香港人最鍾意過澳門歡度小周末,任何澳門嘅新景點玩意資訊,最值得我哋關注!澳門旅遊吉祥物「麥麥」,除咗外表Cute爆,仲為遊客介紹最新最update澳門旅遊資訊!今次就送上4月更新嘅澳門5大期間限定 + 最新玩意,睇嚟又係時候去澳門玩番2日1夜喇!
1)特別展覽 +文創手作班@第七屆澳門國際旅遊(產業)博覽會
咪以為澳門的旅遊展就唔關你事,呢個「世界旅遊休閒中心」嚟緊第七屆澳門國際旅遊(產業)博覽會,展場面積由去年嘅11,000平方米大增一倍至22,000平方米,攤位亦由550個增至800個!齊集世界各地嘅參展商,食、住、行、娛樂、購物樣樣齊,優惠多之餘,大會仲準備咗好多特備展覽、表演同工作坊,介紹澳門未來旅遊新趨勢,好似舊年就有「智慧旅遊機械人」登場,唔知今年有咩新玩意呢!
澳門旅遊展其中一個特點,就係舉辦好多特別展覽,涵蓋唔同議題,好似世界大趨勢嘅美食可持續發展,仲有為慶祝澳門回歸二十周年而搞嘅《共慶回歸二十載 繽紛多彩澳門遊》特展,用咗七個部分,全面而且多角度咁展示澳門嘅豐富旅遊資源,趁住2019年係澳門回歸二十周年,一齊嚟回顧吓佢如何成為「世界旅遊休閒中心」啦!
除咗特別展覽,「文創館」都一定唔好錯過呀!澳門近年大吹文創風,手作藝文事業遍地開花,今次旅遊展大推文化旅遊,特設充滿動態文化同創意體驗嘅「文創館」,入到去,就可以搵到創意文化、手工藝同埋美食相關嘅展示同活動!仲會舉辦十幾個文創工作坊,教你DIY葡式瓷磚畫、製作澳門世遺建築物立體積木,又有保鮮花字母燈等,超豐富,參加費用只需MOP50!
info
第七屆澳門國際旅遊(產業)博覽會
公眾開放日:4月27日至28日
地點:澳門威尼斯人金光會展中心D館及E館
時間:10am-8pm
門票:現場免費派發
網址:www.mitexpo.mo
文創工作坊詳情及報名:www.mitexpo.mo/plus/list.php?tid=188
2)激新打卡點 + 燈光夜市 @ 漁人碼頭
位於澳門外港碼頭旁邊嘅漁人碼頭,分為幾個主題、裝潢勁富異國風情神話Feel,係香港旅客必定去過嘅打卡之地!剛剛於3月31日,就推出「愛。旅途 LOVE ROAD」藝文活動,在場內設立12個以「愛」作主題的大型裝置藝術,除咗方便情侶去打卡留住最Sweet一刻,仲可體驗吓澳門日益壯大嘅文創氣氛!活動中仲加插影相打卡贏餐飲住宿券等遊戲,去碰吓運氣啦!
除咗「愛。旅途 LOVE ROAD」打卡活動,4月19日開始,漁人碼頭水世界內將會舉行燈光夜市,只限周末,以懷舊澳門做主題,同大家一齊回到60、70年代!
到時唔止重現澳門60-70年代嘅街景,仲有美食、遊戲同表演等緊你!場景懷舊,配套卻是最新的,全場將使用電子支付進行交易,澳門通、支付寶都OK!
info
Love Road 愛。旅途(澳門漁人碼頭第二屆漁人節)
日期:即日起至6月30日
地點:漁人碼頭勵駿廣場、勵駿大道
Facebook:MacauFishermansWharf
澳門歡樂繽紛特色燈光夜市
日期:4月19日至8月11日
地點:漁人碼頭水世界
時間:5:30pm-10pm(星期五);5pm-10pm(星期六及日)
Facebook:澳門歡樂繽紛特色燈光夜市
3)鐵塔觀景台室外開餐 @ 澳門巴黎人
澳門係聯合國教科文組織(UNESCO)嘅「創意城市美食之都」,美食佳餚包羅萬有。嫌夜市掃街唔夠浪漫,在巴黎鐵塔下撐枱腳又如何?澳門巴黎人嘅鐵塔,已經成為澳門近年必睇夜景,唔少人仲會上埋7樓觀景台,十足去咗法國巴黎咁!而酒店方面亦好識做,再度舉行「法國品味巡禮」,等大家可以好似法國人咁,體驗法式戶外用餐咁Chill嘅享受,期間仲有Streetmosphere街頭藝人嘅精湛演出同現場樂隊表演,當然唔少得地道美食佳餚,即開生蠔、特色窩夫餅之外,仲有葡萄酒同香檳,歎住酒欣賞路氹金光大道美景,都幾爽㗎!
info
法國品味巡禮
日期:即日起至6月9日逢星期三至日
地點:澳門巴黎人巴黎鐵塔7樓
時間:4pm-10pm(星期三、四及日);4pm-12mn(星期五及六)
網址:SandsResortsMacao.com/hk/parisian-gourmet
4)澳門美食嘉年華@百老匯 2019
今年係澳門回歸祖國二十周年的大日子,唔止慶祝活動和展覽,連美食都加入慶祝行列!澳門百老匯™今年再度舉行美食嘉年華,喺嚟緊一個月入面,在百老匯美食街上呈獻超過200款本土美食、環球美饌,仲有街頭表演、DJ打碟,又有歌星助興,預料氣氛超熱鬧!
至於當中嘅重點,當然係美食檔為咗慶祝回歸20周年而特別推出嘅多款MOP20嘅優惠美食啦,今次真係大飽口福!而為咗響應環保潮流,大會將使用可分解的餐具,同時亦鼓勵客人自攜杯子、餐盒及餐具,為環保出一分力。
info
澳門美食嘉年華@百老匯
日期:4月19日至5月19日逢星期五、六及日
地點:澳門百老匯美食街
時間:5pm開始
電話: +853 8883 3338
網址: broadwaymacau.com.mo
5)公投靚景地標 @ 澳門新八景
來澳門不止食食食,睇靚景影靚相亦係重要一環!2019年係澳門回歸二十週年嘅大日子,城內將有大量慶祝活動,其中一個就係「澳門新八景」!
經過差不多2個月嘅公投活動,澳門居民同一眾網民已經選出咗心目中的新八景,結果亦已於3月29日公布,分別係:西望洋山、兩湖一塔、議事亭前地、龍爪角、路環漁村、戀愛巷、福隆新街及港珠澳大橋,有經典景點,亦有新興地標!就趁住呢個機會,去澳門遊歷新八景,打卡留念啦!
info
澳門新八景網址:new8spots.org.mo
資料由澳門旅遊局提供
↓ 大灣區一小時生活圈!最新打卡熱點/熱門美食等!↓
↓立即睇打卡熱點/地道隱世美食/必買手信等!↓