-
目的地首爾
-
行程日數5日
首爾除左好多平化妝品外, 原來仲有好多好野食, 好野玩, 今次5日之旅好開心, 滿足口腹之慾又大開眼界!
第一日 首爾
廣藏市場
景點資料第一日晏機, 係HOTEL放低野, 就去廣藏市場醫肚, 廣藏市場有好多傳統既韓式小食, 紫菜卷, 韓式年糕同好多人排隊既綠豆餅, 綠豆餅好香脆可口, 加上個酸酸甜甜既汁好惹味同好開胃, 韓式年糕甜甜的, 好好味, 不過好辣, 紫菜卷好有麻香味, 係好滿足既一餐~
第二日 首爾
MISTER DONUT
訓飽飽之後, 即刻去左MISTER DONUT嘆番個DONUT, 士多啤梨同朱古力都好好食, 好煙UN, 唔太甜, 士多啤梨個個仲有D士多啤梨乾粒係面, 增加士多啤梨香同口感, 正~ 美好既一天由此起!!
特麗愛3D美術館
食完已經急不及待去左特麗愛3D美術館玩, 3D美術館分兩個區, 一個冰雕區, 一個主區, 冰雕區好細好凍, 可以係門口借件薄薄既笠, 笠住個身, 不過唔多有用, 又唔靚, 建議怕凍既你自己做好準備先, 冰雕區有1X件冰雕俾大家影相, 仲有冰滑梯玩, 都幾高幾刺激, 主區就有好多3D圖, 大約有1XX張, 好好玩, 可以玩半日, 我又扮行紅地氈, 又扮飛, 扮鬼扮馬, 玩玩下玩左6個中, 無咁爛玩應該都夠玩半日^^
Meat-ing烤肉
Meat-ing係一間任食烤肉店, 係弘大, 好抵食, D生菜好新鮮, D肉好惹味, 用生菜包住食一流, 仲有D熟食任食, 不過熟食味道就麻麻, 可以主要TARGET烤肉~
第三日 首爾
土俗村
景點資料土俗村既人蔘雞太出名啦, 唔想排好耐, 唯有早D去, 11:00去到, 都仲要等3個字, D人蔘雞唔夠人蔘味, 味道比較淡, 另外人蔘烏雞味濃少少, 不過都係唔太夠味, 再加上坐近房門, 因為人人要除左鞋先可以入去食, 所以我個位要對住超多鞋食飯, 仲有烏蠅都比較多, 對我黎講試左一次就夠~
景福宮
景點資料景福宮好大, 好宏偉, 熱愛歷史既我當然唔會放過入內參觀啦, 入場費3,000韓幣, 入面有好多宮殿, 個個都好似樣, 以前D人唔會迷路嫁咩?! 原來景福宮入面唔多小橋流水, 湖畔池塘都唔多, 同中國既各有特式, 走既時候啱啱搭正, 有士兵交接儀式, 軍人們好專業, 被邀拍照時都好莊嚴!
NOLBOO連鎖部隊鍋
行完又攰又肚餓, 要去叉叉電先, 部隊鍋係韓國好出名, 而NOLBOO就係連鎖式既部隊鍋食店, 質素應該有D保證, 2人只可叫同一款, 叫左個腸仔部隊鍋, 因為其他有D款, 好似泡菜部隊鍋會好辣, 怕辣既我唔敢食, 記住要加芝士, 芝士令個鍋更濃味更好食, 望住D湯由白轉紅, 口水已經流哂出黎, 一開始食唔太辣, 材料好豐富, 有通粉, 薯粒, 肉粒, 火腿, 腸仔.....味道唔錯, 不過食得好慢既我, 愈食愈辣, 可能愈煲D湯愈少, 不過愈食愈刺激, 正呀~
第四日 首爾
樂天世界
景點資料去首爾當然要去樂天世界參觀下, 呢個主題樂園有部分係室內, 有部分係室外, 有好多刺激既機動遊戲, 亦有好多適合文靜D既你, 好似射槍, 水上天鵝咁, 仲有表演睇, 真係男女老少都啱玩~
樂天世界食店
玩到攰, 求祈係樂天世界入面食, 因為原來改左政策, 遊客唔可以出左樂園再入番, 不過原來樂園餐廳都有驚喜, 首先間餐廳裝潢係模擬係水底, 有海豚, 八爪魚等海洋生物, D食物價錢唔太貴, 我叫左個蛋包飯, D蛋好嫩滑, 有蛋汁, 仲有蛋香, 隨時好食過係香港食!
八色五花肉
景點資料因為玩晏左, 黎到八色燒肉已經好多人等緊, 等左半個中終於入得, 八隻味既五花肉都好正好有特色, 不過個海鮮湯比較辣, 但當中真係要好多海鮮, 個湯差唔多食哂就叫佢上個炒飯, 點整? 原來係將D飯, 芝士, 蔥粒, 蟹子放落個海鮮湯中, 慢慢煮下炒下, 直到D飯吸哂D湯既精華, 好聰明既食法, 讚~
第五日 首爾
ISAAC
最後一日, 要食個豐富早餐, 去左出名既ISAAC食三文治, 因為即整, 麵包被煎到脆脆的, 又好香牛油香味, 中間有好多餡, 芝士, 肉片超多生菜同特色醬汁, 醬汁同肉好夾, 少少酸酸甜甜, 帶黎活力既一天~
全州中央會館
景點資料上機前既最後一餐去左全州中央會館, 石鍋飯係佢出名之物, 不過原來好普通, 同香港食既差唔多, 無咩特色可言, 唯有下次先可以再試其他美食, 不過首爾呀, 我會掛住你嫁!
發表回應