去旅行，除咗行程、機票之外，「住」亦係好重要嘅一環，事關玩完一日要回氣，間房瞓得舒唔舒服好重要。對於好多人嚟講 ，Airbnb 可能係最平最方便嘅住宿，但其實有好多人都試過 Airbnb，從訂房到入住，過程都曾經中伏，唔知你又試過邊個伏？
#1 取消 Booking / 房東冇影
唔好以為訂完房畀埋錢就搞掂，因為 Airbnb 嘅房東隨時可以取消你嘅 booking，事前取消還好，起碼仲有時間搵地方住，有人更試過上機前才收到房東要取消 booking 的訊息。而最冇人性，一定係去到無論拍門、打電話等，用盡任何方法都搵唔到房東，真係又嬲又無助。當然最後錢是有得退，但咁搞法，成個旅程乜 mood 都冇晒啦。
#2 無理收費
有用過 Airbnb 嘅人都知，除咗房間費用外，仲會收取行政費同清潔費，而中伏位就係清潔費方面，有人就試過被房東無理收多 AUD200（約 1,184 港元）的清潔費，理由係因為用咗 3.5 小時打掃，比預計的 2 個鐘多咗 1.5 小時！！！（時薪高到我都想轉行 XD）即係，若然打掃嘅人有心屈你，你根本冇得駁，事關 Airbnb 的回覆指出係合理收費。打掃 15 小時收 AUD350，但 1.5 小時則要收 AUD200，咁都合理？我真係唔識答。
#3 被偷錢
去旅行，好多人都會帶定多啲現金，咁就唔使就住就住用錢，不過並非每次出街都會帶好多現金跟身，有時都會放喺房，嗱，問題嚟喇，有人試過喺只有房東同自己的屋內唔見錢，當然，如果啲錢冇記號的話，報警作用不大。最近就有香港人去泰國時，被打掃員撬爛個櫃偷錢......
#4 騎呢間隔 / 圖屋不附
順利訂到房間順利入住後，唔好以為咁就冇事，因為有網友曾經試過住到一間「零傢俬」嘅房，全屋空蕩蕩，咁有傢俬呢？未可以開心住，旅遊專欄作家林慧美早前去芬蘭時，住的那間 Airbnb，個浴缸竟然唔喺廁所，而係喺洗手盆旁邊，最爆係每次沖涼都要先將水喉駁上廚房嘅水龍頭，然後爬上呢個同洗手盆冇分別嘅浴缸，再拉埋塊浴簾先沖到涼。另外，仲有人表示曾經租過一間房，點知去到發現 Airbnb 的地圖上同實際地點相差 1.8 公里......
我哋仲特別電話訪問了林慧美，她表示在 Airbnb 揀選租住房屋時，已看到所選房屋是「Shower in the kitchen」 ，初時沒有太在意，仲連續 book 咗 5 晚，結果入住先見到浴缸原來就在洗手盆隔離，但她因為平衡力不佳，所以同屋主商議可否由原本的 5 晚轉成 2 晚，幸好屋主好好，可安排修改入住晚數並退錢。「我覺得可能大家生活文化唔同，唔可以怪人哋間屋，有可能當地人嘅屋已好多年歷史唔易作改動，所以如大家接受唔到就唔好勉強。」林慧美補充。
#5 變態戶主
若然你係訂整套房間的話，呢個唔算一個大問題，不過若係住「獨立房間」或「合住房間」（即除咗你以外仲會有其他人或房東出現喺間屋）的話就要小心，因為你有機會遇上任何性格嘅房東，例如呢位網民咁，就遇上脾氣暴躁嘅房東，唔畀開窗、吐口水、房門浴室門唔閂得。另外，亦曾有人被房東禁錮、性侵......都咪話唔恐怖。
雖然有壞房東，但其實 Airbnb 亦有好多好房東，咁壞嘅有冇得預防？盡量睇多啲評價同留意清楚啲細節......若然真係唔想「有機會」遇到以上事情的話，或者都係訂番酒店。
圖：網上圖片、林慧美（May Lam）@fb
↓ 純黑咖啡、冷萃黑咖啡！讓您感受馥郁濃香！↓
↓ 立即分享打卡蛋糕相！↓
utravel
發表回應