日本以外,有不少人都會選擇去韓國首爾賞櫻,因為一個「平」字已經完勝。相比日本,首爾櫻花期的機票,最平 $1,200 已經有交易,而日本以東京為例已經要 $38xx 起跳,難怪近年都有不少人轉軚去韓賞櫻。
雖然韓國首爾的預測櫻花期報告仲未推出,但觀乎前年及今年首爾的櫻花期(盛開)都是在 4 月中旬往後,所以今次幫大家 check 明年 4 月 12 日至 20 日的 5 間至抵的航空公司機票,再追加推介 5 個不敗賞櫻景點,等你妳您可以做足準備,平平平去首爾賞櫻。
【延伸閱讀】【#UTravel韓流情報】韓國衛生巾驗出致癌物質 相關部門質疑化驗報告準確性
【延伸閱讀】【#UTravel韓流情報】首爾弘大邪惡宵夜!燒烤、海鮮 8 大精選推介
5 間平機票飛首爾賞櫻推介
check 過 10 間航公司於明年4 月 12 日 至 20 日(即首爾櫻花滿開期)的機票價錢,到現時為止(截至 9 月 22 日),最平 + 時間最靚的是以下 5 間航空公司。
# 1 價錢最平@HONG KONG EXPRESS
這段期間,HONG KONG EXPRESS (HKEX 簡稱) 去程有四班機,而回程有三班航班,價錢相差都幾大,最貴一程要四千幾港元,而最平三百幾已經有交易,時間都不算好差。以最平的來回時段,加來回 20 KG 行李計算,埋單都唔使 1,200 蚊(淨機票),划算。(不過,你知啦!HKEX 不時都有 delay 情況出現,買平機票總要冒冒風險。)
票價:約 1,193 港元
網址︰www.hkexpress.com
#2 早機去晚機返@韓亞航空
雖然韓亞唔算平,但勝在可以玩到盡,例如去程搭凌晨十二點幾機,去到都係四點幾,回程亦可以選擇最夜的七點幾機,返到香港都係十點半,夠晒時間賞櫻喪食兼血拼。
票價:約 2,549 港元
網址︰ea.flyasiana.com
#3 夜機返@HONG KONG AIRLINES
如果唔想太早去到首爾捱眼瞓,可以選擇香港航空,去到首爾大概三點幾,輕輕鬆鬆酒店 check in 跟手食個 dinner,唞足精神聽日再作戰。回程真係可以玩到盡(23:35)上機。
票價:約 2,499 港元
#4 最適合 SHOPPING 精@印度航空
由於 4 月 12 日去首爾已經沒有機位,所以揀咗早一日( 4 月 11 日)。去程時間不是太好,晚上八點起飛,有點難搞。價錢亦不算特別抵,勝在寄倉行李有 25 KG (經濟客位),連手提行李都有 8 KG,適合 SHOPPING 精。
票價:約 2,469 港元(大概)
#5 航班夠多@大韓航空
相比四間航空公司,大韓航空的航班最多,來回都有四班機畀你揀,而且時間都唔錯。可以凌晨機去,晚機返。玩盡八日。
票價:約 2,489 港元
5 個 必去首爾賞櫻景點:
#1 汝矣島輪中路
汝矣島是首爾最佳賞櫻地點之一,全長 1.7 公里的櫻花道,同時綻放 1,400 至 1,600 棵櫻花樹,夠晒壯觀。輪中路更是首爾櫻花最密集的地方,賞櫻期長達兩星期,在櫻花慶典期間,更有各式攤檔和表演,人頭湧湧,氣氛熱鬧。入夜後更可觀賞夜櫻和不同的燈效,大滿足!(圖:KTOHK、AFP)
櫻花盛開期預測:4 月初至中旬(另有汝矣島櫻花慶典)
交通:首爾地鐵 5 號汝矣島站 2 號出口
#2 首爾兒童大公園
位於廣津區的首爾兒童大公園是免費入場的,全園有 53 萬平方米,到處皆是傳統特色建築,是韓國人最愛野餐郊遊的地方,同時亦是首爾最早開櫻花景點。大人可以賞花,小朋友可以去園內的動物園、動物餵飼區、植物園同遊樂場區,放放電,玩足一日。(圖:KTOHK、AFP、yu_ping1204@ig)
櫻花盛開期預測:4 月初或中旬
交通:首爾地鐵 7 號綫兒童大公園站 1 號出口
#3 顯忠院
銅雀的顯忠院,是首爾較遲開櫻花的景點,但此院最出名是開滿具有護國象徵的枝垂櫻,加上一大片休憩花園,當地人好鍾意假日來消閒,外國遊客比較少,感覺格外清幽。更可順道參加埋枝垂櫻櫻花慶典,欣賞軍樂表演等活動。(圖:KTOHK、AFP、nseawind@ig)
櫻花盛開期預測:4 月中旬(另有枝垂櫻櫻花慶典)
交通:首爾地鐵 4 號綫或 9 號綫銅雀站
#4 安養川
整條川流經過軍浦市、安養市、光明市與首爾的衿川區、九老區、陽川區、永登浦區等,全長 1,800 米,沿河川有一條人流稀少的散步徑,途上都是滿滿的櫻花樹路,櫻花樹又掛上韓式吊飾,頗有特色。(圖:KTOHK、AFP)
櫻花盛開期預測:4 月中(另有安養川櫻花楊坪村慶典)
交通:首爾地鐵 5 號綫楊坪站 1 號、2 號出口
#5 南山公園
首爾塔可以話係遊客必到的觀光點,而山腳下的南山公園,周圍都開滿櫻花,步程大概 40 分鐘的路段都被櫻花包園,好似走進一條櫻花的隧道,浪漫到一個點。而且仲可以以首爾塔做背景影埋櫻花,夠晒靚。(圖:KTOHK、AFP、lokmelody@ig)
櫻花盛開期預測:4 月中旬
交通:首爾地鐵 4 號明洞站 3 號出口,步行 10 分鐘