-
目的地大阪 | 京都 | 奈良
-
行程日數5日
同朋友兩個人遊關西,雖然名義上有6日,但係下午機去早機返,實際上得4.5日玩,為左玩到盡,我地日日朝早7,8點起身,夜晚12點幾先返到酒店lol不過貪玩又咩都想做咩都想食唯有係咁,只可以話今次旅程非常充實又滿足:)
第一日 大阪,京都,奈良
關西機場
到達關西機場已經係當地時間下午4點,拎完行李我地就去關西觀光資訊服務中心買交通pass~
關西嘅交通pass都有幾多種,所以出發前最好check清楚邊種最適合自己嘅行程,我地就買左大阪周遊卡1日卷同kansai thru pass2日卷~
排隊買pass嘅時候側邊做緊壽司推廣,食左一件免費嘅吞拿魚(?!)壽司~
Hotel the G
買好之後要用嘅交通pass,我地就搭南海電鐵再轉地鐵出酒店check in,今次住嘅Hotel the G係谷町九丁目站,由地鐵站行過去只需約5分鐘,而且距離難波只係兩個站,位置非常唔錯~
最驚喜嘅係我地間雙人房非常寬敞,去過日本嘅朋友都知日本酒店房出名細,誇張到行李都未必有位開~但係我地間房開到兩件行李之餘,仲有梳化,茶几同大雪櫃,好滿意^^雖然廁所都係細,不過都係沖涼刷牙,乾淨整齊就OK啦~
Don Don Down on Wednesday
景點資料由於我地到達個日係星期三,我地就趕去依間每個星期三都會特別平嘅古著店,去到距離人地關門得返1個鐘,但係間舖鬼死咁大,我地就用最快速度睇同拎,然後一次過試,好多狀態好好嘅衫褲都好平,見到有牛仔工人褲港幣20就有交易!!如果唔係我已經有類似嘅褲一定已經買左:P間舖真係比想像中大,我地又無時間慢慢尋寶,所以最後都唔算大豐收lol
Lawson
掛住買衫嘢都未食,我地最後係返酒店途中入便利店買左冷麵,炒麵熱狗同雪條做晚餐~個牛奶雪條奶味超濃好好食:)
我地仲買埋乳酪做第2朝早餐,因為第2日一早就要去環球影城~個乳酪入面有好多果肉,之後幾日差唔多每日都食一盒:)
第二日 大阪,京都,奈良
日本環球影城
景點資料
今次安排左一日全日係環球影城玩,我地無買express pass,所以一早就出發去影城(當日開園時間係9am,我地8:30am左右到達,因為通常都會提早開園),去到已經人山人海~
一入到去就即刻去拎哈利波特嘅入園整理卷,因為無express pass就一定要有入園整理卷先確保有得入哈利波特園區,而且入園整理卷係限量,派完就無,所以第一時間拎左先係最安全~
入園整理卷上面有入園時間,係指定時間入園,玩幾耐無限時,但係一離開園區就唔可以再入去,所以記得玩盡影夠相先好出黎~
雖然當日我地無買express pass,不過最耐一個ride都係排左1.5hr左右,其他大部分都唔洗1hr就有得玩,好好彩,又省左express pass嘅錢^^
一蘭拉麵
景點資料
係香港仲未食過一蘭拉麵,不過聽人講係日本食平好多又好食好多,所以就mark左要黎朝聖啦~
湯底好濃郁好好味,d肉入口即溶,好食到連湯都飲哂~一蘭係可以自己揀湯嘅濃度,麵嘅硬度等等,完全唔怕唔啱口味~
激安殿堂 道頓堀店
依間激安殿堂有成5,6層高,除左藥妝同零食,仲有時裝,香水,名牌,雜貨等等買,而且係24小時營業,可以即場退稅,可謂我地要趕尾班地鐵行唔到好夜,不過我地之後出親道頓堀食飯都會黎行~
第三日 大阪,京都,奈良
黑門三平
景點資料
一早就去黑門市場食早餐,黑門三平係少數可以坐低食嘅舖頭,我地見到d新鮮刺身對眼已經發哂光,兩個人食左一盒拖羅壽司,一板海膽刺身,甜蝦刺身,魷魚刺身同大大粒帶子刺身~全部都好好食,連唔係好鐘意食拖羅同海膽嘅我都覺得真係好好味,諗起又想食~
黑門市場藥妝店
依間藥妝係正三平對面,雖然規模比較細,不過D嘢平過激安一截,所以如果依到有就係依到買啦~
大阪文化館: 火影忍者紀念展覽
依個行程係前一日搭地鐵見到poster先知,身為火影迷就二話不說決定要去啦~雖然大阪文化館係港區,行程上其實唔順路,不過依一日我地用大阪周遊卡,全日任搭大阪市內地鐵,所以去遠少少都無咩所謂~
依個紀念展覽係期間限定,入面展出左好多漫畫手稿,精華片段,等身人型公仔,甚至再現左一d漫畫中嘅場景,成個展覽路線跟漫畫嘅故事發展去安排,行完就好似快速再重溫一次整個故事咁,係我此行嘅意外收穫~
千房大阪燒
大阪名物之一就係大阪燒~好味~
大阪城天守閣
景點資料
大阪城天守閣都算係第一次去大阪嘅必到地標之一,而且用大阪周遊卡都係免費入場嘅,所以就去左啦~
其實之前睇相見到已經覺得依座白綠色嘅古城好靚,加上入面展出左d古物,有興趣嘅參觀下都唔錯,上到最頂仲可以望返大阪市嘅景色,唔錯~
梅田空中庭園展望台
到天黑我地就上左梅田空中庭園展望台睇夜景,雖然個展望台唔係好高,不過望落個景都幾靚:)但係從地鐵行過去都幾遠,值唔值得就睇人啦~
昭和大眾燒肉 道頓堀店
景點資料夜晚就返左道頓堀食燒肉,昭和大眾燒肉係用炭火燒架,燒出黎真係特別香好好食,我地食燒肉放題,店員推薦我地食牛大動脈,本身我唔食內臟,但係佢講到真係好好食咁就試左,食落個口感好爽脆,都幾得意,值得一試:)
第四日 大阪,京都,奈良
岡本織物
景點資料
*全日用Kansai Thur Pass(JR以外任搭)
去京都必做之一就係著浴衣係條街行黎行去啦,所以我地出發前一早就上網預約左岡本織物租浴衣,為左用盡時間同揀靚浴衣我地就約左最早嘅時間去,做左當日第一對客人~
岡本織物嘅套餐包浴衣,腰帶,小袋子同木屐,揀好之後店員姐姐會幫客人著好哂套浴衣,如果想set埋頭只係加大概hk$30,店員姐姐專業快手又親切,準備好哂就可以出發啦~
清水寺
景點資料
清水寺一早已經好多人,著住浴衣成個人行路都變到細細步好似好斯文咁lol本身就好鐘意d古色古香嘅建築,所以睇清水寺令我好滿足~中途都上左地主神社祈左個福~
由清水寺行落地鐵站兩邊有好多店舖,有好多抹茶雪糕,黎到京都我地當然都即刻一人食返杯啦~
嵐山小火車
雖然唔係櫻花季又唔係紅葉季,不過我地都想去下郊外,坐小火車聽落都幾好玩,加上我地想去竹林之道,於是就著住套浴衣出走到嵐山啦~
我地去嘅時候唔係旺季,所以去到都仲買到開放車卡嘅位,沿途青山綠水好清幽,如果係櫻花季或者紅葉季一定仲靚:)
因為我地想去竹林之道,所以無搭到尾,而係嵐山站落左車,散步行過去~
嵯峨豆腐 三忠
豆腐係嵐山名物之一,沿竹林之道行返出大街,有間豆腐店,我地買左一舊黎試,佢個質感同我地食開嘅豆腐好唔同好得意,佢係有d似湯圓嘅口感,加上d麻醬食落都幾特別~
中村藤吉 JR京都店
食完晚餐就去食甜品啦,就係係香港排隊排到傻嘅中村藤吉,估唔到黎到日本都係要排lol
排左大概半個鐘左右都唔算好耐,我地叫左個抹茶芭菲,一個抹茶啫喱,同一個抹茶紅豆白玉嘅物體,可能期望太高,我地覺得有d失望,唔會吸引到我為佢返香港再排隊~
3樣當中個抹茶芭菲比較出色,食落口感好多層次,其餘兩樣就真係一般,抹茶味唔夠濃~
第五日 大阪,京都,奈良
貴船ひろ文
景點資料
*全日用Kansai Thur Pass(JR以外任搭)
一早出貴船食流水麵,由於係夏季限定所以就去體驗下~成個體驗唔長但係比想像中飽,食食下都食左成8,9團麵,而且雖然用料普通,但係食落好清涼好好食:)而且坐係川床都真係好涼,涼到有少少凍lol
貴船神社
食完流水麵就行返出去,沿路經過貴船神社都有行左個圈,神社唔大好快就行完~
上.茶林
聽講依個抹茶甜品好食過中村藤吉,所以專登為左佢而去宇治,真係好好味,抹茶味濃唔會太甜,不枉此行~
不過附近有另一間個名好似嘅店舖,個間係無甜品架得茶飲,記住唔好去錯~
京都六條庵
特濃抹茶雪糕~大力推介!
東大寺
東大寺係世界文化遺產,係最大嘅全木建築,其實真係幾壯觀~
發表回應