亭一亭

近年，元朗變成美食集中地，日本菜、雞煲、高價西餐廳遍地開花，最新一家「亭一亭」卻不跟風，主打特色中菜。小店都幾犀利，店子的冰鎮系列成為街坊洗版必POST之作，分別有鮑魚及咕嚕肉2款，特別之處是以甜品常見的乾冰墊底，上枱時倒入清水，成碟餸騰雲駕霧，未吃已滿足視覺享受。冰鎮菜式當然也講究質素，如以新鮮南非BB鮑炮製，像日式刺身般食法，簡單灼熱後以大量冰塊座涼，蘸wasabi豉油吃；咕嚕肉則是熱食，精挑豬腩肉製成，入口油花豐腴，配以冰凍的菠蘿，一冷一熱，雙重口感。

店內菜式均由老闆方生的爸爸主理，從事大廚30多年，曾於利苑等大集團工作，同料有堅持，如店內所有海鮮全部即日到街市買貨，更特設魚缸養桂花魚，用來即劏即做酸魚窩，魚味零舍鮮！較大路的椒鹽九肚魚，賣相平凡但真係有「化骨」效果，原來多骨的九肚魚以人手逐條起骨並炸得金黃剔透，難怪成為店內best seller之一；還有懷舊焗魚腸，特意加入蠔仔炮製，令鮮味double up。

店子更不時推新花款，像惹味的啤酒鴨煲，吃罷可加湯做火鍋，亦提供私房菜的形式，比一般中菜館靈活多變！