如果去旅行時喜歡選擇舊城區散步嘅話，摩洛哥嘅舍夫沙萬絕對啱你胃口。沿住高高低低嘅小路、周圍都係深淺各異嘅藍色小屋，仲有當地人悉心佈置嘅窗紗同門廉，一片夢幻藍，遠睇誇啦啦，近睇其實佈滿幾許風雨嘅生活痕迹。正正係呢啲咁貼地嘅絕景，欣賞景色同時感受當地人生活，先可以體現旅遊嘅真樂趣！
藍的歷史
唔講唔知，原來摩洛哥舍夫沙萬（Chefchaouen）嘅藍色山城建於 1417 年，當年用嚟抵擋葡萄牙軍隊入侵嘅圍城，名為 Kasbah。地理上靠近地中海，山頭全部都係雪松木同絲柏，相比起摩洛哥其他地區，舍夫沙萬感覺竟然有少少似歐洲小城。
但係 15 世紀時，舍夫沙萬仲未變成藍色。而係去到 30 年代，由猶太難民「引入」。有人喜歡藍，因為佢哋認為藍色代表天空同天堂，大熱天時望住呢種粉藍色，確係寧舍舒服。而最重要嘅係，呢個天堂藍色原來仲可以驅蚊，蚊香都慳返！
呢度唔會睇到啲咩壯麗山河，相反只要慢慢享受山城每一刻，就會感到平靜、放鬆，同埋由他人嘅生活點滴中得到趣味。
Plaza Uta el-Hammam 上的生活點滴
Plaza Uta el-Hammam 係舍夫沙萬嘅心臟，烈日當空，街上得返啲細路仔喺度玩，大人都匿喺室內避暑。一到黃昏，Plaza Uta el-Hammam 即刻熱鬧起嚟，叔叔伯伯們喺廣場中心嘅茶檔打牙骹，喺雪松木下唞涼。後生女坐喺另一邊傾偈，連小販檔都陸續開始出現。
場面其實很似我哋細個時舊式屋邨嘅公園，係小社區約定俗成聚首一堂嘅老地方。身為遊客即使未能打成一片，但只要坐喺廣場旁邊嘅咖啡店，一邊呷着摩洛哥著名的薄荷茶一邊觀察，都足以樂在其中。
摩洛哥最地道家常菜
Sofia Restaurant Cuisine Traditionelle 餐廳位於廣場後一個露天小陽台，地方不大，只有十張枱左右，所有菜式都由 Nora 同兩三位女員工負責，做出最家常又最美味的摩洛哥菜。
喺摩洛哥食得最多嘅就係圓錐形陶煲 Taijne 燜焗而成菜餚，一般多以檸檬雞或牛為主。Nora 嘅一味西梅羊肉 Taijine 卻驚為天人，帶筋的羊肉燜得極腍，微微有西梅香，以麵包蘸着汁吃，瞬間掃清。假如喺舍夫沙萬只能吃一餐，Sofia 絕對係唯一選擇。
Sofia Cuisine Traditionelle
地址：Place Outa Hammam Khadarine Escalier Roumani Chefchaouen
營業時間：11am-11pm
買地毯靠牙力
舍夫沙萬的羊毛紡織與地毯非常有名，Dar Moulay Idriss 係一間合作社，附近婦女織地毯幫補生計，店內仲有傳統梭織機，有一位師傅在示範地毯織法。地毯的確好看，觸感紮實、Berber 的圖案亦充滿趣味。但在摩洛哥購物，講價卻是常識，小地毯價錢約 150 港元至 300 港元不等，視乎牙力。
Dar Moulay Idriss
地址：Zanka, Bain Souaki, Hay Al Andalaus, No 15
電話：+212 05 3998 8510
營業時間：10am-8pm
住傳統 Riad 送你絕景早餐
Riad 即摩洛哥傳統的花園洋房，花園位於中庭、窗戶較少，私隱度高，以保護女士們可以在家中自由活動免被外人看到。舍夫沙萬山多平地少，Riad 規模細係細啲，但當中 Dar Gabriel 都被 Lonely Planet 選為城中「The Best Breakfast」。
的骰嘅 Riad 只得 7 間房，每個房間都以當地的紡織品作點綴，用色都不盡相同。三樓近天台的 Titrit，木門用咗雪松木，不斷散發香氣，仲有個私家小陽台。不過最不得了嘅必數佢個天台，充滿北非風情，七彩地毯同梳化，遠眺舊城區風景，仲可以望到黃昏景色。早餐？其實都係嗰啲鮮榨橙汁麵包配果醬，硬係覺得望住個靚景歎住食，食乜都甜啲！
Dar Gabriel
地址：Bab el Souk, Chefchaouen, 91000, Morocco
電話：+212 5399 89244
房價：雙人房每晚 約 500 港元起
去到邊 Share到邊～立即記錄您的生活足跡！
↓ 照顧哂您成個護膚程序！打造亮白光感肌！ ↓
utravel
發表回應