上月小編去 東京 工幹,一做完嘢即刻飛去今年 5 月新開幕嘅 24 小時「MEGA 驚安の殿堂」 涉谷 旗艦店,嘩﹗真喺好大間好好買,連埋地庫有 7 層咁多,我梗係第一時間就走咗去 3 樓買化粧品嗰層啦,發現幾樣新奇嘢同好啱夏天用嘅小物,即刻同大家分享﹗
#01【清黑頭小棒】798 日圓
夏天油脂分泌咁勁,喺鼻上面嘅黑頭粉刺特別多,呢枝小棒好方便,只要將附送嘅 Deep Clean Liquid 滴落棉棒,然後喺鼻上捽吓捽吓,就可以清潔到毛孔入面啲污垢同角質㗎喇﹗
#02【W 洗顏機】980 日圓
依家好興用洗面機嚟洗面,不過部部都過千,呢部細細部嘅洗面機就唔使咁貴,而且號稱刷毛幼細、易起泡,重點係 1,000 日圓唔使!
【延伸閱讀】【#瘋台灣】女生也瘋狂! 台灣有個化粧品天堂【延伸閱讀】多啦 A 夢彩粧 打開隨意門變眼影
#03【貓狗面膜】1000 日圓 / 4 枚
Will u be a Cat﹖Will u be a Dog﹖之前好多卡通公仔、人物造型面膜,大家敷面膜時都玩得好開心!今期流行終於輪到好多人都鍾意嘅貓狗,敷住面膜同你隻貓狗玩 selfie 啦。
#04【Alice in Wonderland 眼線筆】1,200 日圓
1 Day Tattoo 眼線筆出名易畫又幼身,漆黑色有放大雙眼效果,仲可以 keep 住全日唔掉色,今次仲出埋個個少女都大愛嘅愛麗絲版,冇辦法唔畀錢!
#05【米妮化妝水】880 日圓
可愛之選不止愛麗絲,米妮都有好多粉絲,今次 Kose 出呢個黑糖精化妝水,用粉紅色加上花花做包裝,加埋米妮真係無得輸,仲送精華乳霜限定試用版,包含美顏油、精華液和按摩霜的功效。
#06【Kitty 創傷液體膠布】798 日圓
可愛公仔陸續有嚟,今次輪到 Hello Kitty,呢個液體膠布好好用,薄薄搽一層就可以保護受傷部位,唔怕濕水,而且細細枝放落小手袋都得,方便隨時攞嚟用。
#07【涼感噴霧】448 日圓
夏天太陽咁猛烈,曬到個人都周身汗味,想即時解決汗臭味,可以喺衫上噴一下呢個噴霧,即時散發陣陣清新花香,仲可以有日本人好興既「涼感」,即喺為你暫時降吓溫咁囉。
#08【殺蟲香水】980 日圓
成枝香水咁,其實係一枝驅蚊蟲噴霧,噴喺天井、牆壁、床單都可以,帶有少少香水味道,而且號稱一枝夠用 200 日,包裝靚到已經好想買,放喺化妝枱都冇問題!
圖、文:Stephanie
↓透過發佈帖文賺取收入!立即參加!↓
↓立即睇打卡熱點/地道美食/住宿指南等!↓