位於蘇梅東北邊的 Ritz Carlton,建在沙灘旁之山丘上,完全佔據整個山頭,resort 對出就是汪洋大海,沙灘同被 resort 私有化冇分別。大堂特地建於高處,客人一到埗即望到遼闊大海,未 check-in 入房已感受到高高在上的皇者氣派。由大堂行到客房約要 10 分鐘腳程,烈日當空,絕對需要 buggy 代步。Resort 主角之一的主泳池就在山腳,行出 10 步就係私人海灘。平時在海灘的浮潛區,閒閒地見到一行 10 多人浮潛,此海域則只有 Ritz 住客獨霸,冇人同你爭,魚都睇多幾條呀。
環島遊蘇梅一轉約要 1 小時,出去邊度玩其實絕唔算遠。之不過總有唔少旅人如我一樣,去蘇梅就是想整天留守 resort 大本營 hea 個夠。如此願望,只有星級皇牌 resort 先滿足到你。
Hea 爆位:
Check-in 後看到殿堂級房間已經唔想離開。175 間客房,設計以木為溫和色調為主,當中不乏藤木傢私、海洋主題擺設,豪華又有泰南風情。每間客房均設海景露台,我入住的低層 villa 更設有露台及私家泳池。所有 villa 建於半山中,比起坐在沙灘旁的泳池,更可望到海天一色。
食肥啲啲:
Resort 有 6 間餐廳。Sea salt 餐廳較 casual,提供三文治、burger、沙律等;酒吧 Tides 可即時為泳池客人炮製 cocktail;Pak tai 主打泰南菜;Resort 中心地帶的 shook!,每日提供早餐、簡單亞洲菜及西菜;仲有 concierge pavilion 隔籬的酒吧 One Rai,可望住晚霞摸杯底。另外仲有兩大 coming soon 餐廳,位於 resort 之巔的 the peak,只設 2 個位,啱晒情侶。Shook! 樓下位置,將會變成如食街般的 Baan talat,提供 street food。在星級 resort 掃街,似乎幾有趣。
變 fit 啲:
飲飽食醉,點可以唔做運動。Resort 有帆船、獨木舟多個水上活動,亦有泰拳。Ritz Carlton 有蘇梅 resort 少有的室內拳館 muay thai gym。着好裝備即時同教練過下兩度散手。Resort 仲有全東南亞最大的 swim reef 潛水池,位於 Pak tai 餐廳前。驟眼睇似是普通水池,近看才發現池中有超過 50 種魚類、珊瑚。迷你「海洋」提供浮潛,小朋友或驚水人士,可在泳中試玩浮潛,由於個池有點細,魚兒走唔出你法眼,任睇唔嬲。
變靚啲:
運動過後,黃昏前去 resort 重頭戲 spa village 差下電。Spa 有 8 間私人度極高的 spa 房,另有 3 間半開放式按摩房,如私家涼亭,客人可在亭內進行傳統泰式按摩。Spa village 有泰北古法木槌按摩 tok sen massage,以木槌於穴位上輕敲來令血液循環;Samui's coconut heritage 則以椰殼製成的沖涼刷來去死皮,再以椰子油幫客人 massage;Chinese facial 以溫熱的雞蛋輕輕在臉上滾動,令肌膚緊致有光澤。
Ritz Carlton Koh Samui
地址:9/123 Moo 5, Tambon Bophut, Koh Samui, Surat Thani, Thailand
電話:+66 (0)77 915 777
房價:每晚 3,253 港元起(開幕優惠,至 12 月 22 日)
交通:由機場搭的士約 12 分鐘
文:Charlotte、攝:Kee Yau
↓【必收藏】最新深圳食買玩攻略!↓↓
↓ 大灣區一小時生活圈!最新打卡熱點/熱門美食等!↓
↓ 大灣區一小時生活圈!最新打卡熱點/熱門美食等!↓
↓全新旅遊主題集結!↓↓
↓立即睇打卡熱點/地道美食/住宿指南等!↓
↓立即睇打卡熱點/地道美食/住宿指南等!↓