【移民英國】英國住屋住邊區好？推薦區域/搵樓、查校網教學/買樓租屋建議

2020.07.08

移民英國，住屋自然是重要考慮。英國住邊區好？住宿有甚麼推薦的區域？如何確認住屋屬心儀學校的校網範圍？買樓租屋又有甚麼建議？以下有居英港媽「港媽 • 講英」分享決定英國住邊好時的考慮方向及實用建議。

首先，諗落腳點時請量力而為，不要去得太盡。英國樓幾平都好，都要「大拿拿」百幾萬港紙，仲未計stamp duty（印花稅）、律師費、雜費。如果你是打算傾盡所有買間dream house，那你要留意過到英國能不能生活。每個月支出雖不是非常貴，但始終都是支出，而在英國搵到工作有收入，並不是一件好快好容易好簡單的事。隨時有機會半年至一年先有點聲氣。

英國住屋推薦區域

英國東/南/西/北/中部的天氣、口音、樓價等都有不同。近城市可能對香港人容易一點適應，郊區又可能是香港人的夢想，住宅suburban（近郊住宅區）又或是香港爸媽的心水。總之沒有對錯，因為大家的背景、喜好、經濟、家庭都不同。所以，如果想搵心中理想家，就要自己下苦功做功課。上網入谷（group）問固然有價值，但最後住的是你自己。去到才發現天氣不似預期，就自己問自己點解啦。

如果還未有頭緒，不妨試試發掘以下城市或county（郡）：

Reading, Surrey, Kent, Norwich, Milton Keynes, Oxford, Birmingham, Essex, Sussex, Cambridge, Colchester, Cheltenham, Nottingham, Leicester, Manchester, Liverpool, Leeds

這些都是網友和我提及過的地方，大家可參考一下。

Which？

Which?是一本暖男爸（作者老公）非常受落的雜誌，上至廚房用咩家電，下至買咩水煲/多士爐，暖男爸當天書咁睇。Which?其實類似消費委員會，對市面上好多種唔同產品進行rating（評分），平衡各方面之後會得出%總數，再有建議是否「Best Buy」（推薦購買）。

重點是，這本雜誌對英國各區都有同樣的rating。雜誌會審視該區的average house price（平均樓價）、life expectancy （預計壽命）、happiness score（快樂指數）、household income（家庭收入）、school ofsted ratings（英國教育標準局對學校的評分）而對每區作出評分。都係一啲硬data，但叫做有啲嘢睇吓做reference。

搵樓、查校網教學

Postcode

英國寄信有樣叫postcode嘅嘢。可以用postcode去發掘市中心周圍的地區。以Oxford為例，Oxford當然唔係得大學，成個oxfordshire都好大。Google 「postcode map of Oxford」，google image就會彈出一張有area、有postcode的地圖。

查看Postcode Map

Rightmove

英國住屋，Rightmove（App）將會成為你的好伙伴。下載個app，如果你係買樓，去「to buy」mark好你的purchasing budget（購買預算），再㩒入你google搵到、你又心儀（或者求其搵個area試吓）的postcode，Rightmove 就會顯示所有該區啱你budget嘅屋俾你睇。

Rightmove有個非常神聖嘅制，就係「school checker」。在app內按進其中一個property（物業），再按「school checker」，就會顯示到這間屋屬於邊間小學或者中學的校網，非常方便。但當然穩陣起見，到佢相關嘅Council網頁check吓。

App Store下載
 Google Play下載

想跟校網選擇住址有咩要留意？

到相關的Council網頁，可知道自己揀的區域中，會入讀的學校係咩rating（評分）。之後就上網research吓該學校是否心中所想，那你就有了個大概，再根據自己不同喜好，再收窄去搵。小小意見，如果要揀小學定中學「outstanding」（高學校評級），我會揀中學。因為一間inspiring 嘅中學，除咗好影響入咩大學，仲會好影響小朋友的個人成長。

而眾多家長熱捧的Grammar School（學術性高、成績好的公立學校），亦是政府學校其中之一。要考入學試之餘，亦都要有地址和跟校網。如果有心想入Grammar School，可以睇吓ranking（排名）。相信咁樣已經可以收窄到好多落腳點的選擇。

建議考Grammar School還考Grammar School ，都要搵一個好中學的校網，因為如果萬一考唔入，都可以有一間好好的政府學校入讀。

另外，11+入學試大概在六年班上學期考，所以家長要計好時間。另外英國教育不鼓吹defer（延期升學/畢業），所以要留意返。多數五年班就開始操卷，準備考11+。