英國中學派位時間|每年10月31號係中一派位申請截止日期,由 9 月中開始到 10 月中,同區中學都有安排 Opening Evening 畀家長同小六生參觀。雖然一般同區中學都唔會安排同一日搞,但名額有限,所以最後只係報倒兩間參觀。英國嘅中學係好吸引,校舍好多都好大,好多唔同類型嘅課室,成個模式比較似香港嘅大學多啲。除咗睇學校自己網站同 Opening Evening,亦可以去 Locrating 睇吓客觀數字參考,例如師生比例、學生缺席率等等都可以作為考慮因素。
▋ 英國中學派位關鍵日期
先講時序。如果你子女係小五生,一般 3/4 月時就已經通知有關 11+ 入學試 (11 Plus) 考試嘅嘢。11+ 係用來報考文法中學 (Grammar school) 同某部分中學嘅入學試,呢啲中學會預留一個比例嘅位置畀考11+試嘅學生,就算同心水學校住得距離好遠,都可以憑呢個方法去試吓,我呢區有兩間比例都係 25%,當然唔同地區未必一樣,要視乎學校入學政策 (Admission Policy) 而定。
11+入學試係 9 月初考,10 月中出結果,你可以視乎成績去衡量畀某心水學校取錄嘅可能性。如果冇興趣考 11+ 入學試,想按一般派位報中學?繼續睇落去…
▋ 英國中學派位點玩法?
首先你要有英國住址,就可以向所住地區嘅Council (我係向County level,唔係 town level) 網站去申請。
最重要最重要最重要係了解學校資料同埋收生政策先。以我住嘅 County 為例,多數學校每年收二百幾個 Year 7 新生,而每間學校都會列出自己嘅收生標準,考慮嘅因素應該都係大同小異,但係考慮嘅先後次序就未必一樣,學校嘅考慮因素會有:
- 學生係咪需要特別照顧,特別監護情況,呢個通常係優先考慮
- 申請人居所與學校距離,即係 Catchment area,學校會以正門同你住嘅地址拉條直線計距離,多人爭嘅學校,都要去到幾百米先入到
- 有冇哥哥姐姐讀緊
- 有冇父母係學校職員,但通常要做夠一至兩年先會考慮
- 有冇考到 (11+) 或音樂/體育試
如果有哥哥姐姐讀緊就梗係好啦,但如果冇,Catchment area 就變得非常重要,所以點解租屋時盡量揀就近心儀學校嘅盤。呢度嘅 admission policy 寫得好仔細,如果兩個申請人報嘅地址係一樣 (例如 Flat),咁點揀呢?我睇過一間就話,個 Tie-breaker 就係屋號細果個優先,所以 Flat 住地下就有少少著數喇。
▋ 英國中學申請表格用盡 quota
講番申請,記住要 10 月 31 號前申請,申請結果要去到下年3 月 1 號先公布。揀學校時,一般都會有 3 至 6 個志願可填,一般可選擇最多3至6個志願。要注意一點,志願順序同入學成功率冇直接關係,學校只會按學校各自的收生準則分派學位,唔會考慮你係咪揀自己做第一志願。舉個例:假設我填咗4間學校,申請就會同時被呢 4 間學校考慮,如果最後有多過一間學校收,就會以排序最高果間學校去取錄,而其他排序低啲嘅學校就會自動取消申請。
所以盡量填晒咁多個 quota,如果 3 月 1 號派位唔啱心水,都可以聯絡學校係咪可以入後補名單。由 3 月到 9 月開學,其實仲會有好多變動,有家長亦可能會先派位照報公立中學,而最後揀入私立中學而放棄學位。聽人講,就算最初派位志願冇填,都可以照排其他學校嘅後補名單。
如果趕唔切 10 月 31 號呢個限期,咁就要之後插班了,希望大家申請同派位都順利!
授權轉帳:英倫爸爸
↓ 大灣區一小時生活圈!最新打卡熱點/熱門美食等!↓
↓立即睇打卡熱點/地道隱世美食/必買手信等!↓