-
目的地台北 | 台中 | 墾丁
-
行程日期1月 頭日 - 1月 中日
-
行程日數7日
今次台灣之旅一行13人，由高雄機場入，玩墾丁、台中、清境，再上台北食食食，然後就返香港。13個人4個家庭一大班人包左2架9人車，司機大哥好好幫我地規劃路線，又會主動俾建議，包2架車5日加最後由酒店去台北機場都係NT66,000，都幾抵。雖然今次去嘅地方都係比較大路而且已經去過嘅景點，不過咁多人一齊玩都好開心。
第一日 台北,台中,墾丁
高雄機場
大約下午1點到達高雄機場，等司機大哥期間，先去兌台幣同買電話卡，電話卡有分不同日數嘅plan，我地買嘅係7日個種，大約hk$150一張，主要用作聯絡司機大哥，包無限上網同NT150嘅通話費，網速非常滿意，就算之後去到清境、合歡山咁高都無大問題
白沙海灘
順路停低望一望，其實都係沙灘一個無咩好睇，不過係到食左雪糕同台式烤腸，幾好味，可惜唔夠時間食埋個巨型芒果冰
優聖美地渡假村
係墾丁住嘅民宿，會住兩晚，本身透過旅行社訂左兩間六人villa，點知check in嘅時候老闆娘話旅行社幫我地訂左6人房，不過房都好大好整潔，之後老闆娘好好咁俾我地去參觀villa，雖然好好，但係入面無房，三張大床好open，所以我覺得6人房好d,入面有一間二人房同一間四人房，民宿包早餐同晚餐，早餐比較簡單有粥、多士、炒蛋、煙肉火腿，晚餐就好似住家飯咁，有湯有餸有水果，幾好味，整體都幾滿意
第二日 台北,台中,墾丁
船帆石
景點資料黎到墾丁緊係要玩水上活動啦！上次去左南灣多人到怕怕，今次司機大哥介紹我地去船帆石沙灘玩，人唔多水又清，好過南灣多多聲:)我地選擇左3小時無限次任玩水上活動，每位原價NT1500，最後小講價就每人NT1400，玩左三樣我已經想投降，真係好累，但係我已經係個個星期都做開運動嘅人，不過為左唔好蝕，就繼續玩，休息下玩下，最後玩左十次左右，仲累過平時練波哈哈，不過係好玩嘅
貝殼沙岸
依個沙岸都係順路影張相望一望，D沙其實唔係沙，係好細嘅貝殼，但係基於保育唔落得去
龍磐公園
景點資料依到有檔賣即開椰子水，有興趣可以飲下，黎依個地方好似話係睇海平線，睇完影張相又走得，之後團友之中有人話唔想行鵝鑾鼻同最南點，所以就返民宿等食飯，其實上次都有去鵝鑾鼻同最南點，白色燈塔係幾靚，如果鐘意影相都可以去，但係真係得個燈塔，而且車入唔到要行路
墾丁大街
景點資料
食完飯又出墾丁大街，今次主要係買牛軋糖，有間好好味，其實成條墾丁大街好似得一間牛軋糖專賣店，然後就抬左十幾廿包返香港:p
仲有墾丁大街好多人體彩繪，我地都有玩，之前聽過阿飛係最好所以就去左搵佢畫，佢真係又快手又畫得靚，價錢同其他檔差唔多，但係其他好多都係用紙模加噴槍，佢就真係一筆一筆畫，而且真係keep到7日，手因為成日洗所以7日就甩，但係肩個個過左7日都未甩:)
第三日 台北,台中,墾丁
萬巒豬腳大王海鴻飯店
地址：屏東縣萬巒鄉民和路36-2號
午餐係出名嘅豬手，好好食，連本身唔食豬手嘅我試完一舊都忍唔住食多幾舊，而且價錢唔貴，食得過
龍貓彩繪村
台灣好多壁畫村，依條幾乎無人住嘅村經畫家裝飾後，變成一個景點，鐘意睇畫可以一去，有好多靚畫
妖怪村
以妖怪為題，帶點日本風，入面都幾商業化，都係買下野食下野咁，影下D日式建築同妖怪，一至兩個鐘夠哂，入面有間賣竹炭加哈蜜瓜雪糕，竹炭味食唔出但係哈蜜瓜味好香幾好味
台中寶島53行館
係台中住一晚，依間行館係正宮原眼科對面，夠哂方便，而且房間整潔又包早餐，對我黎講已足夠
晚餐
本身想去附近嘅一中夜市，結果係酒店附近經過間牛肉麵檔就坐低左，係一對老夫妻開嘅，好好食，而且大碗NT120細碗NT90，但係細碗已經好大碗！唔記得影個店名真係失策
最後婆婆仲好好咁祝我地係台灣玩得開心玩得平安，真係好溫暖，我覺得依樣係台灣最大嘅魅力
宮原眼科
景點資料黎宮原眼科食雪糕，飲珍珠奶茶，買鳳梨酥同太陽餅，雪糕超多口味好多都想試，最後食左烏龍茶味好好食，金桔檸檬都好好味，珍珠奶茶無咩特別，鳳梨酥就買左土鳳梨酥因為鐘意食酸，好好食唔會好甜微酸我鐘意:)
第四日 台北,台中,墾丁
春水堂
景點資料春水堂係全世界第一杯珍珠奶茶嘅產地，今次黎係玩DIY珍珠奶茶製作體驗，無記錯好似NT380/人，每人整一杯泡沫紅茶加一杯珍珠奶茶，全程會有人一邊教一邊講解下歷史同食材嘅選用，春水堂嘅茶，奶，珍珠採用左邊Ｄ都會介紹，聽完之後飲得更放心，因為佢嘅珍珠無加防腐劑，食用期限得３日，煮好嘅珍珠更加只可放３小時，保證新鮮:)如果有興趣記得預約啦
九族文化村
依個文化村好似主題樂園咁有好多機動遊戲，入去記得係客服中心拎防蚊液揸，因為入面好多小黑蚊，唔揸就慘啦~入到去無耐就傾盆大雨，唯有係有蓋嘅機動遊戲區玩，個度有機打，有室內過山車，飛天鞦韆，海盜船等等，勝在唔洗淋雨同少人
日月潭
之後又落大雨，只好取消係日月潭踩單車嘅計劃，只係睇一睇個潭影張相就走，風景其實唔錯，如果天氣好可以坐纜車由九族文化村過日月潭
18度C巧克力工房
司機大哥帶左我地黎飲免費咖啡同茶，都強調左好多次唔洗買野，應該係怕我地誤會佢帶我地黎消費哈哈，不過我地試食完之後都有買佢Ｄ朱古力因為真係好滑好好食，又唔算非常貴，大概NT300幾一盒，入面已經切好哂細細粒，我地買左抹茶朱古力，黑朱古力，同埋野莓朱古力，全部都好好食，可惜怕溶帶唔到返香港:(同埋佢有雪糕賣，D味都幾特別，膽粗粗試左海鹽加黑胡椒，只可以話真係好特別哈哈，一試無妨
清境觀星園觀景山莊
夜晚到清境嘅民宿，會係到住兩晚，由於上到二千幾米又係夜晚天氣非常凍大概得十五至十八度，所以上清境嘅朋友記得帶件風褸，擋風加保暖！依間民宿位置好高，差唔多係清境最高嘅民宿，所以係觀景台係到好多星星，第二朝又睇到日出同雲海仲有彩虹，真係好好彩
第五日 台北,台中,墾丁
合歡山
上合歡山太魯閣睇風景，因為成三千米高Ｄ都見到雲海，不過有同行團友有少少高山反應，有輕微頭痛同作嘔，真係因人而異，我就鬼打咁精神，高山雖然有太陽不過好大風好涼，所以都記得帶件風褸呀
紙箱王
之前都去過，所有野都係用紙皮整嘅，有興趣可以買Ｄ產品，妹妹就買左兩盞紙皮整嘅枱燈送俾朋友，依度其實好細好快睇完，隔離就係小瑞士花園，上次行過好失望所以今次無再入去，我覺得同樓下個公園無咩分別哈哈
清境農場
黎睇綿羊同綿羊Show，個show就係睇綿羊俾人剃毛個人覺得無咩好睇，同埋ｄ羊其實幾臭所以無留好耐就走左
第六日 台北,台中,墾丁
台糖台北會館
一早開車上台北，車程約三個半鐘，去到仲未可以check in，但係出面打風橫風橫雨，所以我地就係酒店食左個lunch等check in
依間酒店位置幾方便，可以行過台北車站，大概十分鐘就到，而且係捷運西門站附近，出去玩都方便
本來台北依兩日係會自己搭捷運去玩，計劃去西門町，淡水，貓空纜車，主要都係飲飲食食，點知撞正颱風，唯有留係酒店玩啤牌哈哈
89活海鮮店
地址：台北市合江街89-1號
電話：25016167
營業時間：11:30-14:00,17:00-22:00
夜晚預訂左要食海鮮火鍋，主要係食皇帝蟹，都有食大帶子，深海魚片，刺身，肥牛，食物質素非常唔錯，特別係皇帝蟹真係啖啖肉又鮮甜，一蟹兩食，無論係烤定烚都好甜，當然價錢都唔係平啦，不過間唔中食餐豪少少都ok啦
ps老闆娘非常熱情，會叫你點依樣個樣，樣樣都話必食，其實都無咩問題，但係叫太多食唔哂就浪費，所以記住適時說不哈哈，如果唔係佢就會幫你揸主意叫架啦
第七日 台北,台中,墾丁
桃園機場
其實我地係夜晚機返香港，但係颱風關係好多店舖都無開，係酒店附近食左雲吞麵，然後係便利店見到盒裝辻利抹茶雪條，即買！好好食！
差唔多時間，司機大哥就黎酒店接我地去機場，行下duty free，最後衝刺買手信就返香港啦
發表回應