杜如風主持的《九州攻略》即將在 10 月 14 日於大台播放，本星期 U Magazine 封面故事就有杜如風出場帶玩九州！
睇佢主持節目，一味喪買喪玩係過癮嘅，旅遊節目以外的杜如風又係點？小記可以話你知，今次預設 26 條快問快答，一如所料變咗快問慢答、快問喪答，一貫爆肚又 eye catching。
快問喪答 26 Questions
Q1：而家 5pm 就食晚餐？
杜：準備食喇。
Q2：今朝幾點起身做嘢？
杜：今朝犀利喇，7am 起身喇。
Q3：聽講你每次出 trip 做嘢都會病，係唔係真？
杜：係真嘅，我哋有哂醫生紙紀錄～
Q4：咁你會唔會帶埋中女三寶出 trip？
杜：乜嘢係中女三寶呀...
（暖水壺、頸巾、潤手霜）
杜：我會帶潤手霜，因為我有嚴重濕疹，所以護手好緊要。
Q5：你每次飛會帶乜嘢傍身？
杜：其實都係好正路嘅嘢。
安美露–我拍節目唔係齋行，又跳又側身翻，所以啲筋骨都好痛吓，得閒就會攞出嚟麻醉吓自己。
哮喘藥–小弟有哮喘，所以帶定哮喘藥，以防隨時侷暈。
濕疹膏–我自細用開的日本製濕疹膏。當年由我 Daddy 發現，已經用咗好多年。因為我係濕疹專家，2 歲開始就有濕疹。呢支我用後覺得好好，但唔可以經常塗，因為有少量類固醇。
藥油–由於我去的地方太多靚衫靚嘢買，所以真係暈得一陣陣，要攞藥油出嚟嗅吓、塗吓，冷靜自己，再諗：「買邊件好呢？」
Q6：你搭飛機會鍾意揀咩位坐？
杜：窗口位！一定要坐窗口位，因為有得挨。
Q7：坐低之後第一件事會做咩？
杜：第一件事，先點杯飲品。
Q8：在機上會點樣打發時間？
杜：瞓覺！必定係瞓覺。唔會睇任何電影。
Q9：有冇試過遇上乘客向你搭訕？
杜：有，我話我唔係囉。「你係唔係杜如風呀？可唔可以同我影張相？」我會話：「我唔係呀，似咋，好多人都話似。」
Q10：去旅行有冇試過有艷遇？
杜：冇呀真係。呢樣嘢真係非常出奇，我假假地拍咗十年旅遊節目係一次艷遇都冇遇過，證明我嘅工作係幾專心。
Q11：你會唔會唱定錢飛？
杜：我唔會，我阿媽會。唱定錢畀我飛。
Q12：平均會帶幾多錢 / 幾多張卡飛？
杜：卡 3 張，錢反而唔會帶好多。因為常去嘅地方都可以碌卡，錢唔使帶好多。
Q13：知唔知提款卡要設定「海外提款」？
杜：梗係知喇！我好夕都算係個「達人」，我 set 一年期限，唔好煩呀嘛。
Q14：旅行使得最多錢係唔係買嘢？
杜：當然係買嘢喇！因為我係一個垃圾婆，乜嘢都儲，唔止買衫，衫褲鞋襪玩具都買，試過買過一個郵筒返屋企！
Q15：最癲嘅一次使咗幾多錢？
杜：6 位數字。
Q16：稱呼你「世界級港女」，其實你介唔介意？
杜：唔介意，一個名之嘛！咁我又風行全世界，又香港出世、在香港工作，咪「世界級港女」囉。但我覺得應該叫我「宇宙級皇帝女」先襯。
Q17：你拍節目，一日瞓幾多個鐘？
杜：我都好瞓得吓，出 trip 拍節目，平均一日瞓 8 - 10 個鐘。
Q18：搞幾耐先出到門口？
杜：咁要視乎拍嘢前一日幾攰，有時可以好快，有時攰到坐響度化粧整頭都瞓着。試過要同事嗌我成個鐘先醒到。
Q19：你會帶幾多戰衣出trip？
杜：拍一輯節目我會執十幾套衫，去程已經帶 2 個滿晒嘅行李箱，鞋都帶 10 對！諗住執咗先算，去到唔着都係擡行李啫。所以會請身邊工作人員幫手，騰出行李箱空間畀我買嘢！
Q20：會帶返幾多戰衣返黎？
杜：買幾多，帶幾多！
Q21：你興唔興買手信？
杜：我會買手信，但我唔會特別每人買一份，因為我飛太多喇。
Q22：媽媽仲會唔會話你：「好買咁多嘢」？
杜：媽媽每一天都係繼續講緊呢句，佢係唔會停咁講，但我亦係唔會停咁買！
Q23：私人問題時間，其實你有冇拍拖呀？
杜：我有拍過拖，但暫時未有拍拖。
Q24：咁你想唔想拍拖？
杜：唔係特別恨 x 2（講咗兩次）。有呀梗係好喇，冇都冇辦法喇。
Q25：有冇老土嘢想同未來男朋友旅行時試吓？
杜：未來男朋友，我又唔知佢點……試啲咩好呢？跳落去喇（跳海）「You jump, I jump」呀嘛，睇佢夠唔夠愛我。我就夠薑跳喇，睇佢夠唔夠薑跳。如果佢都夠薑跳，咁我就係 Rose，佢就係 Jack 囉！
Q26：終極 FF 題，有機會同你男神偉仔拍旅遊節目，你會帶佢去邊度威？
杜：梗係浸溫泉喇！仲使講嘅？仲係除晒衫嗰隻，但係要清場，冇攝影、冇燈光、冇錄音…乜都冇，總之就係拍浸溫泉喇！
即睇足本訪問片段：
採訪：小窮維琪
拍攝：Kee
場地提供：羲和雅苑烤鴨坊
去到邊 Share到邊～立即記錄您的生活足跡！
↓ 照顧哂您成個護膚程序！打造亮白光感肌！ ↓
utravel
發表回應