【潮日放送】日本空姐帶路大阪人都喜愛的深夜平食

2017.11.24

去旅行最怕跟住某某節目明星介紹，然後去到難食又貴，中晒伏。所以我們專誠邀請兩位在大阪居住的日本空姐斗妃子和彌生，帶路搵食，推介幾間連當地人都鍾意的餐廳，減低中伏機會。喜歡地瘩「佬」味，呢 3 間平民食堂都開到夜晚 11、12點，飲酒、燒肉、食蠔，即刻睇！

推介01 | 企住燒　炭燒 30 款牛肉牛內臟

大眾酒場並非大叔、男士專利，很多年輕女性都會捧場。兩位空姐，除下制服，亦愛立食燒肉。這家「電撃ホルモンツギヱ」位置隱秘，藏身在大阪天神橋小巷之中，即使望住網上地圖，依然要花些時間才找得到。

不過未見其門，先聞到一陣炭火香。昏黃燈光下，店主山川先生蹲在店門前為炭爐預熱，不時又跑到コ型吧枱內切肉、跟客人吹水，一腳踢忙足全晚，勁似深夜食堂。

不過作為食肉獸，店內提供近 30 款不同部位，才是最大的驚喜。餐單內有各款內臟（ホルモン），單是牛舌都細分 3 個細位，由舌芯、舌根到舌側的腩位，舌身後薄不同，前者較爽口，後者肥美軟腍，燒香後有入口即溶的感覺；喜歡食得刁鑽，亦可以一次食勻牛大腸小腸、四個胃室：瘤胃（即牛肚）、網胃（即金錢肚）、葉胃（即牛柏葉）和皺胃，軟腍香滑、爽脆煙韌，各有特色。香港較少見的，還有下巴、氣管、子宮、乳線、大動脈等等。逐款叫，每碟份量不多，最適合胃口不大的女士幫襯，有 quota 柯打多幾款。而且每碟由 20 - 63 港元不等，價錢不算貴，就可以食到各款內臟和和牛級燒肉。

在香港食牛都無咁刁鑽，在這裡可以一次食勻牛的四個胃：（左起）ミノ瘤胃、ハチノス網胃、センマイ葉胃和ギアラ皺胃。

這裡 order 一碟 20 - 63 港元不等，份量剛好，即使女仔食量不大，都可以試多幾款。

電撃ホルモンツギヱ

地址：日本大阪市北區天神橋 5-6-33

電話：+81 (0)70 5659 0348

營業時間：星期一至六 5pm - 12mn、星期日 4pm - 12mn

交通：JR 環狀線天滿站步行約 4 分鐘

網址：tsugie-tenma.com

推介02 | 海鮮控深夜蠔情三食

踏入秋冬季，九洲的廣島蠔、東北宮城蠔當造，蠔肉特別肥美，自然不能錯過大快朵頤的好時機。錯過大阪黑門市場的營業時間，夜晚在心齋橋亦可以找到吃蠔的好地方。空姐斗妃子推介的「馬と牡蠣まつり」只經營晚市時段，開到深夜 12 點。主廚井川先生指，餐廳會按季節、月份，從日本各縣取蠔，唔新鮮、唔肥美都唔會入貨。

北海道蠔 35 港元 / 1 隻 (左) 宮城蠔 25 / 1 隻 (右) 記者最推介北海道蠔，蠔身十分肥美飽滿，入口超 creamy ，海水味偏淡，愈食愈甜，好想再 encore。 — 北海道蠔 35 港元 / 1 隻 (左) 宮城蠔 25 / 1 隻 (右)
記者最推介北海道蠔，蠔身十分肥美飽滿，入口超 creamy ，海水味偏淡，愈食愈甜，好想再 encore。

烤蠔 138 港元/1kg 宮城蠔蠔身較小，沒有太大咬口，不過食落海水味濃，而且 1 分斤價錢唔使 140 港元，，值得一試。 — 烤蠔 138 港元/1kg
宮城蠔蠔身較小，沒有太大咬口，不過食落海水味濃，而且 1 分斤價錢唔使 140 港元，，值得一試。

十一月幫襯，最推介食廣島生蠔，口感結實，味道清甜；還有宮城蠔，蠔身雖然較小，但肉質份外爽口，海水味亦都較濃。價錢 130 港元有 6 隻，為起十幾蚊隻，好抵食；北海道的岩蠔一年四季都有供應，雖然價錢比較貴， 196 港元 6 隻，但食落 creamy 肥美飽滿，味道帶甜，同樣唔叫唔得。店內更有燒蠔、 Shabu Shabu，可以盡情食蠔。以後到大阪旅行，夜晚心癢癢想食蠔，亦不愁沒有地方。

以昆布湯作湯底，把豚肉包著廣島蠔灼半分鐘，既有豚肉的油香，亦可以嚐到蠔身的鮮甜。食到最尾，店員仲會幫忙加飯做雜炊，飯身吸收湯汁精華，鮮味十足。

馬と牡蠣まつり

地址：日本大阪中央區南船場 4-8-2

電話：+81 (0)6 6282 5570

營業時間：逢星期一至六 5 pm－12 mn

網址：localplace.jp/

交通：由地下鐵御堂筋線心齋橋站 3 號出口步行約 5 分鐘即達

推介03 | 不醉無歸　立食豚內臟

要避開專賺遊客錢的餐廳，空姐推介大家到由大阪難波站到千日前一帶的小街，被當地人稱呼為「裏難波」（ウラナンバ），外國遊客不多，地瘩味極濃。空姐斗妃子推介居酒屋「大阪焼トンセンター」，牆身貼滿手寫菜單，食客站在傳統的吧枱前，望住廚師把炭火上的串燒的翻來覆去，夠晒傳統。

整個餐廳主打食豬肉，仲要食得刁鑽，採用鹿兒島的茶美豚，平日只吃混入茶葉的飼料，油脂不多不少，豐腴不膩，入口柔軟鮮嫩；菜單上有不同煮法、不同部位的豬肉和豬內臟，即席燒烤的串燒，選擇之多，由大路的豬頸肉、五花腩，到生腸、橫隔膜、氣管都有。別以為內臟就是羶羶臭臭，每日新鮮運到的內臟只以簡單的鹽稍作調味，烤過之後的味更是濃郁。

膽粗粗叫了一客內臟刺身，別怕，其實廚師早就以低溫煮熟，豬心處理得仔細，入口不帶一絲筋，入口軟嫩；豬子宮、豬腸則口感爽彈，不帶腥氣，令我對內臟食感大改觀。店內更有五六十款日本酒，呷一杯，再來一口烤肉，麻甩又暢快。

自選串燒（5 串）　53 港元個人最推薦豬頸肉，口感有咬勁，入口油香滿滿。 — 自選串燒（5 串）　53 港元
個人最推薦豬頸肉，口感有咬勁，入口油香滿滿。

煮豬雜湯 20 港元以醬油和豬骨作湯底，豬內臟相當入味，吃來毫無腥味，且口感滑嫩，不會太老。 — 煮豬雜湯 20 港元
以醬油和豬骨作湯底，豬內臟相當入味，吃來毫無腥味，且口感滑嫩，不會太老。

店內有近 60 款地酒，怕客人企住飲到醉醺醺，店內以電車圓環扶手做裝飾，既貼心又具時代感。

立飲み　大阪焼トンセンター

地址：日本大阪市中央區難波千日前 3 - 19

電話：+81 (0)6 4396 8109

營業時間：3 PM -11 PM

交通：地鐵堺筋線日本橋步行 5 分鐘

網址：www.tayu2.com/daiton.html

推介04 | 和歌山黑潮市場　平食肥美拖羅

想食又平、又新鮮的吞拿魚拖羅，推介必去黑潮市場。每日有三場解魚表演，即切即賣，拖羅壽司超肥美又新鮮；市場內仲有各款海產、海鮮熟食，仲可以來個海濱 BBQ！即睇！

大拖羅是吞拿魚的腩位，油脂含量高，入口即融，是必食推介！中拖羅則是魚腩混魚背位置，肉質較爽口，不會太肥膩，味道亦比較清甜。重點，比香港平一大截！

在香港食高級拖羅壽司，動輒都四、五十港元一件啦，但在「黑潮市場」就平得多！黑潮市場是和歌山臨海的鮮魚市場，不少遊客都慕名而來。每日三場吞拿魚解魚表演，分別是 11 am、12:30 pm 和 3:00 pm ，由專業職人即場示範切魚，更會把切好的魚立刻包裝發售。買了大拖羅壽司試試，入口即融，油香在舌尖久久不散。價錢更比大阪黑門市場仲要平，只要 140 港元，就可以買到一盒 7 件裝，新鮮又肥美的大拖羅壽司，重點推介！

中拖羅壽司 105 港元/ 1 盒 7 件大拖羅壽司 140 港元/ 1 盒 7 件 — 中拖羅壽司 105 港元/ 1 盒 7 件
大拖羅壽司 140 港元/ 1 盒 7 件

職人手上的吞拿魚足足有 45 公斤重，價值 45 萬日圓。想欣賞難得的解魚表演，留意一日只有 3 場，建議朝早到，唔會撞正旅行團。

同場更有大約 80 款海鮮發售，店員表示大部分海產都是日本產，絕少由國外進口。市場內除了有吞拿魚店，更設 20 個海鮮攤檔，出售活海鮮如活魚、龍蝦、蝦、蟹、元貝、海螺等等，睇中可以由店員即場加工；另有天婦羅、拉麵等熟食檔。喜歡自己動手煮，亦可以買海鮮串、蔬菜串，在戶外燒烤區，無需要額外加錢，有齊食具、醬料，好貼心。吹住海風、望住海景燒海鮮，再 hea 不過！