自稱一日一即食麵嘅美國博客 Hans Lienesch,經營「The Ramen Rater」網站十幾年,食勻全球即食麵包及杯麵,發表過 2 千多篇試食報告!咁親力親為,所以有一定公信力!最近他剛發表新鮮熱辣「2017 年世界 10 大杯麵排行榜」,入選嘅杯麵部分香港有售,而且就算香港買唔到,飛去買都唔係好遠!
第 10 位:今麥郎 辣煌尚辣子雞麵
判官評語:「麵身寬度適中,麵質不錯有咬感,配料包味道也很好。湯汁味道重,而且辣味十足,連辣度都足可上 Top 10 最辣排行榜!」
中國製,香港 HKTV mall 有售,69 港元 12 碗。
【延伸閱讀】識得食 梗係跟住首相食
【延伸閱讀】杯麵定雪糕? 傻傻分不情!
第 9 位:すみれ 札幌濃厚味噌
判官評語:「麵身靚,夠厚而且有嚼勁。湯有濃郁味噌味,適度嘅油感,配料中嘅肉及筍乾質量都很好。」
日本日清食品製,日本 7-11 有售,278 日圓一碗。
第 8 位:金ちゃん飯店 燒豚杯麵
判官評語:「湯嘅鹹度適中,醬油味香,帶微甜味。最特別燒豬肉片,湯汁滲入肉片中食落非常美味,加上有香蔥和筍做配料,係一碗非常驚喜嘅杯麵。」
徳島製粉製,日本有售,290 日圓一碗。
第 7 位:日清 拉王背脂醬油拉麵
判官評語:「麵質非常好,又有嚼勁,湯汁濃厚有濃濃醬油味,味道滿意。而且有很好的叉燒肉片。」
日本日清食品製,香港 HKTV mall 有售,23.9 港元一碗。
第 6 位:滿漢大餐 珍郁豬肉麵
判官評語:「首先,麵身比一般的粗,但泡後比想像中的腍身。湯汁有超凡的豬肉味,味道更有別於其他杯麵品牌,豬肉塊及配料的味道都好好。」
台灣統一企業製,台灣有售,NT$ 79 一碗。
第 5 位:滿漢大餐 麻辣鍋牛肉麵
判官評語:「麵條闊身,便於咀嚼而且量多。肉湯不會過油,而且有很好牛肉味,而且有符合期望的辛辣味,牛肉粒夠大粒而且量多,配料中也有不少辣椒。」
台灣統一企業製,香港 HKTV mall 有售,16.9 港元一碗。
第 4 位:TTL 麻油雞麵
判官評語:「有好香米酒味,而且有足夠份量、大小適中的雞塊,絕對值得一試。」U Travel 記者免奴蛙更建議把杯麵麵餅及麻油雞連配料用鍋煮,「麵質會即時去咗另一個層次!」
台酒 TTL 製,台灣 PChome 購物網有售,NT$ 525 12 碗。
第 3 位:辣颶風 拉面炒年糕
判官評語:「整杯都是紅色!有很充足的辣醬,麵身有嚼勁,年糕口感也出色,是我曾經食過最好味杯麵之一,由去年第一位輕微下跌。」
韓國製,發售點不詳。
第 2 位:日清 行列のできる店のラーメン海老擔擔麵
判官評語:「不需加料就已經好有份量,麵條優質,湯汁有濃厚的蝦味,配料豐富而且有咬口,非常驚喜。」
日本日清食品製,日本售 290 日圓一碗。
第 1 位:小廚師 泰式綠咖哩雞麵
判官評語:「我對這杯麵味道非常震驚!首先,它偏有兩個碗,泡好後可以把麵湯及麵餅分開,粟米、香菜等配料也充足,雞肉份量多,最正係辣味青咖哩醬,混合起來吃超美味!」
U Travel 特派員 Joey 在台試食:
特派員試食報告:「我去過頂好、全聯、7-11、全家、一般超市都搵唔到,最後在 Pchome 網購,盛惠 NT$ 90。知道被選為杯麵第 1 位就非常期待,但實質上個人認為並非冠軍級數。首先麵量比一般台灣嘅杯麵細,質地普通,食落口感亦唔算特別彈牙。最出色係包青咖哩醬,一打開就好香,清楚聞到檸檬草、椰奶的香味,醬包中仲有紅辣椒。雖然醬汁唔算好辣,但條辣椒有一種認真嘅感覺,醬汁亦食落更有即煮 feel,至於雞肉份量同質地就算正常。不過,湯粉包是多餘的,可以唔使沖,因為得個鹹字,總括嚟講,一試無妨,但唔會特登再買,因為 NT$ 90 太貴,喺台灣已經可以買個食得飽嘅飯盒。」
文章及部分照片來源:The Ramen Rater
↓ 請您免費飛轉日/韓/泰!↓
↓立即睇打卡熱點/地道美食/住宿指南等!↓