韓國道地連鎖 Salon 平價變韓妹韓仔

好多朋友去韓國旅行，都想體驗一下韓式 salon、剪番個「韓妹頭」，但最怕語言不通，然後搞出事；見到網上介紹嘅弘大、梨大、明洞等旅遊區嘅 salon，或有中英翻譯，但價位多數不太「貼地」，單剪頭髮都要 20,000 韓圜（約 140 港元）起跳，單染頭髮更加要 100,000 韓圜（約 714 港元）起，有啲更以頭髮長度加減價錢，長髮嘅朋友仔荷包就要大出血。

想在兩者之間取個平衡？都唔難，跟記者去韓國 salon，再袋定幾個剪髮常用的韓文單字，同髮型師溝通都可以快而準，做到自己想要嘅效果！

長髮小編曾試過明洞、弘大、江南等旅遊區的知名 salon，亦試過學校區附近嘅平民小店，綜合兩點個人經驗：

1. 知名 salon 未必抵；平民店反而有驚喜！

「出名」與「平民」，其實效果相近，但價錢卻差天共地：江南區某間，漂髮再染髮已經索價 40 萬韓圜（約 2,857 港元），但學校區只需要 6 - 10 萬（約 429 - 714 港元）！

2. 平民店髮型師更順得人

有名氣、定價高的 salon 髮型師，大多堅持個人設計風格，完成後髮型，可能好好睇，但第二三日就難以靠自己去維持；而平民 salon 嘅髮型師多會遷就客人嘅需求或喜好，髮型雖然唔係最新穎，但會係最適合。

小編今次去的 Tory Hair，剪髮只需要 10,000 韓圜（約 71 港元），而染髮 20,000 韓圜（約 143 港元）至 40,000 韓圜（約 286 港元）不等，大家一直深信「一分錢一分貨」嘅道理，似乎未能套用喺韓國 salon！因為小編今次「以髮實試」，效果真係唔錯！

Tory Hair 最近遊客區嘅分店喺 Digital Media City 站，即集 MBC、CJ E&M、SBS 等電視台嘅地鐵站，變身做韓仔韓妹後可以行去放送局睇睇會唔會遇到藝人拍攝。

韓國 Salon 流程

【表明想做的項目】

入 salon 後，職員會叫你喺張紙上面寫低名，然後剔想做嘅部分。入座前職員會先將客人嘅袋放入儲物櫃。

【與髮型師溝通】

要先同髮型師溝通清楚，表明自己想染嘅顏色，務求染髮效果最接近預期。韓文不通的朋友，建議大家自備心水髮色的照片。

小編個人要求：由於在港曾連續染了兩次紅色，現已脫色，今次打算染番普通啡色。髮型師則表示，當時我的髮色太紅，如要達到純啡色的效果，需要漂色再上色；現在如要簡單處理，不如用帶綠的卡其色，去中和原有的紅色，做到更為均勻的色澤。

Step 1：Treatment

Step 2：染髮

色板按色調排列，可以向髮型師要求兩個顏色嘅中間值，例如想要啡色加橙色，係可以幫你額外調色。

相信每個女士都會好糾結到底要唔要瀏海，髮型師指短瀏海、空氣瀏海就比較可愛，留長放側就較有成熟感。

小編埋單：

共 80,000 韓圜（約 571 港元）

小編眼中：港韓 Salon 大不同！

1. 韓國休息、等候區比香港 salon 大。

2. 韓國會主動向客人提供飲品。

3. 香港喺洗頭方面會按摩頭皮，小編在韓幾次暫時都未試過有按摩頭皮服務。

4. 小編最滿意韓國喺染髮劑用量方面較大方，會預備較多，假如染髮效果未達到預期，會再多加染髮劑喺頭髮上，再多染 10 分鐘；但香港就會準備得啱啱好，有時候仲有可能要準備第二盤，會有色差問題。

小編 3 個小建議

1. 自備相片，向髮型師表達想做嘅髮色、髮型。

2. 暑假期間比較多人到 salon 轉髮型，要有心理準備排隊等候。

3. 唔係所有韓國髮廊都有職員識中/英文，是常識吧？小編去呢間剛好有員工略懂超簡單英語，但能否保證溝通無誤？好難講！如果唔想有誤會，都係帶埋個識韓文嘅朋友同行好啲！

Tory Hair 北加佐店 토리헤어 북가좌점

地址：首爾西大門區北加佐洞 377-3 2 樓（서울특별시 서대문구 북가좌동 377-3）

電話：+82(0) 2308 6766

營業時間：星期一至星期六 10am - 10pm（星期日休息）

地圖：按此