一嘗馬來西亞最貴河魚皇 $2,000 一公斤 | U Travel 旅遊資訊網站

澳門快閃遊

郵輪公海遊

其他目的地

正在閱讀
一嘗馬來西亞最貴河魚皇 $2,000 一公斤

文: U Travel 小編 KeroB

2017.05.23

「忘不了」呢個咁有詩意嘅名，諗都諗唔到原來係一條魚！其實佢係馬來西亞最貴嘅河魚皇，一公斤 $2,000 港元，原名為「empurau」，當地華人稱之為「恩布佬」。咁究竟「忘不了」呢個名點得來？網上流傳係取自「恩布佬」諧音，真假無從考究，總之食完唔會唔記得啦！

問到點解「忘不了」咁貴，餐廳經理直言因為係極罕有，唔係話食就食到，要預先訂購，果然物以罕為貴。「忘不了」被稱為馬來西亞淡水魚皇，係野生河鮮，喺水流湍急嘅河流生長，食風車果長大，所以魚肉帶有果香。據說「忘不了」生長速度好慢，要幾年先長到 2 公斤，而且捕捉唔容易。馬來西亞政府規定，只有原住民先可以捕捉，防止被過度捕獵。

餐廳經理話，因為而家需求大咗，多咗好多人工飼養「忘不了」，仲有半野生放喺河度養嘅。經理就教我哋點樣分，純野生「忘不了」色澤帶紅和金色，而半野生就色澤偏白，冇咁靚。

未食之前，喺餐廳魚缸見到「忘不了」真面目，我對魚冇咩認識，就覺得佢嘅外型同平時嘅魚冇咩分別喇（唔識貨～），但聽到個價錢就即刻雙眼發光，一陣一定要試真啲先得！我哋當日食嘅「忘不了」來自東馬的砂勞越，經理話野生「忘不了」送到餐廳後最多只放一日就要食，因為佢哋適應唔到魚缸嘅水質，亦可確保新鮮。「忘不了」最大可以生長到 20 公斤，但 2 公斤左右嘅「忘不了」係最好食。我哋當日食嘅「忘不了」重 2 公斤，盛惠＄4,000！

廚師啱啱拎蒸熟嘅「忘不了」出嚟時，即刻被佢個樣嚇親，用「其貌不揚」嚟形容絕唔過分。魚鱗全部豎起晒，嘴角仲有 4 條鬚，有晒「魚皇」架勢。今次做法係清蒸，放斑蘭葉喺底部，可帶出香味。

廚師即場喺我哋面前將魚鱗刮落嚟，「忘不了」嘅魚鱗係可以食㗎，直接食或者油炸都得。當日我就直接試食咗一塊，帶着魚皮嘅香味，口感爽脆，似薄薄嘅軟骨，仲可以酥炸來食㖭！

加埋薑，豉油同芫荽，就食得喇！

經理話「忘不了」要食到第二三啖，香味先慢慢出嚟，仲會愈來愈香，最好食係魚腩部位，魚油濃郁，仲有果味，要即刻試食！魚肉入口即融，唔似食緊魚肉，仲有一陣獨特嘅香甜味，但我就唔知道風車果係咩味，不過真係好好食！

將魚鱗酥炸，再加埋葱蒜辣椒，食落香口，好似食緊薯片咁，唔講都唔知食緊魚鱗。

網上有好多人都吹捧「忘不了」，究竟係因為佢嘅味道定係價錢而令人忘不了呢？點都好，我諗我都唔會唔記得呢條魚㗎！

相：Ricky Ma、部分照片取自東陽海鮮飯店及網路

鳴謝：永安旅遊、東陽海鮮飯店

↓《社群》「個人地圖」功能登場↓
去到邊 Share到邊～立即記錄您的生活足跡！

↓【限時搶連環賞】Cetaphil舒特膚透亮抗敏系列！↓↓
↓ 照顧哂您成個護膚程序！打造亮白光感肌！ ↓

即 like & follow 我哋，緊貼世界各地最新旅遊情報！

UTravel Facebook

UTravel Instagram

發表回應

下載App新會員送150積分換獎賞

團長UU熊

在線上