-
目的地台中
-
行程日數5日
自從廉航的出現，幾百蚊就飛得啦，多左好多人去台中。不過大部分人都會選擇去清境，又或者轉車去台北。甚至有好多人反問我，乜台中都有野玩呀架咩？其實台中都有好多特色的小地方，台中係可以夠你玩幾日架！
第一日 台中
機場到市區
由於廉航一日只得兩班機，而多數都只有夜機有優惠，去到台中大約八點幾，如果住得近火車站，可以搭公車，一個鐘內可以去到，而的士就大約台幣500，時間約40-45分鐘。但如果住逄甲，我建議一定要搭的士啦，因為無車直到，約台幣400。
逢甲露天夜市 (前稱逢甲夜市）
景點資料由於去到已經夜晚，所以行夜市係唯一選擇。逢甲夜市算係本人最中意的一個夜市，大部分食物都好有自己的特色，唔似其他夜市，買黎買去都係個幾款。而且呢度「中伏」的機會比較細，大部分都好好味！除左食之外，呢度都好多野行，一晚行唔完，第二晚繼續。
第二日 台中
Haritts Donuts & Coffee
來自東京的Haritts Donuts 一直大受台中人歡迎，經常有一大條排隊人潮。在巷弄內，有少少難搵。每日販賣的口味都會有少少唔同，不過都有固定款，我當日試左抹茶紅豆，抹茶味香濃。溫馨提示，由於數量有限，早去會有多D選擇！
勤美誠品綠園道
雖然香港已經開左誠品，不過去台灣點都會想去下誠品。而去台中，多數都會去呢一間誠品，而誠品附近的小店先係重點。隨心行，都會去到一家特別的咖啡店。
茉莉二手書店
茉莉二手書店全台都有分店，台中這一間鄰近誠品，大家都是書店，與誠品不同的是它賣二手書，願意花時間，在這麼不難挖掘合適自己的寶藏。
田樂for Farm Burger
巷弄之中又有另一間人氣高企的老宅餐廳，主打日式Burger。食落口感無美式咁油膩，但滋味。整間田樂走日式雜貨風，好舒服，最啱Hea一個下午！
胡同咖啡 Whotogether
行到累，咁岩又見到一間bookmark左的cafe！普通意式咖啡之外，胡同都有賣精品咖啡，店員仲好比心機幫你揀一隻適合你的咖啡。結果，真係好啱心意！咁好的服務，舒適的環境，真係令人唔捨得走！(仲有痴人的貓貓)
第三日 台中
Funny Seals brunch
本身黎台中都係打算Hea，hea又點可以唔食返個brunch呢？一搵之下，原本台中有好多食早午餐的地方，但胃就得一個，唯有揀一間近近地的。份量飽肚，豆漿新鮮，用料一流(店內有一張介紹食材的小卡，話比你知有幾咁健康)，一個早餐已經令人好滿足！
台中去心之芳庭
如果時間許可，而唔想剩係行市區，都可以選擇去遠少少的心之芳庭。無記錯的話，台中去心之芳庭約半個鐘，價錢就忘記了。
心之芳庭
心之芳庭是一個收費的主題景點，門票台幣$200，不過憑門票在園內消費可折台幣$100。園內景點規模不算太多，可以好快就行完。不過歐式的建築，加上獨特的裝飾，每個景點都會吸引你影相，要影完就會花D時間啦。園內都有不少特別的店，有賣手工皂。
心之芳庭
景點資料好多主題公園或者景點內的餐廳都唔多好食，但心之芳庭內的「親親我的家」，我就極力推介啦。成間餐廳打造到好似屋企咁，有埋浴缸，當然唔係叫你係浴缸度食野，不過可以比你參觀影下相。餐點方面，會希望你同朋友互相點餐，睇下大家有幾熟悉對方。味道方面亦算唔錯，前菜至甜品都無乜令人失望的地方。
第四日 台中
安徒生童話鄉村廚
店內都是以安徒生童話主作為題材，偏向鄉村風，柔和的顏色配搭，令人特別開心。價錢不算太貴，台幣二、三百已經有一個FULL SET的西餐。
忠信市場
原本破舊的老市場改變為藝文展覽的場所，一開始行入去有點陰森的感覺，但裡面的人文氣息，令呢度增加好多人氣。 有一家是買懷舊野，可以入去尋下寶。亦有一家咖啡店販賣店主即時炮製的精品咖啡。
第五日 台中
宮原眼科
景點資料由於廉航一係午機返，一係夜機後，買到午機都唔洗灰心嘅，仲有宮原眼科可以去下。宮原眼科前身一間眼科診所，不過而家係人氣景點。宮原眼科的雪糕每一次都要大排長龍，不過因為早去，個情況會好少少。另外，宮原眼科出名包裝靚，所有包裝都有主題且精美。當然唔係只係得外表，味道都要有返咁上下質素保證。除左鳳梨酥、太陽餅，個人都十分推介乳酪蛋糕。
發表回應