【旅遊大計】 2018 出遊攻略 打工仔召集!

2018.01.04
文 : U Magazine
2018.01.04

【2018請假攻略 自製悠長假期!】


政府公布咗 2018 年嘅公眾假期,發現嚟緊 2018 年比起今年有較多長假期,打工仔們有望可以 plan 番個 long vacation 啦!點請假法?即刻睇睇!

2018 年當中,有 10 個月都有假期,只有 8 月、11 月無假放,聽落都幾爽~鍾意去日韓台嘅朋友,今年都幾多機會,連 3 日快閃團都無問題,大家可放心去搶平機票!

把握3個放長假時機

最正嘅係,2018 年有 3 大悠長假期,大約每 3 個月就有一個,超讚!首先係 3 月尾 4 月頭嘅復活 + 清明,只需請 3 日就可以連續放 10 日;另一個就喺 9 月尾 10 月頭嘅中秋 + 國慶,請 4 日就可放 10 日;最後喺 12 月尾 1 月頭,請 4 放 11!我哋呢班打工仔,終於有假去遠啲地方如澳洲歐洲美加等國家啦!

要快啲同親朋好友度定假期先!


【年度注目出遊大事】


不知不覺,原來咁快就到 2018 年,咁又一年喇?係時候度定去邊玩,為身心叉叉電,先有心情繼續被勞役(笑)。以下搜羅不同界別人士需要之 2018 旅遊雞精攻略,樂園迷有各地 theme park 新事速報;熱愛體育嘅你,自然不能錯過平昌冬奧及四年一度世界盃;鍾意出海,必須留意幾隻航海界巨輪;想探索當地文化,又有乜必遊城市?仲有 2018 注目酒店情報,等咩?仲唔嗱嗱聲請假?

【樂園迷 看過來!】
#01 東京迪士尼 35 歲大壽 15/4 開始


由 1983 年開始營運的東京迪士尼,同 80 後一同長大,出年 4 月 15 日,就 35 歲啦!直至 2019 年 3 月 25 日為止,全年都會舉辦名為「Happiest Celebration!」的慶祝活動,除了有全新 Day parade「Dreaming Up!」(終於要換走 30 周年慶祝之「Happiness is Here」),全新晚間城堡 Show,小小世界亦翻新開幕,加入 40 幾個迪士尼角色,唔再只得一樣樣嘅世界村小朋友娃娃;Disney Sea 方面亦不輸蝕將會有全新水上表演、而且 2019 年 1 月 11 日開始更會有 Pixar 特別活動登場,仲有全新 Duffy 活動,暫時情報仲未解禁,但已經預見到有幾熱鬧開心!

Disney Sea 會有全新水上表演,Duffy 有份出場,唔少得上位新星 Stella Lou。
35 周年 parade「Dreaming Up!」,加入《美女與野獸》、《小飛俠》以及首次登場的《BIG HERO 6》角色,好想見到 Bay Max 呀!
用了一年時間完成翻新的「小小世界」,全新 40 個角色包括近年最得寵《Frozen》 Elsa、Anna、Olaf,以及 Cinderella、花木蘭、獅子王等經典。以後玩小小世界唔怕悶啦。
腳板底寫上 35 周年限定的米奇公仔襟章,2,400 日圓(約 165 港元)

35 周年開幕前紀念 goods

小汽車模型,車頂有紀念 Logo,1,200 日圓(約 83 港元)
Paradise Pier 改名為 Pixar Pier,加入 toy story 及 Inside Out 區,成為 Pixar 迷天堂。

35 周年 opening soon 限定紀念商品
發售日期:2018 年 2 月 10 日

東京迪士尼 35 周年慶「Happiest Celebration!」
日期:2018 年 4 月 15 日至 2019 年 3 月 25 日
活動:Disneyland ---- 全新巡遊「Dreaming Up!」、翻新登場「小小世界」(同於 4 月 15 日開始);全新晚間投影 show「Celebrate! Tokyo Disneyland」( 7 月 10 日開始);奧爾良劇場全新娛樂表演(7 月 10 日開始)/ Disney Sea-----船塢邊舞台全新娛樂表演(7 月 10 日開始);pixar 主題特別活動及 Duffy 特別活動(2019 年 1 月 11 日至 3 月 25 日)


#02 Pixar 迷福音 加洲迪士尼新園區 13/4 開幕

Pixar 出品動畫,必屬佳品,難得大人細路都可以睇到又感動又開心,吸納一班 Pixar 死忠 fans。2018 年 fans 們就要儲定彈藥去美國啦,事緣加州迪士尼樂園的 California Adventure Park,其中 Paradise Pier 區域將會在 4 月起改裝為 Pixar Pier 登場,除了推出 4 個 Pixar 主題設施,以《超人特攻隊》、《Toy Story》及《Inside out》為主題,當然亦不少得主題精品、美食等。而為了改裝,部分設施皆為於 1 月 8 日開始暫停營運,準備暑假以新 look 見人,如原本的《California Screamin》過山車將會改裝為《Incredicoaster》。


園區還會有 Inside Out Theme Ride,會唔會重演返乒乓,阿樂同阿愁嘅一段歷險呢?
《超人特攻隊》過山車「Incredicoaster」,配合明年第 2 集電影上映,於明年夏天登場,玩家可以體驗同超人一家一齊捉返 BB Jack Jack。
4 月 13 日仲會有期間限定的 Pixar 嘉年華,園區會有以 Pixar 為主題的全新煙花 show「Together Forever」使用投影技術,更會上映巴斯光年飛過睡公主城堡一幕!另外還有「Pixar Play Parade」,其中 Pixar 台燈、《Up》及《Iniside Out》角色都會登場。
而加洲迪士尼最 Iconic 的 Mickey's Fun Wheel,米奇頭雖然被保留,但 24 架摩天輪車卡,則會塗上 24 位彼思動畫角色。邊 24 位有份被選中,私心希望有勞蘇同卡叔。

Pixar Fest
日期:4 月 13 日至未定

#03 Marvel 英雄雲集巴黎迪士尼 10/6 開始

迪士尼迷真係好忙!2018 年暑假 Iron Man、雷神,美國隊長、星爵等會齊齊現身巴黎迪士尼,10 月起其中一間園內酒店 Hotel New York,亦會開始裝修,改建為以 Stark Tower 為藍本的 Marvel 主題酒店,預計 2020 年開幕。

雖然未有新表演情報流出,起碼捉住英雄們影張相是基本玩法。

Marvel's Summer of Superheroes 
日期:6月 10 日至 9 月 30日


#04 海外首個姆明主題樂園 2018 秋開幕

姆明首個芬蘭以外主題樂園,名為「Metsä」(芬蘭語即森林),選址埼玉縣飯能市宮澤湖旁,將會有兩個主題區,Metsä Village 及 Moomin Valley Park,兩年前已經開始宣傳,剛剛宣布 2018 年秋天 Metsä  Village 將會率先開幕,會有在地野菜及工藝品市集等。而 Moonmin Vally Park 除了有姆明小屋、動畫場景,遊樂設施,還有餐廳及精品店,不過就要等到 2019 年春天先有得親眼睇到啦。

Metsä 佔地幾乎有 5 個東京巨蛋咁大,圍繞住宮澤湖的森林,非常適合重現姆明谷場景。
Metsä Village 可以體驗北歐 Life style,而且是免費入場。
水邊小屋搵史力奇、去姆明小屋探姆明,實現兒時夢想。
齋睇預想圖都感覺到樂園的治癒感。

Metsä メッツァ
開幕日期:Metsä Village 2018 年秋天,Moomin Valley Park 2019 春天

#05 名古屋 Legoland 酒店 28/4 開幕

2017年 4 月才開幕的日本 Legoland,園區比想像中細令不少人頗為失望,不過出年 4 月園方將在區內新增 Legoland Japan Hotel,將樂園升格為「Legoland Japan Resort」,大大增加吸引力。 酒店共 8 層共 252 間客房,每層分不同主題如海盜、忍者等,更有小朋友專用嬉水區,創意工作坊等。酒店內更併設水族館「Sealife Nagoya」,標榜為「睇得又摸得」的體驗水族館,館內裝飾更會以日本民間傳說為設計。

外觀望落同馬拉西亞 Lego Hotel 差不多。
Sealife Nagoya 加入不少日本元素,如拱型隧道會有浦島太郎坐住烏龜出現。
水族館內會有 Lego 探險家陪你探索。

名古屋 Legoland Hotel
地址:日本 愛知県名古屋市港區金城 ふ頭 2-7-1
房價:4 人房連早餐 3,1000 日圓起(約 214 港元)
交通:名古屋站乘あなみ線至金城ふ頭駅直連

Sealife Nagoya
開幕日期:2018 年 4 月 15 日
電話:+81 (0) 50 5840 0505

#06 去 USJ 見美少女戰士 19/1 開始

大阪 USJ 自 2015 年開始的「Cool Japan」,每年都找來人氣作品加盟,今年來到第 4 年,除了繼續有柯南與 Monster Hunter,加入國民級遊戲 Final Fantasy 的 VR 過山車,更首次 crossover 少女漫畫,仲要係近兩年因 25 周年紀念人氣急升的 Sailor Moon!取代去年的 4D 哥斯拉影院,上演 Sailor Moon The Miricle 4-D,遊客可以睇到經典變身場面等,當然唔少得大量美食精品,以及美少女戰士 Photo Spot。

雖然 Cool Japan 活動 1 月 19 日就開始,4D 影院明年 3 月 16 日至 6 月 24 日開始。
新月麵包、露娜栗米湯,變身器蛋糕……要入手肯定大排長龍呀。
有 Backdrop 可以同 5 位主角影靚相,實現兒時夢想。

Universal Cool Japan 2018
日期:1 月 19 日至 6 月 24 日(名偵探柯南 Mystery Restaurant 為 2 月 1 日至 3 月20 日,Sailor Moon 4D Theater 為 3 月 16 日起至活動結束)
活動:「Final Fantasy XR Ride」、「名偵探柯南 THE ESCAPE」、「名偵探柯南 Mystery Challenge」、「名偵探柯南 Mystery Restaurant」、「Monster Hunter The Real」、「美少女戰士 Sailor Moon The Miracle 4-D」
網址:www.usj.co.jp


【好動兒注意】

#07 2018 直入江原道睇冬奧


韓國連續 3 次申辦冬奧,終於守得雲開,成功奪得 2018 冬奧主辦權 ,在江原道平昌舉辦為期 17 日的冬季奧運會。想現場睇一班選手玩冰壺、俯式冰橇等平時難得一見的體育項目,明年 2 月就是好機會!韓國政府亦相當隆重其事,除了為冬奧建設宣傳館,配合冬奧,開通 KTX 京江綫列車,由首爾站往江原道江陵站只需 1 小時 45 分鐘,比起以前坐普通火車要 6 個鐘,慳返好多時間。即使唔睇奧運,從此去江原道景點亦快好多!

宣傳館為不同項目選手製作得意公仔,比大家認識認識。
宣傳館外有 soohorang 及 Bandabi 黑熊迎客。
館內有得做吓樣試玩冰上曲棍球等,4D 影院感受滑雪感覺,亦可以留下為運動員打氣的 Postcards。

2018 平昌冬季奧運宣傳館
地址:강원도 강릉시 난설헌로 131
開放時間:10am - 7pm;夏季為 11am - 8pm;星期一休息

平昌的 Alpensia 滑行中心可以睇晒各式雪橇及冰橇比賽。
無舵雪橇、俯式雪橇都是平時看不到的罕有項目。
京江線使用最新列車 EMU,時速達 260 km!
江原道近年大 hit 景點,當然要數《鬼怪》注文津海邊,經典場景影返張相呃 Like 吧。

2018 冬季奧運
日期:2018年 2 月 9 至 25 日
舉辦地點:韓國 平晶高山體育園區、江陵海岸體育園區
票價:開幕禮由 220,000 韓圜至 1,500,000 韓圜不等(約 1,596 港元至 10,881 港元),閉幕禮至 950,000 韓圜(約 6,892 港元);各項運動比賽由 20,000 韓圜起(約 145 港元)

KTX 預約網址:www.letskorail.com


#08 俄羅斯世界盃 睇美斯封王?

今屆世界盃事隔 12 年再次在歐洲國家舉辦,於俄羅斯國內 11 個城巿舉行,除了旅遊熱點莫斯科及聖彼得堡等,亦有一些平時未必會踏足的城市如喀山,與斯維亞日斯克島頗為接近,島上之聖母升天大教堂及修道院今年被列入世界遺產,睇波之餘,可以來個日歸睇埋世遺。去年美斯曾表示退出國家隊,當時馬勒當拿出動開口挽留,稱美斯有望 2018 世界盃封王。想見證球王誕生,即刻搶飛呀要。
首場及尾場賽事會在西南方莫斯科的盧日尼基體育場舉行。
預選賽阿根廷險遭淘汰,憑美斯大施帽子戲法絕地求生,成功取得入場券。
聖母升天大教堂白色外牆冬天配合雪地更靚。
俄羅斯前足球選手 Evgeny Savin 當日亦有現身頂下波造勢。
莫斯科上星期率先在紅場附近之 Central Children's Store 開設 Fifa 官方店鋪,開賣今年之紀念品。
除了各款波衫,店裡充滿世界盃吉祥物 Zabivaka(即 shooter)狼精品。

2018 世界盃
舉辦日期:6 月 14 -7 月 15 日
舉辦地點:莫斯科
票價:首場從 220 美元至 3,200 美元(約 1,720 港元至 25,012 港元);尾場則由 455 美元至 7,040 美元(約 3,479 港元至 55,041 港元);其餘賽事由 115 美元起(約 899 港元)
網址:www.fifa.com


【豪歎郵輪】
#09 全球最大郵輪海洋交響號 21/4 首航

近幾年郵輪界年年都有矚目新船登場,如皇家加勒比郵輪,數年來相繼推出新船打倒昨天的我,明年 4 月推出海洋交響號,今次唔止打破自己紀錄,更打破世界紀錄,成為全球最大郵輪,排水量達 23 萬噸,可戴 6,780 人,為海上娛樂霸王!最大亮點要數海上最高滑梯 The Ultimate Abyss,10 層高滑梯挑戰膽量;船上設施主打一家大細,推出新世代家庭套房,以及一系列啱晒後生仔的電玩運動酒吧、激光槍競賽、密室逃脫遊戲等。

船上中央最誇張滑梯 The Ultimate Abyss,45 米高,由頂滑到底要 13.14 秒。
唔敢玩最高滑梯,亦可以挑戰「完美風暴」三大滑水道。

海洋交響號
價格:7 晚西地中海之旅 7,586 港元起

#10 Eco Friendly 極地郵輪  11 月首航

一直好想去南極探企鵝,但同時又擔心會影響南極生態?11 月將落水的 Ms Roald Amunsden,船內設計盡量採用大自然原材料,而且是全世界第一艘採用混能技術之極地探險船,使用電池發電,減少二氧化碳排放。 航綫主要以南美洲及南極圈為主,將會通過著名的德雷克海峽前往南極,及福克蘭群島等。
遊輪名字以第一支到達南極的極地探險家 Roald Amunsden 名字命名,向其致敬。
船上有 excursion 可參加,可嘗試在冰塊之間划獨木舟穿梭。

Ms Roald Amunsden
啟航日期:2018 年 11 月


#11 神奇海上魔毯 2018 年12 月首航

Celebrity Edge 是第一艘以 3D 立體科技設計之郵輪,整架郵輪充滿未來感,其中最注目為由負責設計杜拜帆船酒店的設計師 Tom Wright 設計之「Magic Carpet」,可把平台隨時升降化身 infinity 海景餐廳,或上客用平台,十分破格!

齋睇舺板都知非常識嘆。
郵輪上的「Magic Carpet」為可升降娛樂設施,升升降降不同層數,就可作不同場地使用。

Celebrity Edge
啟航日期:2018 年 12 月


【藝文青留意】
#12 戲迷塞維亞 LP 2018 旅遊城市第一位

塞維亞(Seville)是西班牙第四大城市,曾經是重要港口,亦是鬥牛、 佛朗明哥舞發源地,文化氣息濃厚,古城建築處處,成為不少電影取景地,如星球大戰及近年爆紅的神劇《Game of Thrones》,12 月更將會舉行歐洲電影獎頒獎禮,電影發燒友必到。

結合歐洲與伊斯蘭文化的塞維亞王宮,《Game of Thrones》等五季就曾在此地拍攝,少女庭院(Platio de las Doncellas)可以欣賞到其雕工。

塞維亞王宮
地址:Patio de Banderas, s/n. 41004 - Sevilla
開放時間:冬季 9:30am - 5pm,夏季 9:30am - 7pm
門票:9.5 歐元(約 88 港元)


#13 創意墨西哥 2018 設計之都

墨西哥被選為 2018 年設計之都,為首次有美洲地區入選,今年主題為社會責任設計,全年有大量展覽如 2 月有現代藝術展 Material Art Fair,4 月有 Condo Fair,10 月則有第 8 年墨西哥設計周,再加上本身墨西哥城內 Art Museum 等亦會有活動舉辦,整個城市創意力爆發。難怪入選《Travel+Leisure》選出之 50 個必去城市。

去年 design week 遇上地震,會期延遲,今年再加上設計之都活動,如亂世後用創意治癒社會。

Condo Fair
Material Art Fair
2018 設計之都
網址:wdo.org


#14 新航綫 直飛歐美

香港航空繼 12 月頭開通來往洛杉磯航綫,明年 3 月 亦會新增直航三藩市航綫,而國泰同期 3 月起會陸續推出直航歐洲城市航線,由香港出發至布魯塞爾、都柏林及哥本哈根 3 地,更會於 9 月新增香港首次直航華盛頓航班,搭足 17 個鐘,橫跨 8,154 英里,為全世界第 12 長的航程。

9 月直飛華盛頓,雖然錯過了櫻花季,但在 Tidal Basin 還是可以賞紅葉。

國泰航空 2018 年國際新航綫
3 月 25 日起:香港至布魯塞爾
6 月 2 日起:香港至愛爾蘭都柏林
5 月 2 日至10 月12 日:香港至丹麥哥本哈根 
9 月 15 日起:香港至華盛頓 
票價:華盛頓 4,430 港元起(未連稅)

香港航空 2018 年新航綫
3 月 25 日:首航來往三藩市
票價:4,220 港元起


【2018 注目新酒店】
#15 全球首間無印酒店 MUJI Hotel Shenzhen 18/1開幕

講咗好耐的全球首間無印良品酒店,終於面世,選址深圳深業上城,而下一間則會開設在北京,反而自己地頭日本,則要到 2019 年才會開設於銀座。 對熱愛簡約風的旅人來說,無印良品酒店自然十分吸引,標榜合理價錢高級享受,自然風格令住客身心靈皆有淨化感覺。

酒店 2 樓會有 MUJI 店舖與餐廳。
室內設計交由御用東京設計團隊 Super Potato 主理,一貫地簡約舒服。
客房牆身會有自動調節室溫材料。
酒店將會藏身北京最古老胡同巷弄間。

Muji Hotel Shenzhen
地址:廣東省深圳市福田區皇崗路5001號深業上城內

#16 文華東方 北京胡同開酒店

文華東方酒店出名走豪華歐式建築風格,明年預計開幕的 Mandarin Oriental Qianmen 就會走低調奢華風,皆因它選址天安門廣場旁的前門東區胡同,要融入當地老北京風格,將會以四合院風格示人,令人感受最古老的北京。

暫時預想圖只見其四合院開放風格。

Mandarin Oriental Qianmen
開放日期:2018 上半年


#17 酒鬼最啱 實驗式酒店

蘇格蘭釀酒廠 BrewDog 破天荒於去年在網上集資,興建全世界第一間手工啤酒店,又真係畀佢眾籌成功,明年夏天預計於美國可倫布開幕。鄰近其 Ohio 釀酒廠,除了房內有手工啤用嚟沖涼,仲有啤酒 spa 可以做,正宗酒池「浴淋」。
酒店唔單止籌得所需金錢,仲要係超出咗 4 倍,呢個例子真係好勵志呀。
破格啤酒主題美容,會使用啤酒原材料麥芽作按摩之用。

The Dog House Brewdog

文:茶 相:UM 圖片庫、gettyimages、afp、©Disney、韓國觀光公社、©2017 The LEGO Group.、レゴランド®・ジャパン・リゾート、 ©Naoko Takeuchi 、©Moomin CharactersTM、Royal Caribbean、Mandarin Oriental、網上圖片

即 like & follow U Travel Facebook / U Travel IG / 旅遊快搜 Facebook 專頁,緊貼世界各地最新旅遊情報!用WeChat掃一掃下面QR Code,follow埋U Travel精選內容!

相關情報