2021.11.22
有移民打算的家庭必定會擔心子女的教育，好奇當地學校的學習安排。今年移民英國的英倫爸爸則分享其出席家長會的經歷，讓大家對英國學校有更全面的了解。
▋ 全級有幾多人？
呢間小學有成 130 年歷史，校舍仲係當年維多利亞單層式建築，容納嘅學生唔算多，全級有兩班，每班大約15人左右。
▋ 有幾多個老師教？
英國 state school 小學好多都係每班一個 class teacher 負責教晒英文數學同其他科目，不過都會有類似助教幫手，尤其係幫助一啲插班生或唔太識英語嘅其他國籍學生。
▋ 有冇香港音樂視藝電腦體育等術科？
體育係有嘅，唔同學校每星期都會有一至兩堂，可能係學校自己老師教，或者外判出去。學校一星期有安排一堂游水堂。
電腦堂都有，最近佢就上緊分組做 Powerpoint 宣傳海報。平日時間表係冇專門教音樂或視藝嘅課堂，但教唔同 Topic 會 cover 到 Design & Technology 嘅範疇。音樂方面，學校可能會同 Council 有聯繫，安排到老師喺上堂時間或放學教樂器。
另外，唔少小學都會有安排教外文，西班牙文/法文/意大利文是但一樣，呢樣就應該跟學校，冇得自選。
▋ 有冇功課？
老師喺家長會入面話，六年級嘅功課都係畀學生上中學時易啲銜接同適應，但都只係講緊星期五派兩份英數工作紙。
英文果份係閱讀理解答長題目，數學就仲係做緊加減乘除複習，程度睇落係比香港同年嘅簡單。
另外，星期五會畀 10 個生字下一個星期默書，而功課係下星期五先交，即係有成個星期畀你做。不過，每日都要做嘅，係老師要求學生每日睇 20 分鐘書。
老師知道大女係香港嚟，有問過佢香港讀書點，佢就梗係答好多功課啦，當老師知道長假期有 20 樣功課時都 O 晒咀：咁仲點算係 Holiday？
▋ 有冇測驗考試？
六年級嘅學生 9 月開學時可以自行報考 11+ 嘅中學選擇性入學考試。一年三個 term，冇 term test，但學期尾會考一個全國性嘅 SATs （Standard Assessment Tests，標準評估測驗） 。
考試目的並唔係用來分派升中學位，而係用作評估學生程度。英國教育局要求每年嘅 Y2 二年級、Y6 六年級同 Y9 九年級嘅學生都需要參加，一般喺五六月左右進行，Y6 測驗都係考英語閱讀、英語寫作同數學三個核心科目。SATs考試成績可能會作為小朋友上中學後，按能力分班嘅一個參考。
SATs 同 11+ 嘅分別，老師話 SATs 係用嚟評估學校嘅水平，而 11+ 就係學生個人能力，直接用來報考 Grammar school 之用。
▋ 有冇畢業旅行？
唔少學校都應該會安排一個四五日嘅畢業旅行，佢哋今年嘅 trip 會去英國南部懷特島 (Isle of Wight)，好吸引！
授權轉載：英倫爸爸
↓全新旅遊主題登場↓
↓立即睇打卡熱點／地道隱世美食／必買手信等！↓![]()
↓立即睇打卡熱點／地道隱世美食／必買手信等！↓
↓必收藏！香港咖啡地圖2023！↓
↓精選50間咖啡店（附評分）！即睇詳細介紹↓![]()
↓精選50間咖啡店（附評分）！即睇詳細介紹↓
utravel
發表回應