【排行榜】 旅客票選亞洲最好瞓機場 香港得第四

2018.03.23

對於繁忙但又鍾意去旅行嘅人嚟講,收工後上機絕對係再普通不過的事,但當你只能選擇搭凌晨機、或是凌晨到埗、又或是遇上最慘的 delay 狀態,能夠喺機場舒舒服服瞓返個回魂覺,真係夫復何求的一件事!最近外國旅遊網站 Sleeping in Airports,就搞咗個旅客票選最好瞓的亞洲機場選舉,大家又睇吓結果係咪自己心水。

 


 


 

# 第 5 位 日本東京成田機場


被喻為高效、簡單、乾淨及友善的機場,提供很多的軟墊凳子和梳化給旅客休息,而更體貼的係無論理髪、美容、美甲按摩等,機場內都有,女仕嚟到真係好忙 XD,但若然想真正瞓個靚覺的話,可以選擇到免費休息區,又或是膠囊酒店或付費的小睡室。(圖:Narita Airport)

付費的小睡室分單、雙人,最驚喜的係可以呢度連飛機景都有得睇。(圖:Narita Airport)

位於第二航廈的休息區,除了有位置畀旅客瞓覺外,亦有免費雜誌及充電位、 Wi-Fi 提供,由於地方清潔,喺度瞓幾個鐘絕對冇問題。(圖:Narita Airport)


機場服務/設施:收費休息室、房間、行李寄存,免費 Wi-Fi 及 24 小時食店等。

網址:www.narita-airport.jp

 


 

#第 4 位 香港國際機場

曾被國際旅遊雜誌評為擁有全球最佳的抵境休息室,皆因機場設有免費 Wi-Fi 之餘、T1 & T2 有非常多的休息空間,例如一號客運大樓離港層 23 號登機閘口附近有休閒閣、一號客運大樓及中場客運廊的休憩處,亦有免費躺椅畀旅客休息。另外,在一號客運大樓、北衛星客運廊及中場客運大樓的登機閘口附近,亦設有七個兒童電視廊,內裡除了有卡通片外,亦有玩具提供畀小朋友玩樂。

唔想瞓覺的話,亦可以選擇付費服務如 IMAX 影院、9 洞高爾夫球場、淋浴間、以及多種價格及不同種類的餐廳選擇。(圖:UA cinema)

機場服務/設施:按次收費的休息室、淋浴間、行李寄存,免費 Wi-Fi、24 小時食店、IMAX 劇院及休息區等。

網址:www.hongkongairport.com

 


 

 

#第 3 位 日本東京羽田機場


雖然以全球喜愛度來說,羽田機場並比其他機場較低,但計好瞓的話卻被旅客評為能提供清潔和高效服務,皆因機場中有很多安靜的角落,而且由 1-5 樓也有休息的座椅,加上到處有警衛或機場警察巡邏,令人有安心的感覺。而除了休息外,旅客可到 4 樓參觀極富日本特式的江戶小路及羽田日本橋,睇完後還可以到 6 樓的觀景台欣賞機場景色,唔想周圍走的話,航厦的不同位置亦有電腦枱及按摩椅等設施,可以讓大家打發漫長的等待時間。(圖:gattyan1221@ig、afarwhiteglobe@ig、tatsurokannan@ig)


機場服務/設施:按次收費休息室、淋浴間、行李寄存,免費 Wi-Fi、過境酒店及 24 小時食店等。

網址:www.haneda-airport.jp

 


 

 

#第 2 位 韓國仁川國際機場

同第一位的機場一樣受到一致好評,除了多高品質的食物選擇外,地方清潔也有寧靜的氛圍,亦有免費的淋浴間。想瞓覺的話,旅客可選擇膠囊酒店,又或是到入境大堂的閣樓或 Check-in counter M 的位置的長凳休息吓,而唔眼瞓就可以去睇解悶大電視或是溜冰場及戲院消磨時間。肚餓的話,1 樓有快餐店 Lotteria、3 樓離境大堂有 Burger King ,兩間都係 24 小時服務,方便你隨時醫肚。(圖:韓國觀光公社)

機場 2 樓,設有 Caffe Bene 的 Internet Cafe 茶座,晚上 10 點後空凳梳化任瞓任坐。

仁川離境和入境大堂設有多個充電位,插座和 USB 位都有,呢個位於 Check-in counter M 的位置,人少少,又有「無障礙」長凳可供攤唞,非常理想。

機場服務/設施:收費使用貴賓室、溜冰場、電影院、行李寄存,免費 Wi-Fi、過境酒店、24 小時食店、花園、免費淋浴間、博物館及休息區等。

網址:www.airport.kr

 


 

# 第 1 位 新加坡樟宜機場



與往年一樣,樟宜機場繼續成為了亞洲最佳機場和全球最佳機場,大部分旅客都認為呢個機場有齊你想要的設施,就連冇想過的設施都有,例如舒適的座位、休息區、花園、蝴蝶園、屋頂泳池、24 小時免費戲院、桑拿等乜都有。而 4 號航廈(T4)亦剛於 10 月 31 日正式啟用,佔地 22.5 萬平方米,相當於 27 個足球場的亦有設有小睡區,真係唔怕冇位瞓。




T2 娛樂區有免費電影睇有 XBOX、Playstation 打,唔怪得旅客話係度過成日都唔會悶。

電視貴賓室。

機場服務/設施:按次付費休息室、午睡客房、游泳池、淋浴間、行李寄存、水療,免費 Wi-Fi、免費城市觀光、免費電影院、過境酒店、 24 小時食店、花園及休息區等。

網址:www.changiairport.com

圖:Changi Airport

亞洲最差機場係……

除咗選出最好瞓的亞洲機場外,網站亦同時票選亞洲五大最差機場,得獎機場包括烏茲別克斯坦塔什幹國際機場(TAS)、尼泊爾加德滿都特里布萬國際機場(KTM)、廣州白雲國際機場(CAN)、巴基斯坦伊斯蘭堡貝納齊爾·布托國際機場(ISB)及北京首都國際機場(PEK)。


資料來源:www.sleepinginairports.net

即 like & follow U Travel Facebook / U Travel IG / 旅遊快搜 Facebook 專頁,緊貼世界各地最新旅遊情報!用WeChat掃一掃下面QR Code,follow埋U Travel精選內容!

相關情報