日子)
呢間酒店係2015年9月新開,去google map睇,仲係一個地盤黎.由於新開,所以酒店都好乾淨,裝修都好靚.
呢間酒店我係book左兩間都係雙人床嘅房.
房間方面,我個人覺得比起一般日本嘅酒店已經算大,入門口走廊位一D都唔窄,可以放到兩個大行理.
房間洗手間方面,無浴江的,係企江,


而二條站西出口有個商場,有日晚餐都去左個度食燒肉.

由京都站對出嘅巴士站就有巴士去到清水寺.清水道落車後沿住水牌行,沿路都會有商店街,就會到清水寺.

去完清水寺,搭返巴士返京都站,京都站附近都有好多野行,我地就行左Yodobashi,家品電器賣衫嘅都有,幾好行嫁,大部分舖頭都有免稅.
係京都站仲可以睇到夜晚嘅京都塔.
之後我地就返返酒店附近食晚餐,就結束呢日行程.

第4日食完早餐,就出發到第一站,嵐山.
搭JR嵯峨野線到嵯峨嵐山站.
無記錯的話,JR站格離就係嵐山小火車站,大部分人去嵐山都會坐埋小火車,但我去個日係星期三,正正就係小火車休息日,所以如果打算坐埋個小火車的話就記得唔好星期三去啦.
由嵯峨嵐山行去渡月河,竹林有一段距離,跟住人,指示牌行就會到.
除左嵐山竹林,渡月橋呢啲影相位,沿途都有手信店,地道特式小店,小食店.

去完嵐山, 下一站係伏見稻荷大社.
係京都站轉車搭JR奈良線,稻荷站一出站就見到大鳥居入口.

伏見稻荷大社係最受外國人歡迎的日本旅遊景點嘅第一位,黎京都一定要黎呢度啦!

千本鳥居係呢度嘅賣點,有歷史又有文化.沿途都一樣有信商店等.點都要黎觀摩下呢!

下一站來到河原町.
由京阪本線嘅伏見稻荷站唔洗轉車幾個站到祇園四条落車.

河原町係京都最熱鬧嘅市中心,有大型購物商場,又有商店街,係京都嘅購物景點.

呢度交通好方便,除左地下鐵,大街兩旁都有巴士站,好多巴士亦會經過呢一區.所以我地行到黃昏又攰就直接坐巴士直達酒店附近食晚餐.
(由於個度巴士路線都幾多,如果有打算搭巴士去呢度或由呢度搭巴士去其他地方,可以事先check定搭幾號,或到時再用google map 搜尋都得)

到最後一日啦
由於晚上8點左右先飛,朝日早餐後,再次搭巴士到上一日未行晒嘅河原町,因為由我地酒店來回河原町搭巴士真係好方便,所以再搭去都唔會好晒時間.

呢日去左河原町嘅錦市場.
錦市場被稱為「京都的廚房」,各式各樣嘅美食都應有盡有,呢度大部分嘅店營業時間為中午12到下午5點陸續收攤.

而京都河原町一帶每年7月中至尾都會舉辦祇園祭,祇園祭係日本京都每年一度舉行嘅節慶.如果係個段時間去會睇到大型巡遊.
而我地去嘅時候係前夕,雖然睇唔到巡遊,但周圍已經有啲裝飾華麗嘅花轎擺放住可以影相,同埋掛住啲燈籠,已經好有氣氛.
同埋周邊有啲特式小商店為慶祝呢個節日,會係呢段時間有減價.

行完河原町一帶,搭左巴士返酒店拎行李,同埋係酒店附近間大型超市LIFE,食埋午餐買埋上機嘅野食,就去京都站.

去到京都站我地先買左去機場所用嘅車票先.買好左可以睇定你會坐邊一班車,預返時間上車.我地就特登早啲黎到,仲有時間可以行下京都站.

京都站內都有百貨商場,地下商店街,各種各樣的餐廳,手信店.
而京都上有一條免費嘅空中走廊,京都市內嘅景色都可以睇到,對面就係京都塔,想睇夜景的話,可以找日夜晚上黎,就唔洗晒錢上去京都塔瞭望台啦.
行完,差唔多時間要搭車去機場啦.

由京都直達到機場就搭一架叫HARUKA（はるか）嘅列車,
我地由京都搭呢架返機場,係買一張叫JR West One Day Pass,而唔係買HARUKA嘅車票,價錢係2300日圓,用呢個Pass可以坐到HARUKA嘅自由席(不能坐指定席)買呢個會平過單買HARUKA指定席嘅價錢.
而因為呢張係Pass,你唔一定去到京都站先買呢張(我都蠢左),
可以由你住的站(一定要係關西JR線)任何一站搭用呢張Pass到京都站,再用返呢張Pass坐HARUKA自由席就慳返啲啦!
當然如果你想坐指定席嘅話,可以單買返HARUKA指定席車票啊.
或用ICOCA&Haruka套票都可以,就睇返每人不用行程,程況而買適合自己嘅套票啊.

咁就結束左呢次行程~
其實大阪關西絕對可以去兩次,我呢次行程都無去到大阪其他景點,例如:USJ,天王寺,梅田等
所以下次會買周遊卡,去埋大阪其實景點~