-
目的地沙巴
-
行程日數5日
係香港,冬天一年凍過一年,天氣凍到個人唔願郁,所以就決定轉個環境,轉下心情,想係假期去下旅行,享受陽光與海灘。去邊?就梗係要去馬來西亞既沙巴啦!
當香港仲處於冬季嚴寒既氣候之下,我就同班朋友飛左去沙巴既首都亞庇。而沙巴當地全年夏季,最岩就係去玩水上活動、晒下太陽!
第一日 沙巴
搭飛機,去亞庇!
三小時機程,到達沙巴亞庇。
隨意遊
住既酒店位於市中心,一到埗放好行李,就係市中心四圍遊,人生路不熟,要視察下環境、認下四周既路,順便睇下當地既風土人情,最緊要梗係搵下有咩好野食啦。
Suria Sabah
景點資料亞庇市中心好細,特色小店唔算多,賣手信、當地特產既就唔少,都仲有D商場行下既。而Suria Sabah就比較新同國際化,但亦因為咁,同香港某D大型商場好似,都係個幾間連鎖店,不過價錢比起香港就真係比較平既,特別係護膚品。唔知點解係咪因為星期日,定係馬拉人係咪比較早放工呢?去到六、七點既時候,D鋪頭已經開始收鋪,所以我地都決定再去搵好野食醫下肚。
第二日 沙巴
九如河
景點資料第一次玩激流,就擇左難度只有Level 1-2既Kiulu River,所以就講唔上係驚險刺激,但係沙巴咁炎熱既天氣下,吹著涼風,同格離船既團友玩下水戰,就夠哂清涼,沿途既景色仲幾靚,所以都係一個愉快既體驗。玩完激流,仲會有特式自助餐食架!
馬里馬里文化村
景點資料玩完激流,就返酒店梳洗下、休息下,夜晚再出發去文化村參觀。馬來西亞當地一班年青人會裝扮成原住民,演示著唔同族群各有不同的習俗同特色,隨左可以見識到當地既歷史文化、建築,仲可以試飲當地米酒、蜜糖,味道一流!最後就會有歌舞表演同自助餐食。
第三日 沙巴
威士頓生態區
景點資料
係到達紅樹林之前,local tour既導遊會係中途既小食店停低,介紹我地食特色既牛骨湯同馬來西亞好出名既ABC,牛肉湯真係好濃好香,但就咸左少少,而ABC係刨冰,咁熱既天氣食就最岩。
去到紅樹林,咁岩遇著陰天,天色唔太靚,但個景依然唔錯。雖然距離唔太近,但都可以見到樹上一隻隻既長鼻猿,有大有細好得意,睇完就先食晚飯,夜晚等到天色黑哂再搭船出發。到宜家,我仲記得漆黑之中睇螢火蟲,一點點既綠光係幾咁靚!
第四日 沙巴
沙比島
景點資料沙比島係亞庇其中一個小島,可以玩各式各樣既水上活動,其他我就唔太敢試啦,只係玩左浮潛。雖然只係浮潛,唔能夠好似潛水咁去到水底,但沙比島既魚多,連淺水既地方都有,水又好清,簡直就係同魚一齊暢泳。
味雅海南雞飯
景點資料味雅既海南雞飯真係令人難以忘懷!仲有冰凍桔仔水酸酸地夠哂開胃,雞飯既飯被堆砌成三角錐體,外形獨特,味道都唔錯,最好食當然係主角,雞肉好嫩好滑。到左宜家,對個海南雞飯依然念念不忘!
雙天海鮮樓
景點資料黎到亞庇,一定要試下當地既海鮮,又平又好食,再飲埋個清甜椰子,正!雙天海鮮樓位於既”food court"有幾間唔同既海鮮餐廳,價錢各異,名附其實既海鮮價!格離賣既串燒有雞、豬、牛,都好惹味架!
第五日 沙巴
買手信
再一次係市中心遊歷,行勻大街小巷,食過好食既特產,都買返香港送俾朋友!
搭飛機,返香港!
早機去,晚機返!
發表回應