近年水肺潛水愈來愈受歡迎，除了靜靜欣賞水底世界，不少潛友都會在不影響海洋生態的前題下，盡情搞搞新意思，好似有外國潛友就試過落水底玩啤鋤大 Dee 。記者早前到 日本 沖繩 採訪，發現 沖繩 當地潛店都有好多類似的搞鬼潛水玩意，除了海底打麻雀，仲有外國好受歡迎的氣泡槍，可以打埋水底 War Game 添！
記者實試！人生最長的……一舖牌
早前一段香港人在海底打麻雀的影片在網上瘋傳，一探之下，原來是由香港人經營的 沖繩 潛店所拍攝。記者早前到當地採訪，乘機跟住老闆落海底打返一舖。潛店老闆 Kai 哥說：「我哋最初見到水底有好多巨石、廢鐵，忽發奇想落水打牌。點知影片出街之後好受歡迎，如果客人要求，我哋都可以帶你一齊落水打牌嘅！」他指 沖繩 砂辺的潛點水流不急，而且有很多天然巨石或廢鐵，既不影響海洋生態，又可以作為麻雀枱。不過基本條件：要有 Open Water Diver 牌照！同埋湊夠雀腳！
不過睇片好似好簡單，事實水底打牌都好考潛友的潛水功力。教練帶我們在砂辺進行岸潛，把麻雀倒在水底廢鐵上，重量剛剛好，不會浮起四圍飄走。但要在海底想拎牌、碰牌，除了要做手勢示意之餘，更加考潛友的中性浮力，又怕動作太大整跌自己的牌。落水之後動作放慢 N 倍，齊齊變站長，一舖牌足足打了接近 20 分鐘。雖然好花氣力才打完一舖，玩的時候亦靚景欠奉，不過挑戰一次，滿足我這個小賭鬼的心願。潛店老闆 Kai 哥說：「我哋教練自己打就好快，一枝氣夠我哋打足 4 圈。」
同場加映！水底 WAR GAME
玩完麻雀，仲可以玩埋潛店最新引入的氣泡槍 （Torid Pulse）。雖然氣泡槍在國外流行多年，但在 沖繩 暫時只此一家，而且潛店有超過 4 枝氣泡槍，可以約埋一班 fd 子挑戰水底槍戰。
記者和攝記落水親身試玩，氣泡槍的水壓不大，即使打在皮膚，亦不會有任何痛感。不過要留意，氣泡槍直接連接氣瓶，所以玩的時候要時刻留意殘餘氣量。而且持證的潛友，玩一次氣泡槍亦無需額外收費；而無牌的體驗潛水參加者，可以完成第一潛之後，教練再按表現決定第二次是否適合玩氣泡槍。
沖繩潛水 oki dives
基本收費： 1潛 14,000 日圓、2 潛 22,000 日圓 （體驗潛水）； 2 潛 14,000 日圓、3 潛 20,000 日圓 （有證岸潛）
打麻雀和氣泡槍：有證潛友無需額外收費，而沒證體驗潛水，在第二次潛水才可以使用氣泡槍
已包：保險、潛導、裝備及照片
FB：okidives
影 VR 留念 + 玩水底推進器
如果想到 沖繩 必到的「青之洞窟」，建議無牌的潛水新手，跟住由香港人經營的潛店「青潜」進行體驗潛水。除了同聲同氣夠親切，潛店更有專為新手而設的全面鏡，又有 VR 影相、拍片服務，包保你帶住靚相離開。
如果是持潛水執照的潛友，想有少少新意，店內仲有水底推進器，只需握住前方把手，輕按開關掣，後方的螺旋槳就會轉動，最高速每分鐘可達 80 米。超貪玩的攝影師 Ray 親身試玩：「今舖連踢水都慳番，而且好有速度感，玩得勁，仲可以控制推動往上、往下、甚至 360 度轉，勁似玩過山車。」
青潜Best Dive Okinawa
地址：日本 沖縄 懸国頭郡恩納村字仲泊 94 番地
電話：+81 (0)70 3124 7160
收費：體驗潛水 1 潛 9,000 日圓，水底推進器需額外加 6,000 日圓
收費已包括：保險、潛導、裝備及照片；VR 影相拍片一組人需另加 5,000 日圓
文：yuki、相：ray ng、沖繩潛水
↓記得逢星期三3PM入App搶！↓
↓即刻入App睇盡即日/未來7日Chill抵優惠↓
utravel
發表回應