【短綫特搜】超邪惡！首爾肉食超值 4 選

2020.07.03

除了行街、追星，來到首爾這個韓牛、五花腩、海鮮等肉食之都，當然要幫襯返幾間首爾邪惡肉食餐廳！記者口袋就有 4 間肉食推介，賣點係價錢平、質素高，非常有驚喜。待疫情放緩，一定要飛去首爾盡情大口大口吃肉！

1. 人氣店｜熨烤厚豬皮

齋聽店名「麻浦燒豬皮」，就知道這間燒肉店的主角並不是五花腩，而是充滿骨膠原的韓妹寶物——燒豬皮！雖然唔知食完會唔會變靚，不過餐廳標榜只用國內產的豬肉，豬皮一上枱，厚度十足，再加上使用秘製的焦糖醬料醃製，望見已經好吸引。為怕燒的時候豬油四濺，餐廳更提供鐵熨，壓住豬皮，同時亦燒得更均勻。豬皮燒完皮脆軟嫩，口感彈牙，真係好！好！味！唔知道是因為肉本身出色，還是醬料神助攻，吃起來零腥味，更帶些微甜甜的肉香。

餐廳亦提供不同豬肉部位，好似五花腩、軟骨肉、前腿肉和後腿肉等，同樣不會失望。厚切上枱的五花腩，肥瘦層層分明，吃落帶油脂香，軟嫩的口感難怪是韓國人至愛的燒肉部位。不過記者至愛是前腿肉，油份相對較少，無咁膩口，食落更有肉感和嚼勁。不過燒肉店位於弘大購物街附近的內街，所以人氣爆棚，夜晚6點幾已經要排隊，但不知疫後情況如何，都建議早少少來幫襯。

韓牛大醬湯 50 港元

牛肉煮得軟爛，口感一般。不過湯身好香，豆腐亦夠入味，值得一試。

前腿肉 76 港元

這裏的前腿肉切得較為厚身，肉感更豐富，更易鎖住肉汁。

豬皮炒飯 32 港元

切丁豬皮加入芝麻、青葱，炒飯好香口。

燒豬皮 50 港元 / 150g

以鐵熨壓烤豬皮，唔怕燒的時候油花四圍彈。

【INFO】마포껍데기

地址：首爾市麻浦區西橋洞358-62 1-2/F

電話：+82 (0)2 336 1131

營業時間：每日 5pm-1am

交通：地鐵 2 號綫弘大入口站9號出口步行 5 分鐘

2. 半半鍋｜任食鮮貝燒肉

去過連鎖的貝殼倉庫幾次，平價任食燒貝固然吸引，不過被中港台遊客大舉侵佔，愈來愈無驚喜。如果想喪食鮮貝，可以試試記者近年的心水。這裏最特別的是爐身分為兩半，一半用來鐵板燒肉，另一半則可以燒或蒸鮮貝。

店主夠大方，一枱一個購物籃，加兩隻大碟。食客隨意走去魚缸任夾鮮貝，在雪櫃任夾三層肉，而所有肉類、配菜和海鮮，都是無限refill任食。這裏的貝類每日基本都有20款，全部活生生的，新鮮到夾起時仲識噴水。

記者燒貝技巧太差，入場時已經一心決定食蒸貝。蒸15分鐘，打開有花蟹、河蝦，亦有拳頭咁大的大蜆、帶子、鮑魚和青口。尤其大蜆隻隻都咐鮮甜，加埋以韭菜、洋葱、胡椒熬成的湯底，食落帶少少辣勁更滋味。至於成人人頭費180港元（不包飲品、拉麵），以其他首爾餐廳齋叫一個海鮮鍋都差不多200幾港元來計，基本上在這裏食第一轉已經回本。

蒸鍋上枱分量十足，貝類新鮮鮮甜不在話下，連配角芽菜、娃娃菜亦吸收湯汁精華，好味到停唔到口。至於夜晚 10 點後幫襯，亦可以單點海鮮蒸鍋，大 size 的只要 366 港元，佐酒一流。

燒肉 + 蒸貝或燒貝任食成人 180 港元、小學生 120 港元、幼兒 89 港元

入場時需要選定蒸貝還是燒貝，之後再改需要額外加錢。

拉麵需另外收費，19 港元。

魚缸養住近 20 款活鮮貝，鮑魚、青口、扇貝統統任食，食幾隻已經回本。

【INFO】청담마켓

地址：首爾市江南區論峴洞101-13

電話：+82 (0)2 515 3314

營業時間：每日4:30pm-1am（12:30am L.O.）

IG：cheongdammarket

交通：地鐵7號綫江南市廳站3號出口步行8分鐘

4. 吧枱小店|炭火燒韓牛

在香港餐廳隨便叫一份韓牛，動輒都要二三百蚊，比韓國貴上一截。所以每次到首爾旅行，食一餐韓牛幾乎成為指定行程。但因為當地的飲酒職場文化，燒肉店多以熱鬧圍爐燒的布置為主。想好好靜靜談心食燒肉，位於望遠洞的小店 뿔 是一個不錯的選擇。

日式居酒屋一樣的コ型吧枱，客人前面是一個燒旺的炭爐，播住 jazz 音樂，頗有深夜食堂的氛圍。甫坐下，老闆已經落力用簡單英文介紹，相當熱情。餐廳只提供 1++ 等級韓牛，有菲力、里脊肉、沙朗、排骨等位置。所有部位都不經醃製，只簡單以海鹽調味。一致大讚的是牛里脊，肉質軟腍得來，肉味濃，牛雪花脂香亦是最重。

嗜好杯中物，這裏除了有啤酒、燒酒，亦有紅白酒和傳統的松酒、大麥酒等，好不盡興。見到牆上的香港電影劇照，細問之下原來老闆極愛香港文化，對王家衛、張國榮也相當熟悉。談香港、談音樂，一餐燒肉主人和食客盡歡，極有氣氛。