台北$200草根版Omakase 街邊食高質刺身壽司

不少人都話，台北食 Omakase（廚師發辦）抵食高質。但平到人頭 200 港元一餐，有無聽錯？位於台北松山區的阿東師是路邊檔，十來個座位排在路邊，車來車往，少了一分奢華矜貴，多了一分市井熱鬧。屋台一樣的格局，反而有獨特的日式 Omakase 享受，開懷大啖高質刺身壽司，好好 feel。

老細兼主廚王火東是台灣壽司界的傳奇人物，高峰時期開過 20 幾間高級壽司店，連劉嘉玲、吳宗憲都曾經是座上客。由行高檔路綫，變做平價壽司，堅持用料新鮮，即使街邊檔亦不影響味蕾享受。每日到魚市場揀魚入貨，食的是阿東師傅老練的手法和眼光。師傅發辦前菜是當造銀魚，醬油漬口感清新；切成細花的魷魚刺身，盡顯師傅刀工，表面爽脆，內裏軟糯，咀嚼一輪，帶有一點奶油香。仲有師傅製的玉子燒，加入山藥，口感綿密就似食緊海綿蛋糕一樣，風味和口感都有驚喜。

點擊圖片放大

至於主角壽司則沿用江戶前壽司製作方法，先醃製魚生，再以醋米飯握成壽司。8 款壽司味道毫不失望，特別愛尖梭炙過再掃上醬油提味，焦香和脂香雙重風味；赤身吞拿魚脂香滿溢，海膽甘甜美味。不過更得記者歡心，是他對一些時令魚的用心處理。好似秋刀魚先以醋調味，慢燉 4 個小時，再佐以細葱、三星漬，以清酸帶出秋刀魚的濃香。

套餐分為 204 、254 和 380 港元 3 款，200 港元的套餐，已經包 8 件壽司、刺身、蒸物和燒物。中等套餐額外多了生蠔，最貴的套餐則多了鮑魚和一份燒物，抵食。

點擊圖片放大

+9

+8