Plan 定先後出行系列--清邁唔玩水,行山一樣得。湄旺國家公園有個 IG 神秘絕境,來個輕量級行山,舒展身心之餘仲有得打卡。在清邁必逛的文創市集 Baan Kang Wat,有檔由 IG 起家的植物印染小店,貨品 100 港元起跳雖然唔算平,但手工精製,100% 天然又環保,來到清邁好值得支持!
*文中貨幣已兌換成港元,1 港元約兌 THB 4.2
30 分鐘 尋 IG 神秘絕境!
湄旺國家公園(Mae Wang National Park)有 N 個瀑布,有竹筏坐,原來仲有個秘境帕丘(Pha Chor)。帕丘位置原本係平河(Ping River),後來河流改道,河谷的沉積物堆積成山丘狀,經風雨侵蝕後,形成綿延一片陡峭山壁如峽谷地形般的景色。山壁睇落如巨型的天然屏風,佇立於林中。石柱各異其趣,靚景自然成為 IG 打卡位。帕丘面積唔算大,高 30 米,橫向 100 米,但近距離望依然壯觀,佩服大自然的鬼斧神工。從遊客中心步行至帕丘只有 400 米,30 分鐘行得完。滿地黃土的路綫迂迴彎曲,是原本的河道路綫,有點像迷宮,要靠沿途路牌提示先唔會迷路,令帕丘添上幾分神秘。
好有氣勢的山壁。
起點為遊客中心,一直往下走,條路一啲都唔難行,冇行開山都征服到。
中途有涼亭休息。
除了天然陡峭山壁,另一邊的「藝術品」,泰國人話似巴特農神殿的石柱,無限的想像力呀。
在隙縫中行走,頗有尋幽探秘之感。
遊客中心有廁所同小食亭,冇想像中荒蕪。
info
Pha Chor
地址:Tambon Santi Suk Amphoe Doi Lo Chang Wat, Chiang Mai 50160
開放時間:8:30am - 4:30pm
門票:成人 24 港元;小童 12 港元
交通:市中心乘車約 1.5 小時
植物印染 大自然的色彩!
Rissara 由 IG 起家,去年開始在清邁各大市集蒲頭,後來出現在新興文青小區 Freeative Art Space,最後在清邁最受歡迎的文創村 Baan Kang Wat 紮根。店內貨品唔算多,頸巾、tote bag、女裝 top、童裝等,清一色為植物印染產品(Ecoprint)。植物印染是將花瓣同樹葉的天然顏色印於布料上,老闆 Som 為曼谷人,在網上看到植物印染,覺得有趣又夠環保,決定移居清邁發展。Som 表示,比起藍染同紮染,植物印染唔算普及,工序又較複雜,要完成幾個步驟需時 3 日。先將棉、麻質、絲質布料去除雜質洗淨,再放在鏽水中煮 1 小時左右,方便上色;將花瓣、樹葉鋪在布料上,用力壓榨出樹葉汁液,以繩紮實定型,放入鍋內蒸 2 至 3 小時。冷卻 1 晚後撕掉花瓣、樹葉,最後將布料沖洗乾淨拎去縫製。布料及花瓣、樹葉的不同,令每次印出來的 pattern、顏色都唔一樣,每件都獨一無二。店內貨品 100 港元起跳,唔算平,但工序繁複花時間,而且 100% 天然又環保,咩都抵返晒。
店內貨品 100 港元起跳,唔算平,但工序繁複花時間,而且 100% 天然又環保,咩都抵返晒。
以玫瑰葉印製的棉質帽 130 港元
小童民族背心 140 港元
各款頸巾是店內最人氣產品,285 港元起。
各種樹葉花瓣原材料放在玻璃瓶內保存。
尤加利葉、洋葱皮、玫瑰花瓣、捲心菜等都係 Som 喜歡的原材料。
揀葉脈較清楚的樹葉來做植物印染,出來效果會更佳。
Som(右)由曼谷移居至清邁,希望有返「quality of life」之餘,更希望將植物印染發揚光大。
info
Rissara
地址:191-197 Soi Wat U-Mong, Th. Suthep, Chiang Mai
營業時間:10am - 6pm
交通:尼曼路乘車約 13 分鐘
↓礁溪溫泉美人湯♨️宜蘭精神地標龜山島海景及蘭陽平原🏞!↓
↓ 獨有的輕、柔、穩手法無痛清理耳垢 / 為疲倦的身軀充電!↓