【飛行常客】 10 個只有空中服務員知道的小秘密

2017.05.27
2017.05.27
喺空中服務員嘅角度,乘客最好簡簡單單,唔好咁多要求,冇乜麻煩就已經好開心!但係我哋客人嘅角度,當然要盡量享受機上嘅服務啦!原來,喺飛機上面有咁多小細節,而呢啲係空中服務員唔會想我哋知道嘅事嚟,好,今次我就將機上 10 個細節大曝光!

#1 絕無尷尬!飛機餐可叫多份!

如果你食完飛機餐仲見肚餓,唔好怕尷尬,勇於向空中服務員查詢啦,因為多出嘅飛機餐會喺航班降落後立即丢棄,正所謂「食得唔好嘥」嘛!當然,飛機餐都未必成日有剩,但可以照問咗先啦!(圖:indepenttraveler.com)

【延伸閱讀】機上 Wi-Fi 勁方便 卻暗藏 4 大漏洞?

【延伸閱讀】6 個不能買的手信 

#2 Check 真啲!救生衣還在嗎?

唔好覺得古怪,根據我啲空姐朋友話,的而且確有乘客試過偷救生衣落機,所以機上經常會「遺失」救生衣。所以為安全起見,check 吓穩陣啲!(圖:media2.kshb.com、sportys.com)

#3 機上禁煙!但飛機依然有煙灰缸?

坐過飛機嘅人都可能疑惑過,明明飛機上不准吸煙,點解機上洗手間仲會有個煙灰位?(圖:media.cntraveler.com)

千祈唔好以為航空公司「默許」你機上吸煙,是咁的,雖然機上禁煙,但難保有乘客想破戒,走入洗手間吸煙㗎嘛,而帶溫度嘅煙頭、煙灰都需要慎重處理,唔可以隨便丟入馬桶,所以航空公司點都喺洗手間安裝一個煙灰位啦!(圖:talkingpointz.com)

#4 枕頭、毛氈從未清洗!

 

當乘客下機後,空中服務員隨即進行簡單嘅清潔工作:重新摺好枕頭毛氈(有啲仲會放番入透明膠袋內,扮作從未拆開、新包裝咁㖭!)、清走座位垃圾。而食物餐盤、用餐嘅枱仔,甚至安全帶亦從來都唔會清洗、抹拭!所以以後上到機,第一件事就係先用消毒酒精將所有有機會觸碰到嘅物件全部抹一次!(圖:i.huffpost.com)

#5 洗手間可從外面打開!

空中服務員都會有鎖匙從外面打開洗手間門,以防有人喺入面發生意外。如果新式嘅飛機,基本上連鎖匙都唔使,扭一個掣,洗手間道門就可以打開。(圖:img.providr.com)

#6 最後一個登機

如果你同朋友分開 check in 嘅話,位置未必會咁啱編到一齊坐。咁你就可以:做最後一名乘客登機。因為咁,通常機上乘客放低隨身行李後就會安坐「位置」,咁你就可以睇吓有咩「吉」位選擇,甚至你可揀任何「吉」位坐,正!(圖:a.scpr.org)

#7 酒精害人!降落前咪飲

有時都明,飲酒可以 relax 啲,不過之後又要擔心另一個問題:太 relax,唔通大家冇聽過「醉酒乘客喺機上鬧事」嘅新聞咩?(圖:s2.amazonaws.com)

有專家研究過,喺天空中飲一杯酒,等於喺地面上飲兩杯酒。為免自己發酒瘟,都係少飲為妙。(圖:e3.365dm.com)

 

#8 唔好坐!看似寬闊嘅間隔位

間隔位 Bulkhead seat,即係飛機分隔牆嘅第一排座位,齋睇相片都覺得座位寬闊,仲可以調校座椅斜度而唔驚阻住其他乘客,某啲航空公司要加錢先畀坐呢排座位㗎!(圖:c1.staticflickr.com)

不過,喺空中服務員嘅角度,呢個位其實唔太舒適。因為間隔位通常最先安排畀有嬰兒嘅乘客,間隔牆上容易設置嬰兒床,畀乘客可以抖抖,唔使全程都抱住 baby!所以,坐得呢一排,多數都會聽到嬰兒嘅喊聲、扭計聲等等。加上如果間隔嘅背後係洗手間嘅話,仲會成日聽到開門關門聲、沖水聲㖭!(圖:bravasinthesun.com)

#9 只飲樽裝水

一直都聽講,飛機上用嚟裝熱水嘅水箱係 10 年都唔洗一次,細菌係幾何級增長,不過每次搭飛機仲係會聽到啲乘客叫咖啡、茶。唉,面對現實啦,依家啲航班愈嚟愈頻繁,連清理座位都唔夠時間,空中服務員仲點會有閒情逸致去清洗水箱呢?所以喺機上,要飲就飲樽裝水或其他飲品啦!(圖:i.startsatsixty.com.au)

 #10 着陸成功要鼓掌?空姐最憎!!

喺某啲國家,乘客會喺飛機成功着陸至地面時會拍掌叫好,我明白乘客嘅一顆「感謝的心」,不過其實空中服務員不太受落,因為佢哋覺得只係做好本分。額外嘅鼓掌會令佢哋覺得,一個安全舒適嘅航程似乎難得地遇上了,變相仲好似侮辱咗佢哋㖭!(圖:thegalwayticker.files.wordpress.com)

 

即 like & follow U Travel Facebook / U Travel IG / 旅遊快搜 Facebook 專頁,緊貼世界各地最新旅遊情報!用WeChat掃一掃下面QR Code,follow埋U Travel精選內容!

相關情報