-
目的地新加坡
-
行程日數3日
想同男朋友一齊去聖陶沙、 Gardens by the bay朝聖,再去牛車水、小印度感受一下唔同種族小社區嘅生活啦!
最緊要係一齊去環球影城玩返日,一齊實現我地每次去旅行都要去主題公園玩返轉嘅小願望
第一日 新加坡
新加坡龍都大酒店
景點資料
一落機當然要去新加坡龍都大酒店放低行李,順便抖下、參觀下先啦!仲可以襯住休息嘅時間,喺酒店嘅海峽咖啡室飲杯野、提提神,享受一下先再開始行程!
由機場去酒店好方便架咋,可以搭MRT喺多美歌站落車,又或者搭36號公交車(即係巴士)都去到嘅!以上兩個方法係平價、方便之選,搭機場巴士都可到達酒店嘅。
聽講酒店喺2003年開始翻新工程嗰陣時,用左好多唔同風格嘅藝術作品去佈置酒店,仲有男朋友最鍾意嘅峇里島風格泳池,睇黎呢個大細路一定喺酒店玩到唔願走啫!
酒店鄰近新加坡藝術大學、新加坡美術館、同埋國家博物館,四周圍嘅環境都非常有藝術氣息,好relax啊!
想shopping? 可以去酒店附近嘅烏節路購物區! 想觀光? 去牛車水,同埋去睇魚尾獅像都好近咋!
第一站我地就出發去牛車水啦~
牛車水
景點資料牛車水即係唐人街,感覺係類似香港嘅女人街、花園街咁,各式各樣想買嘅手信、紀念品,甚至食嘅野、古玩都可以搵到。加上牛車水美食街係有好多小食店嘅,名符其實可以邊睇邊買邊掃街啊 ! 如果未食飽,仲可以去埋牛車水附近嘅麥士威熟食中心食天天海南雞飯tim :) (好想食海南雞飯&飲肉骨茶啊!!)
濱海灣花園
景點資料
食飽飽之後都應該下晝喇,可以預留大半日嘅時間去遊覽Gardens by the bay!
園內有200幾種唔同品種嘅巨樹,聽講超過25-50米架,一定好壯觀!園內除左有好多特別嘅花草樹木可以欣賞&瘋狂影相之外,夜晚嘅擎天樹仲會閃閃發光,配合每晚都有嘅Garden Rhapsody燈光表演,一定好精彩喇~~
欣賞完燈光show之後,都係時候返酒店附近嘅商場食少少野,就要返去抖喇,因為第二日打算去環球影城啊 :)
第二日 新加坡
新加坡環球影城
景點資料
每次去旅行,都一定要去嗰個國家嘅主題公園玩! 呢個係我同男朋友嘅小約定,希望有一日可以喺世界各地嘅主題公園留下我地嘅腳印! 當然啦,目前為止,我地嘅腳印只係留左喺東南亞地區!
而新加坡,我地係無黎過架,所以好期待可以去環球影城玩餐飽啊,喺酒店食完豐富嘅早餐,就出發喇!yeah :)
新加坡環球影城有七大主題,包括好萊塢星光大道、紐約大道、古埃及、失落的世界、馬達加斯加、科幻城市、同埋遙遠王國!
對於鍾意玩又鍾意周圍影相嘅我,要玩哂成個影城都應該有難度啊! 睇黎都係要同男朋友傾下有邊d遊戲係必玩嘅先,到時要取捨下:)
濱海灣區魚尾獅
景點資料
去完環球影城,夜晚可以去埋魚尾獅公園睇夜景&燈光show,平日最夜嗰場喺9:30pm開始,但星期五&六會喺11pm加開一場架!(一早就入環球影城玩,玩到7點幾8點都差唔多係時候出發去魚尾獅像朝聖,一定要影返張到此一遊嘅飲水相啦!)
睇完燈光show, 仲可以順便去老巴剎美食廣場食出名嘅好味串燒tim! 食飽飽就返酒店休息喇!
第三日 新加坡
小印度
景點資料
最後一日喇,食完個豐富早餐之後,當然要喺酒店充滿峇里島風格嘅泳池游下水,relax下先啦:)
之後就可以hea遊小印度,品嚐下印度美食,畫下彩繪,輕輕鬆鬆咁行下街啦:)
聽講小印度好多又特別又靚嘅小飾物買架,可以慢慢尋寶~不過都有人話小印度區環境都幾複雜,唔知係咪真嘅呢?如果係就最好一大班人/有男仔陪同先去啦~
發表回應