-
目的地首爾
-
行程日數4日
今次行程由我安排,我比較喜歡每一日都有啲主題,所以行街還行街,去觀光還觀光咁。不過首爾景點都好集中,點玩都得。
第一日 首爾
新堂洞辣炒年糕街
呢一日去嘅地方都係喺東大門附近「新堂站」同「新設洞站」一帶。
首先解決左LUNCH先,呢度係新堂年糕街,喺「新堂站」8號出口轉左就到。入面好似一個熟食中心咁,好多一檔檔賣年糕嘅舖頭。一鍋有年糕、魚板、水煮蛋、麵同蔬菜,好飽肚,最好兩個人或以上先好泥食。
首爾中央市場
年糕街出泥,去返地鐵站,再喺2號出口出,反方向行就到首爾中央市場正門。
呢度係當地一個街市,主要係泥感受下當地人生活,同埋買生果食。相信大家去旅行嗰幾日都會少左食生果,好唔健康。所以我每次去旅行都要搵地方買生果。同埋買左樽醬料返香港,鍾意食韓國嘢/煮嘢食嘅人,不妨泥一泥買啲醬料,因為真係平民價。呢度都有啲韓國小食,拌飯、蔥餅等等,不過食年糕已經好飽,我就冇食啦。
新堂創作藝術長廊
喺中央市場會見到好多入口,落去地下嘅藝術長廊。
長廊放左好多藝術展品,可以影下相。
炒豬腸街
出左中央市場行五分鐘左右,會見到好多間賣炒豬腸嘅舖頭。
韓國人好似好鐘意食豬腸,抱住不妨一試嘅心態,食左野菜炒豬腸。我覺得幾好食,炒得好香。一場泥到,緊係乜都試下啦。
首爾風物市場
景點資料
喺東大門Emart側邊條橋,過對面轉右直走就係風物市場。
RUNNING MAN有一集來過呢度拍,啲人話好似一個室內嘅深水埗,但我覺得啲嘢靚過深水埗。呢度好多古舊嘢買,好啱鍾意舊嘢嘅人。好似留聲機、卡式帶、黑膠碟、舊瓦餐具、皮製品、打字機。令我荷包出血嘅係有一檔賣啲生鏽鐵牌,我覺得好鬼有味道,好似歐洲啲風格咁,仲要生鏽嗰下先正。
第二日 首爾
首爾去加平
首爾清涼裡站坐火車,一個鐘內車程到加平
加平旅遊循環巴士
加平站對面,可以搵到加平旅遊循環巴士,係去南怡島、小法國村同晨靜樹木園嘅車,有固定時間
南怡島
自從裴勇俊同崔智友主演嘅「冬季戀歌」之後,呢個小島成為旅遊熱點,我去嘅時候都好多遊客。呢度周圍都有啲得意嘅石像,同埋好多草地、樹蔭步道,可以輕鬆郊遊下。
我去嘅時候係夏天,一片綠油油,遲啲秋天會有紅葉同銀杏,會好壯觀(睇過朋友啲相)。
小法國
景點資料《來自星星的你》喺呢度拍過,RUNNING MAN喺拍過,係好受歡迎嘅景點。呢度係成個法國鄉村風格嘅主題公園咁,好靚好悠閒,好有童話嘅感覺,同行嘅女性朋友影相影到冇電。有個位可以望到清平湖,有咖啡飲,超RELAX。
晨靜樹木園
係一個好大嘅庭園,有好多唔同嘅植物,仲有啲韓屋,好有韓國村落風格。四季會有唔同嘅景色:
春天:春庭園展
夏天:玫瑰.山水菊.無窮花節
秋天:菊花.丹楓節
冬天:五色星光庭園展.適合夜間探訪
(網上資料)
呢度真係好靚,一個好好感受大自然嘅地方,淨係樹已經有好多唔同品種,沿途又勁多花卉。
第三日 首爾
樂天超市
景點資料
韓國嘅大型超市,我之前已經寫落一張LIST係FOR買手信,好多人知我去韓國都話要呢樣要嗰樣咁,基本上一個樂天就KO哂所有禮物,亦霸左我半個喼同一個環保袋。可以同大家SHARE我嘅清單,相信會有用:
1.辛拉麵、安城湯麵、炸醬麵、冷面、烏龍麵
2. ORION農心薯片
3.年糕餅乾
4.酒時樂 莓果口味 東東酒 (酸酸地嘅米酒)
5.女神 粟米鬚茶
6.Market O (好多香港冇嘅款)
7.樂天自家品牌布朗尼蛋糕 (本人覺得好味過MARKET O又平啲)
8.香蕉牛奶
9.韓國Cass啤酒(有檸味)
10. illi 一理 沐浴乳及潤膚乳(呢個係家姐話要,話係全智賢代言....中哂毒)
11. CROWN歐風 法式夾心酥
12.魚仔朱古力棉花糖蛋糕
13.韓式辣醬
14.樂天牌 牛奶(原味同朱古力)(唔建議帶返香港,自已享受好啦~)
15. 狸貓公仔麵
16. 紫菜
差唔多就係咁多! 已經好多== 真係要預好位放手信,大家記得液體入喼,易碎HAND CARRY。
第四日 首爾
梨花女子大學
景點資料由於下晝就出發去機場,所以就唔安排太多景點,去梨大行下就算。同香港啲大學好唔同,呢度真係可以做一個景點,啲建築好靚,又有好多花草樹木,係HKU嘅建築+中大嘅景咁嘅程度。
전골떡볶이(火鍋辣炒年糕)
梨大站2號出口,一直行,見到左手邊有梯級就落,黃色招牌就係。
呢個係食部隊鍋,我覺得幾好食,個湯好濃味,但唔會太辣。另外最好食嘅我覺得係個炒飯! 本來冇諗住叫,因诙部隊鍋都好飽,但聞到隔離枱食好香!!於是叫左一份同FRD SHARE。 啲飯有少少焦,加埋粟米、芝麻同紫菜炒,好香!
發表回應