#潮日放送    日本 Ministop、 LAWSON、7-11、FamilyMart 23 種必食新口味(不斷更新)

2018.01.29
文 : U Travel
2018.01.29

好多人去 日本 ,都必定到各大 便利店 掃場,除咗因為梗有一間係左近夠方便外,亦因為佢哋每星期(真係每星期)都有新品推出,最近除咗有世界首枝的桃味可樂外,不得不提的就係 「抹茶 tiramisu 蕨餅」雪糕 ,因為所有日本人食完都大讚好味道!

「青森蘋果批軟雪糕」+「青森蘋果軟雪糕(烤蘋果)」

Ministop雪糕一向都係品質?保證,經常推出不同新口味,而今次呢款新品「青森蘋果批軟雪糕」用上青森縣出產的紅玉蘋果,推出,紅玉蘋果汁製成軟雪糕,配上蘋果批皮和蘋果醬,一次過可以品嘗兩種口感!同時「加映」仲有「青森蘋果軟雪糕(烤蘋果)」

青森蘋果批軟雪糕 / 270日圓

青森蘋果軟雪糕(烤蘋果) / 220日圓

INFO

推出日期: 1 月 26 日順次發售,2月9日所有 MINISTOP 有售

 

【1月26日更新】

7-11限定 抹茶控必食「抹茶 tiramisu 蕨餅」雪糕

井村屋的抹茶系零食,相信大家食唔少,而佢哋最近就新推呢款使用宇治抹茶製造的「抹茶 tiramisu 蕨餅」雪糕,真心覺得,淨睇包裝已經好吸引!(圖:pirochan211@ig)

打開包裝,先會見到貌似白玉的蕨餅、抹茶粉及入口即溶的抹茶生朱古力,而下層就係通常用嚟做 tiramisu 的芝士(Mascarpone Cheese)味的雪糕,以及甜得來帶甘的抹茶醬,食過的人都大讚超級好味。(圖:remaremaseino@ig)

(圖:711.nishiyoko@ig)

好味之外,大家亦讚歎呢款抹茶蕨餅,口感好豐富!(圖:m_f_n720@ig)

見到呢個畫面,身為抹茶控嘅我表示,好想一啖食咗佢!(圖:seri_kana_13626@ig)

(圖:yhyh_3939@ig)

除咗抹茶味外,同日亦推咗呢款「tiramisu 蕨餅」雪糕。(圖:sayaka_hiro@ig)

呢款就係將本來的抹茶粉及朱古力,改成朱古力口味,至於中間就變成意式濃縮咖啡醬,但試過的人就表示呢個食起嚟味道較苦澀,感覺係「大人的味道」。(圖:mimiko_416@ig)

(圖:711.nishiyoko@ig)

售價:224 日圓(約 16 港元)


【1月22日更新】

OMG!日本可口可樂時時都有新產品,今次唔係又出新包裝,而係推出全世界首創的「桃味可樂」!

{記者試味報告}

世界第一枝桃味可口可樂呀,點都要試下啦!

話係桃味汽水,原來 0% 果汁!

試味報告:「我覺得這枝桃味可樂,比平常的可樂沒那麼多氣泡,沒有很濃的可樂味,反而桃味十足,飲落就有啲似桃味波子汽水。」
 


點解揀桃?日本可口可樂指,桃在日本神話中有去邪氣的功效,而且在日本女兒節(3 月 3 日)中,又會用桃來祈求女生們健康成長,留意到桃味飲品在新年 1 至 3 月特別好賣,所以有了首創桃味可樂的念頭。

(相:cocacola_japan@IG)

今次推出 500ml 樽裝桃味可樂,另外有 280ml 樽裝桃味可樂限定於自動販賣機發售,包裝上就有大大個帶有氣泡的桃!去日本的朋友要把握機會,因為又是期間限定發售!

而家未有得賣,但日本可口可樂就進行了率先試飲抽獎,有中獎日本人在 IG 開心 share!

(相:sasusu2@IG)

睇埋中獎者試飲報告:

桃味可樂

發售點:全日本,包括自動販賣機

發售日期:2018 年 1 月 22 日起,期間限定

網址:secure.cocacola.jp

文:小窮維琪

相:官方網站、部分網上圖片


# LAWSON 

【2018年1月4日更新】

日本 Lawson 免費換 Sanrio 狗狗精品

今年是狗年,可以預料「狗狗」公仔要成為 2018 的爆紅 icon!日本便利店 Lawson 就與 Sanrio 聯乘,集合了多隻 Sanrio 旗下的可愛狗狗角色,推出 Zip Lock 式小物袋。

Zip Lock 小物袋共有 4 款,其中兩款由好多人都喜歡的布丁狗及玉桂狗做主角,其餘兩堤狗角色大集合款,更可找到布丁狗及玉桂狗家族朋友、夠少見嘅 PC 狗 Pochacco、Mimic Mike(1987 年誕生)、Peter Davis(1977 年誕生)。
首日已經有日本網民趕住去換。(相:kitty.lovey@IG)
只要在日本 Lawson(部分分店除外)購買指定零食 3 件,就可免費獲得小物袋 1 個,數量有限,先買先得。
買 3 件指定零食就有得送。(相:kuroneko3kuroneko3@IG)
相:mei__426@IG
有人成功一次過換齊 4 款。(相:yuu.7624@IG)

info
地點:日本 Lawson 便利店(部分分店除外)
換領日期:2018 年 1 月 4 日至 22 日(換完即止)

文:小窮維琪
相:sario.co.jp、部分網上圖片

記者試食報告
LAWSON x GODIVA
今年最後一彈限定朱古力甜品


 GODIVA 本身已經備受香港人推崇,現在佢仲要聯乘日本便利店 LAWSON ,推出兩款今年第 5 彈期間限定的朱古力甜品。相信會令不少人誓要行多幾間 LAWSON ,都務求搵到嚟試試!我也行了 3、4 間 LAWSON 先集齊到兩款,話畀大家聽值唔值得。

濃厚黑朱古力蛋糕
第一款是重份量的濃厚黑朱古力蛋糕,黑朱古力蛋糕外層灑上朱古力粉及充滿朱古力醬,內餡為 raspberry 果蓉 mix 朱古力 cream,一入口已經散發超濃黑朱古力味,挺稔滑,而酸酸甜甜的 raspberry 則剛好平衡整個味道與口感。蛋糕有手掌般大,食完真的有點飽肚。





橙皮朱古力夾心曲奇餅


第二款為 橙皮朱古力夾心曲奇餅,面層帶有閃令令的金箔碎,個樣好「聖誕」。朱古力曲奇餅十分香脆,中間包住結實嘅糖漬橙皮 cream,味道清新,橙同朱古力果然是好朋友!個人認為這款比較特別,而且不會有膩嘅感覺。



INFO
期間限定:即日至售完即止
價錢:400 日圓 / 每款
地點:日本全國 LAWSON 便利店


抹茶 の 歌劇(Häagen-Dazs)

售價:449 日圓(約 31 港元)
微苦的朱古力醬,上面灑上金粉,單睇賣相已經夠高貴,而醬下就係大家所期待的抹茶雪糕,配上杏仁餅及 Blonde Chocolate 雪糕,苦澀的朱古力醬與抹茶的甘及 Blonde Chocolate 的甜,配合得天衣無縫,再加上杏仁餅的口感,令整體變得非常豐富,超正!(圖:omeg02@ig、tak1391@ig)

朱古力撻(Uchi Cafe’ SWEETS × GODIVA ショコラタルト)

價錢: 324 日圓(圖:yuko19810215@IG)

酥脆撻皮,滲出淡淡的橙香,可減低朱古力的甜膩感,上層的鏡面朱古力醬,加上混合榛子朱古力醬及朱古力軟心製的餡料,一次過食到兩種不同味道的朱古力,令朱古力撻更有層次感。(圖:nako.3jsb@ig)


 朱古力蛋糕(Uchi Cafe’ SWEETS × GODIVA ガトーショコラ)

價錢: 296 日圓 (圖:takami.tomato@IG)

朱古力海綿蛋糕夠濕潤,加上濃滑的朱古力 mousse 及朱古力脆片,令質感不會太軟稔,有咬口,加上頂層帶苦味的朱古力漿,中和甜度,配搭一絕。(圖: nako.3jsb@ig )


加賀棒茶之焙茶布甸

加賀棒茶與日本焙茶唔同的地方,係選用一年最初新生的新茶莖部製作,以淺度烘焙帶出茶香及味道,而呢個布甸,就正正用上石川縣的加賀棒茶,所以茶香非常強烈;而布甸的底部亦有石川縣的能登大納言紅豆,焙茶布甸的甘香加上甜度剛好的紅豆...食過嘅人表示除咗要講「encore」外,就冇其他嘢好講!(圖:mamemaroro@ig、xxxalililicexxx@ig)

售價:165 日圓(約 12 港元)


蟠桃雪芭芝士蛋糕

上層是以 51% 的蟠桃果汁製成的雪芭,而下層則是芝士蛋糕。雪芭有鮮甜的桃味,而且味道濃郁,再加上綿身的芝士蛋糕,在濃郁的桃味中散出淡淡的芝士味,值得一試。(圖:y_misosoup@ig、hirotoyo291736@ig)

售價:165 日圓(約 12 港元)


玉子燒三文治

若然鍾意食玉子燒的話,就一定要試吓呢款玉子燒三文治,因為佢嘅玉子燒仲厚過層麵包,而玉子的質地亦非常綿密,食落除了有玉子本來的鹹甜味道外,更有淡淡的芥末味,令整件三文治感覺清爽而不膩,買定嚟做早餐或宵夜一流!(圖:chiiiho_m@ig、takeuchimitsuaki@ig)
售價:248 日圓 (約 18 港元)


#Ministop

原個布甸包饅頭


Ministop 喺今年1月推出嘅布甸包大受歡迎,在12月1日強勢回歸!呢個包外表一睇已經似布甸,重點內餡真係有個原大布甸,真材實料,好正呀!有網民相機食先,仲係相片上加多幾筆變布甸狗,好可愛!數量限定,又要去日本「搶食」啦!

推出日期:12月1日(12月8日全部分店有售)
價錢:108日圓

photo cr.: k__sm_33, aeeetwin, cherchan8210, uenaimages


# FamilyMart

低糖糖霜奶油窩夫(RIZAP x FamilyMart)

售價:135 日圓(約 10 港元)
與日本的纖體公司 RIZAP 合作推出的糖霜奶油窩夫,一包 2 個,窩夫質地食起嚟口感似鬆軟的銅鑼燒,加上微甜的奶油,味道啱啱好唔會膩,而最正的係由於使用低糖糖霜,故每件只有 71 卡路里,啱晒口痕又怕肥的人。(圖:noah02.14@ig、popoai6606@ig)

布丁夾心蛋糕

售價:298 日圓(約 21 港元)
外表同三文治冇分別的蛋糕。夾於蛋糕內的布丁雖然濕潤,但卻比一般布丁質地偏硬,故食起來唔容易散開,至於鬆軟蛋糕中加上勁像吉士醬的奶油,唯一嫌焦糖唔夠濃味,但整體仍然係好食,非常值得一試。(圖:wanko.sora@ig)

栗子酥

酥脆的外皮包上以栗子製成的忌廉做內餡,栗子忌廉栗味非常明顯,忌廉夠幼滑、入口即融,加上酥皮牛油香,一個字:正!(圖:popoai6606@ig)

售價:138 日圓(約 10 港元)


#7-11 

銅鑼燒 Tiffany Blue 

日本人真係咩都做到出來,個個女仔見到都心心眼的Tiffany Blue,落在日本人手上又成了一件今日開始必搶的甜品!

剛剛在 7-Eleven 登場的薄荷朱古力銅鑼燒,就有著黑皮 Tiffany Blue 心,真係一見未必傾心,睇真裡面就少女心大發!

啡黑的外皮是朱古力味的銅鑼燒蛋糕,內裡Tiffany Blue是薄荷味的忌廉,更配了朱古力碎,入口不會太甜有薄荷清香,而且可可味濃香不會太甜,唔好甜的男士都食得嘅。

可可味同薄荷味都幾夾,銅鑼燒每個連稅 160 日圓(HK$ 11)。

濃厚宇治抹茶生朱古力雪見大福


日本7-11便利店於12月12日推出「濃厚宇治抹茶生朱古力雪見大福」,價錢238日圓,甘苦生朱古力x高品質京都產抹茶,煙韌又醇厚甘甜,無得頂!數量有限,售完即止!售價:238日圓
photo cr.: u_ru_u, skgw.mn, oi_ryuno_ice, _aomice_

宇治抹茶冰

丸久小山園的抹茶雪糕,加上沖繩縣的黑糖醬及北海道的大納言紅豆製成,一打開就見到抹茶雪糕、紅豆、白玉及蕨餅,真係淨睇已經好興奮,點知食落真係拍爛手掌,皆因白玉同厥餅完全冇好似其他糯米類的雪藏食品咁變硬之餘,卻仍然保持煙韌狀態,而最底部仲要係有流心煉奶的抹茶刨冰,高質程度簡直可以媲美出面的甜品店。(圖:yukinkolove000@ig,yuka_corochan@ig)

售價:348 日圓(約 25 港元)


焙茶朱古力蛋糕

雖然打開後焙茶的香味唔算太濃烈,但整件蛋糕無論上層的醬及下層的蛋糕都加入焙茶及朱古力製成,食時會 Feel 到焙茶同朱古力味,味道唔會互搶之餘更有一份難捨難離的感覺。圖:0201ayumu@ig、saya.33k@ig)
售價:180 日圓(約 13 港元)


宇治抹茶果凍

使用日本特有的葛粉及宇治抹茶製成,由於用上葛粉,所以除了能減低熱量外(每個只有 89 卡路里),更令果凍質感更煙韌。甘香的抹茶加上底部的黑蜜,兩者絕對係最佳配搭。(圖:matcha.ice_@ig、tomoko_todate@ig)

售價:120 日圓(約 9 港元)


宇治抹茶忌廉包

賣相似泡芙多過忌廉包,包的口感超鬆軟且濕潤,至於內裡的抹茶忌廉 ,雖然份量頗多,但勝在滑得嚟甜度亦剛好,食完一個亦唔會覺得膩。(圖:shaka_photo@ig、marihops11@ig)

售價:130 日圓(約 9 港元)


杯裝檸檬芝士蛋糕

整杯蛋糕分 4 層,分別係第 1、3 層,以西西里島出產的檸檬製成的檸檬醬,以及第 2、4 層的芝士蛋糕,縱然芝士蛋糕的芝味香濃,但配上檸檬的酸,令整體口味非常平衡且清爽。(圖:kashi_1090@ig、ms_ai1031@ig)

售價:220 日圓(約 16 港元)


芒果椰奶布甸

以椰奶布甸配上芒果醬及果肉,齋睇呢個媲美甜品店內點的甜點 100 分的造形,已經透心涼,而食落芒果的微酸加上甜度剛好的椰奶布甸,酸酸甜甜的口味非常適合夏天食用。(圖:wanko.sora@ig)

售價:248 日圓(約 18 港元)

即 like & follow U Travel Facebook / U Travel IG / 旅遊快搜 Facebook 專頁,緊貼世界各地最新旅遊情報!

相關情報