估唔到 日本人真係好鍾意 芫荽，唔止大大盆的 芫荽鍋、 芫荽刨冰，就連小食如果仁、爆谷、薯條等，乜都要同芫荽 crossover 。 芫荽小食愈來愈多，但到底邊款真正夠荽又好味？我哋今次就精選咗近 3 個月在日本推出、日本人一致推薦的荽味小食畀同樣鍾意食荽嘅大家。
# 芫荽味百力滋
淨睇一身綠色芫荽的包裝已經好吸引，打開後見到每條百力滋都「青 BB」色、加上散發強勁荽香味，未食已經好興奮。至於味道方面，日本人就表示佢有明顯的芫荽味，而且味道會愈食愈濃，而最正的係，佢每袋只有 119 卡路里，真係食多幾盒都唔怕肥。 （圖：nyadleeh2@ig、guchie1006@ig）
售價：120 日圓（約 9 港元）
# 芫荽雞肉杯麵
包裝圖案非常吸引，打開後雖然只見到有少少芫荽乾喺杯麵中，但加熱水後即湧出淡淡的芫荽味，要注意的是，食時要先將湯伴勻，因為大部分的芫荽都沉晒落杯底，咁就可以真正食到應有的芫荽味道，若然唔係的話，你只會食到鹽味杯麵的味道。（圖：sm_l_sm_l_@ig、網上圖片）
售價： 180 日圓（約 13 港元）
# 芫荽酒
以 Gin 酒為酒底，加上梳打水及法國產的芫荽精華製成，芫荽味冇想像中濃，混在酒內反而變得清爽易入口，就好似宣傳句中一樣，係一種非常容易上癮的芫荽酒。（圖：jc_tossy@ig、網上圖片）
售價：160 日圓（約 11.5 港元）
# 辛辣芫荽担担麵
冇錯，一睇就知呢個杯麵係辣味担担麵，雖然湯底辣味濃，但食過的人表示辣湯唔會搶走芫荽味，而兩者加埋絕對係一種完美配搭，再加上有嚼口的麵條，一流！（圖：recitation.a17@ig、網上圖片）
售價：205 日圓（約 15 港元）
# 芫荽朱古力
日本人係 crossover 方面真係超強，你又點估得到芫荽同朱古力都可以扯上關係？更估唔到芫荽同朱古力都可以 match 得來唔突兀！雖然呢款朱古力食落芫荽味唔算太香同太濃，但邊食就會發現有淡淡的荽味滲出，同樣愛好兩者的人可以一試。（圖：askakwkm@ig、網上圖片）
售價：138 日圓（約 10 港元）
去到邊 Share到邊～立即記錄您的生活足跡！
↓ 照顧哂您成個護膚程序！打造亮白光感肌！ ↓
utravel
發表回應