講到旅遊好多人要求越嚟越高,唔單對物質享受有要求,仲追求「旅遊體驗」。如果一個地方集自然、文化同美食三重體驗於一身,唔知你會諗起邊個地方呢?位於日本四國東部嘅德島縣必定係最佳選擇之一啦!當地有日本三大秘境之一嘅「祖谷溪」同世界三大潮流之一嘅「鳴門渦潮」,兩樣都係震撼壯觀嘅自然美景;又有日本嘅傳統藝能「阿波舞」同獲選為東京奧運會徽顏色嘅「德島藍染」工藝,有獨一無二嘅地道文化體驗;最後當然唔少得美食,包括阿波牛、鳴門鯛、德島拉麵等等,可以大飽口福。
即日起至2019年3月30日,國泰港龍仲會喺每周三同周六設香港往返德島嘅直航機,啱晒趁假期去返轉德島遊,舊城町下,小橋流水,夠晒寫意!
德島獨特地貌 造就罕見美景
由於德島縣三面都被1000米高山包圍,形成其別樹一格嘅自然美景,當地德島鳴門地區、阿南海岸地區以及劍山、祖谷地區等都係欣賞自然景觀絕佳地點。其中全長約10公里嘅祖谷溪係日本三大秘境之一,由於高低起伏差大,造就出大量獨特景觀,其與世隔絕嘅深山景觀仲被列為德島88景。當地仲有溫泉酒店,正好俾遊客喺世外桃園享受一番。
德島其中一個最人氣景點就係世界三大潮流之一嘅「鳴門渦潮」,海上漩渦位於德島縣鳴門市最東端,最大時的直徑達20米。隨住每日兩次潮夕漲退,會出現兩輪漩渦。想睇距離睇到漩渦,可以坐觀潮船,想親眼睇到大漩渦,記得要留意天氣同時間啦!
祖谷溪獨特嘅地勢,令當地深山美景處處別具特色。
阿波舞發源地 體驗傳統東瀛文化
有超過400年歷史阿波舞係日本最知名嘅傳統藝術表演之一,配合樂器二拍子嘅旋律,特徵係豪邁嘅男性舞蹈及優美嘅女性舞蹈。德島正正係阿波舞嘅發源地,當地嘅阿波舞亦最具規模,每年8月至9月都會喺全縣各地有阿波舞活動,係感受地道阿波舞嘅好時機。
講到德島特產同手工藝,不可不提有「JAPAN BLUE」美譽嘅「德島藍染」又稱「阿波藍」。德島盛產藍色染料也與當地自然環境有關,其吉野川流域是蓼藍種植帶,盛產天然染料令當地藍染工房格外發達。想體驗德島舊日風情同傳統工藝,不妨走一轉「藍住町」,當地嘅「藍之館」,可以親手染出獨一無二嘅「阿波藍」作品。
德島作為阿波舞起源地,有全日本最大規模嘅阿波舞表演。
德島特產黑毛和牛-阿波牛
旅遊體驗當然唔少得美食,德島同樣有好選擇。當地盛產嘅黑毛和牛稱為「阿波牛」,其血統同養育規格極為嚴緊,被評為最上乘的5級牛肉。其紅肉同脂肪分布均勻,口感鮮嫩多汁,比起神戶牛都唔輸蝕。
此外,德島拉麵都係令人一試難忘嘅美食,其特色係用口感較軟嘅中細麵配上濃郁醬汁熬煮嘅豬肉片,湯底出名超濃厚,仲分為「茶系」、「黃系」、「白系」三款。當中以「茶系」最濃,配上生雞蛋更添鮮美柔順,別具滋味。
被評為5級牛肉的阿波牛,紅肉與脂肪分布平均,口感柔軟帶微微甘甜。
以湯底濃厚最為知名嘅德島拉麵,配上入味嘅肋肉片,令人一試難忘。
有關在德島阿波舞機場派發優惠券等資訊,可參閱以下網址︰
https://www.pref.tokushima.lg.jp/ippannokata/kyoiku/kanko/5024148/
資料由客戶提供
↓透過發佈帖文賺取收入!立即參加!↓
↓立即睇打卡熱點/地道美食/住宿指南等!↓