九州名勝熊本城雖然仍在修復，遊客暫時未能一覽全貌。不過熊本地區，甚至九州其他地區如福岡博多也是港人熱門旅遊點。行程到訪門司港的唐戶市場、博多一番街購物/品嚐美食更到了長崎的稻佐山看日本三大夜景，十分豐富！接著會到九州自由行的人士不妨參考！
Day 1
由於想好好的休息兼享受假期，所以選擇了中午的時間坐飛機，13:05機，不過選擇得HKExpress就必須預「一分錢一分貨」，上機之後delay了兩個小時... 最後日本時間7點多才到達福岡機場。
福岡機場唔算大，入境都唔算等太耐，大概半個鐘就完成哂。出左黎之後，要搭10分鐘的免費接駁巴士由國際線既terminal轉去日本內陸線既terminal，之後轉搭地鐵。地鐵搭兩個站就到博多站喇，承惠¥260。好方便！
博多站超級大，出閘後上一層就會見到辦理JR PASS既地方。因為已經係旁晚，完全唔洗排隊。我地係喺飛機上買5日的北九州JR PASS，即日要係呢到換返做正式個張。因為今日已經唔會再去邊到喇，所以我地選擇左聽日先開始用張JR PASS。博多站其實好多商場地下街可以行，不過我地太餓喇，係對面既牛角包店買返個牛角包食先！呢間好出名架，好多人都會特登黎排隊買。
有三隻味，我地每樣買一隻試下，¥170，好香，唔算好甜，咬落去個牛角包面係脆的，入面好鬆軟。不過我唔係好知係邊三隻味，原味、朱古力味、焦糖味(?)。
我地book既airbnb就係博多站隔離5分鐘既路程。保安唔錯啊，用鎖鑰先會開既自動門。(我地企係到研究左好耐點開) 入到屋都好寬敞，兩個人既gip都可以打得開，仲有sofa同茶几。廁所同浴室係分開的，咁就唔洗爭喇！
放底行李，立即落返樓揾野食！行返近博多站有一條夜市街(我自己命名的)，有別於其他舖頭，呢到啲食店都開到12:00am-1:00am既！第一餐，求其行入一間試下先！坐低已經係10點幾，無中英文餐牌，我地唯有靠翻譯功能得3成既google translate幫下我地，再加上看圖識字既天生本領去叫野食，結果，係好好味既！
Day 2
話明九州係以休閒式為主，當然要瞓到自然醒！11:45am先出門口是常識吧，放鬆一點不必跑景點。博多地下有條博多一番街，壽司拉麵等等都有得食，我地揀左最後個間，食蕎麥麵。一早唔想食肉又唔想食太多，叫左個温泉蛋冷蕎麥麵。不過我見隔離啲叔叔全部都係叫一個set，又蕎麥麵又飯咁，好似好好食但真係見到都覺飽。
第一個景點就去門司港！show一show張JR PASS俾車站職員睇，輕鬆入閘。無直車去到，所以要係小倉轉車去門司港。但係JR PASS唔包博多去小倉既快車，唯有坐慢啲既，兩個鐘就到門司港喇。
呢到係一個小漁港，沿著海邊行有風好舒服，不過真係萬里無雲，曬到喊....好似去左第二個城市咁，係條街到見到既人唔多過10個。有好靚既歐陸風建築物，有舊大阪商船大樓、舊門司海關大樓等。因為以前係對外的關口，好多建築物都有歐洲典型的建築風格，木材為主要建築物料。
嗯...就係可以中間打開、升降俾船隻經過的索道橋，我就覺得佢既作用係為左襯托個海。門司港唯一的商場，有色彩繽紛的外牆，加上放於岸邊的椅桌，好有歐洲度假既感覺。商場有少量食店同賣手信既地方。然後，我發現我根本唔係想黎呢到，我係想去對面岸的唐户市場到食魚生。拿拿林問下日本叔叔點樣去，原來係返火車站隔離既碼頭到搭船去。我地行左成個圈先發現....於是快啲趕過去碼頭，係售票機到買兩張來回船票，等左一陣就有船喇！
搭5分鐘就去到對面岸喇，望一望右手邊，就係我地既真正目的地 -- 唐户市場！
沿路見到馬騮表演
但係.... 無做足功課既我地，又再一次發現自己好垃圾.... 因為... 已經過左3點... 人地已經收！哂！檔！喇！
望住空空如也既市場，見到新鮮既魚係個養魚排到跳下跳下，卻無辦法食到即劏即食既魚生實在係好痛苦.... 唯有，係市場一樓既迴轉壽司舖食返餐壽司補償我地心靈上既損失。
食飽飽就搭返船去門司港再轉火車去到小倉。小倉同門司港其實好近，15-20分鐘，但係感覺係由小鄉村一下跳到大城市。甫行出火車站，四面都是四通八達的行人天橋，連接不同的大型商場。由於係放工時間，滿街都係人，我地就隨意走入商場逛逛，好多都做緊優惠，立即買下心頭好！
大概夜晚9點半，商場都關門，我地就搭火車博多，返到去都已經夜晚11點，又係時候食野係咪覺得我地既食飯時間好怪。又去返博多站隔離既夜市街，今次試試串燒！再一次唔知餐牌寫咩，淨係見到眼前一串串串好既串燒好吸引，於是就叫左一個雜錦併盤。
未有串燒之前，佢會送上每人一盤菜。落左少少酸味味的汁，好開胃，應該係俾你中和下，等你食串燒無咁熱氣。10分鐘後有野食嚕！一大盤有好多種肉同菜，我最鍾意食燒茄子同燒雞肉丸！一流！我估呢到應該係宵夜聖地，去到零晨都仲不段有人入黎食野，叫杯酒食幾串串燒傾個痛快，好熱鬧好地道！唯一唔好處就係，日本的餐廳係可以食煙既，雖然唔係好臭，但有時都會有啲怕怕。
Day 3
雖然熊本在2016年經過6.4與7.3級地震，造成嚴重破壞，熊本著名古蹟熊本城亦嚴重倒塌，但既然一場來到，當然要到熊本城一探究竟，順便打個卡。由博多去熊本可以使用JR PASS 乘搭新幹線，只需一小時左右就到達熊本啦！
早上，我們先去博多站預訂指定席。五日券的JR PASS指定席上限為16次，不過其實也可以乘搭非指定席的，非指定席不限次數，但遇上人多的時候就可能沒有位置坐。至於我們預訂指定席，是為了確保有該班列車，雖然日本我列車服務很準確，不像歐洲的隨意改動。預訂好指定席，我們去買早餐，博多站有很多賣便當的店，看著很吸引，太多選擇了，有選擇困難症啊！
到達熊本！一出車站碰巧遇見一個免費的活動，大概類似是夏祭吧！朋友說要挑戰！一大塊冰，有各種方法把冰溶掉拿出熊本著名點心。反正是悠閒的旅程，入鄉隨俗一下，與當地的學生一同努力溶掉冰塊！
YEAH~ 拿到了！手都變紅... 不過大太陽下又不怕了，有冰涼的手~ 玩完了，就要出發去看熊本城了！在熊本車站外就有熊本市電，若會在當天乘搭3次或以上的，可買熊本市電一日劵，我們不知道接下來的行程，就只買單程的。乘熊本市電A系統，在花畑町下車，下車前投幣就可以了，亦有找換機，不用擔心沒有散紙。下車後，跟著指示走，好快就見到熊本城了！可惜只能遠眺。
不能進熊本城，但旁邊的城彩苑仍然開放，有讓您親身感受熊本歷史的「熊本今昔物語」，亦有一些小商店，打卡好地方
城彩苑不大，所以我們在附近走走，見到有神社的指示方向牌，就決定去看看。沿路見到有Minions的活動，好可愛！
天氣很熱又正值正午，好曬。不過其實一直都在熊本城的外圍走，所以都可以見到部分熊本城，不過好多都倒塌了。走了大約20分鐘，到了加藤神社！雖然加藤神社不算大，但來這裡就可以了解多一點武將加藤清正 / 清正公和熊本城的歷史了！
歷史探索完畢，是時候行街食飯了！在熊本城附近，走大約10分鐘就可以到達最多人去的上下通町！我們沒有特定的目標，所以就隨意走走，發現有好多特價貨品啊~ 女孩的品味每個人都不一樣我就不詳細介紹啦~
午餐隨意走到一間平價點的面食店。
晚餐吃的生魚片，每天必吃吞拿魚！
Day 4
本來打算去九州最有名的啊蘇火山，可惜地震後有部份鐵路關閉了，交通太不方便，我們便改為到九十九島去，來一個小郊遊！由博多出發至佐世保大約需要兩小時，又是JR Pass大派用場的時候！要長途跋涉，當然要買日本的飯團上車作我的中午餐啦！
佐世保不是熱門的旅遊區，甫走出車站有一種寧靜小社區的感覺。要到九十九島，在佐世保站要轉巴士，很容易找到的，一走出車站就可以看見有一條隊伍。
上車拿整理券，我拿的是11號，巴士螢幕會顯示下車時該付多少錢。
大概10分鐘就到了海邊，立即去買遊覽九十九島的船票！遊覽九十九島可乘珍珠皇后號或海王號，路線和時間會不一樣。我們選的是紅色的海賊船 ﹣海王號！
登船時會借海賊的服飾道具讓我們站在佈景板前拍照，我們當然要自拍一下啦（買他們照的相很貴）海王號上有很多打卡位，未開船時我們當然把握時間拍照！見到大部份都是家庭的組合，也有很多日本人，反而外地遊客只有大概十個。
開船了！好多人都會問，九十九島就是有九十九個島嗎，其實並不是！九十九島只是形容有很多個小島，至2001年有義工做統計，這區域應該有208個島。數字我沒太大興趣哈哈，我只在意它的莊麗景色。
海王號上有賣飲品和紀念品的小商店，亦有室內有冷氣的位置可以休息。海王號十分適合小朋友來玩，在開船的時候扮演海盜的工作人員會給小朋友派活動工作紙，快回程的時候會再集合對答案。雖然聽不懂他們的內容，但見小朋友們都很勇躍，會齊齊大聲讀出答案，很可愛呢！
海王號依路線走一圈，途中會向其中一個島靠近，可以近距離欣賞島上的奇石。
大概50分鐘就完結了。我們轉而在山上欣賞九十九島！九十九島有3個展望台，但都有點距離，需要的士才去到。我們這次選擇到石岳展望台，的士大概坐10分鐘，由於很難在展望台再找的士，的士停在那裡等我們，我們便快快地拍個照，深呼吸一下大自然的氣味，就坐的士回到碼頭了。
吃過飯，我們坐巴士回到佐世保車站，準備坐鐵路到長崎！我們的行程很隨意，應該沒什麼人會像我們般趕到長崎只為看一下長崎的夜景lol到長崎又需要2個小時的車程，正好讓我們休息一下，上午太曬了。長崎有著三面環山、臨望港灣的絕佳地理位置與獨特山海景致，所以其稻佐山夜景更有「日本三大夜景」與「世界三大夜景」雙頭銜！（不過其實香港也是「世界三大夜景」之一）
到達長崎的JR車站，可以先到綜合觀光案內所買纜車的票，因為會比較便宜。其實有免費的接駁車到由JR車站開至纜車站的，也可以在綜合觀光案內所劃位。可是我們時間太晚了，沒有位置，唯有坐巴士去。到長崎的JR車站外面就是巴士站，3號或4號的巴士都可以去到，在「ロープウェイ前」站下車即可抵達，大約10分鐘車程。
下車後會覺得很奇怪，因為下車的地方就像隨便都見到的小社區，若不是見到往纜車站的指示牌，還以為我們下錯車。大約走3分鐘，就會到達一個神社，原來纜車站是在静謐的淵神社內。
遊客不多，等一下就可以上纜車了。纜車的空間不太大，大概可載20人。搭乘纜車上山，沿途就可以清楚看見長崎港灣以及環山地形。纜車上其實有一個日本女仔在作簡介的，但⋯⋯聽不明的，日本的自我本土意識真的很強。
下纜車後，便可以順著指示牌到「稻佐山山頂展望台」。展望台是一棟圓形玻璃建築，二樓是觀景餐廳，我們可沿著螺旋階梯，或在沿著圓形玻璃建築內而建的斜路，慢慢走上頂部展望台，沿途欣賞不同視野的美景！頂部展望台一早已經有很多人在等候，有很多人放定了專業的相機，為要拍下太陽落山的一刻。由淺粉紅轉至紫藍、深藍的漸層天空。入夜後變為萬家燈火。與香港的夜景是不一樣的，後太平山頂望下去的是高樓大廈，是繁榮的感覺。而稻佐山望下去的是碼頭，是平房，是安穩生活的感覺。
因為我們要趕回博多的JR，所以在入夜後欣賞了半小時後，就要坐纜車回去了。幸好沒有人潮，若果再晚一點才離開，應該會有長長的排隊隊伍了！我們的月份正是日本的夏祭，每日都有不同的地方會放煙花，我們踫巧遇到當天在長崎的夏祭，在纜車上可以欣賞到煙花呢！
Day 5-6
最後兩天的行程當然要留來血拼！博多前往天神地下街只需要3個站，交通十分便利，買了太多戰利品的話，可以先回民宿休息一下，再乘15分鐘的地鐵來個round 2！天神是九州最大的商圈，天神地下街全長約600公尺貫穿南北。1~12號街中有流行服飾店、美食店、書店等150多家店面。
地下街模仿19世紀歐洲風格，地板以石磚舖製，天花板設計成藤蔓纏繞的圖形等等。無論天氣是大太陽或是狂風暴雨，都無損行街的心情！
每個人都有不同的購物心得，這裡的店舖我就不多作介紹了，因為我比較喜歡的都是小商店，只能說我們兩個90後女孩由上午12時一直逛街到傍晚，差點都忘記了要吃飯。在天神地下街，逛到累了必吃這個BAKE CHEESE TART半熟芝士撻作下午茶！
BAKE CHEESE TART由北海道起家，已經有30年的歷史，遠遠就能被芝士撻的香味吸引，走近一點，就會發現灰色x黃色的舖面十分搶眼！灰色的牆身加上以金黃色的外賣盒拼湊的特色牆，再加上透明玻璃櫃裡佈滿黃金色帶點微焦的半熟芝士撻，只是看著都已經流口水了！雖然店舖外長期都有一人龍，但不用太擔心，大概15分鐘就可以排到了！可以買一件作下午茶，亦可以買一盒6隻會便宜一點，每人最多可買12隻啊。
逛完一整日，回到AirBnB休息一下，在附近吃個拉面(隨便到任何一間拉面都很好吃的)，之後再到博多站買手信。雖然可能價錢不是最便宜的，但博多站的手信種類廣，各式各樣的禮盒任君選擇。
最後自私介紹最喜歡的Mister Donut。從 1971 年 Mister Donut 在日本登陸開始，讓顧客品嚐多樣化而且豐富的甜甜圈種類。
而我個人最喜歡的就是QQ 口感的甜甜圈 -- 波堤系列！是像麻糬般的 QQ 口感！每天吃一個不夠，還要買一堆回家去，若果香港也有分店就好了....
原文連結
去到邊 Share到邊～立即記錄您的生活足跡！
↓ 照顧哂您成個護膚程序！打造亮白光感肌！ ↓
utravel
發表回應