只要去過日本一次嘅遊客,都會被交通費嚇親! 所以出發前,必需搵吓有咩交通優惠卡最適合自己。最近大阪市內旅遊市適用嘅交通卡更新優惠內容,即刻為大家介紹 4 款最著數推介:
#01 「大阪周遊卡 2017」新增超值免費入場景點
簡介:憑大阪周遊卡,可無限次乘搭大阪市內巴士及電車,包括大阪市營地鐵、新電車、大阪市區的私鐵:阪急、阪神、京阪、近鐵和南海電鐵(留意 2 日券不可搭乘私鐵),還可以免費進入多達 35 個遊樂設施,另加 70 間以上大觀光購物食店優惠。
售價:1 日券 2,500 日圓、2 日券 3,300 日圓
好處:由於大阪周遊卡每年都更新內容,今年就新增 8 個可以免費入場景點*,包括大阪城御座船、中之島水上觀光船,最吸引係可以玩埋入場費已經盛惠 2,300 日圓嘅 Legoland Discovery Center Osaka,搭程車齋玩呢個 Lego 室內樂園已經抵返晒!
10 個首推免費入場項目 | 平日收費 |
LEGOLAND Discovery Center Osaka(新增!) | 2,300 日圓 |
Tombori River JAZZ Boat | 1,800 日圓 |
大阪水上巴士 Aqua-Liner | 1,700 日圓 |
大阪水上巴士天滿橋絕景觀光船(新增!) | 1,500 日圓 |
大阪城御座船(新增!) | 1,500 日圓 |
中之島水上觀光船(新增!) | 900 日圓 |
天然溫泉 浪速之湯 | 800日圓 |
通天閣 | 700日圓 |
大阪城天守閣 | 600日圓 |
HEP FIVE摩天輪 | 500日圓 |
對象:最適合未去過大阪嘅遊客
抵買度:5 星
注意:
-免費入場設施,必須在乘搭電車或巴士當日(2 日券為連續兩日)使用,有部分設施不能同一天使用
-交通機構的使用時間為開始使用日的首班車至末班車(並非開始使用後24小時 / 48 小時)
-無兒童版
-不可由南海國際機場站開始使用
#02 「大阪地鐵・巴士 1 日乗車券」一天內搭 3 -4 次車就抵返
簡介:可一日之內無限次乘搭大阪市營地鐵、新電車及巴士。另加超過 30 處觀光優恵。
售價:550 日圓
好處:行程計畫唔使因為要用盡優惠而綁手綁腳;一日內搭巴士 3 次或最短程地鐵 4 次就抵返。
對象:唔買「大阪周遊卡 2017」,又會一日內多次搭乘大阪中心區域地鐵或巴士嘅遊客
抵買度:4.5 星
#03 「Enjoy Eco Card 1 日乘車券」獨有兒童版
簡介:可一日之內無限次乘搭大阪市營地鐵、新電車及巴士。另加超過 30 處觀光優惠。
售價:成人平日 800 日圓、周末及日本假日 600 日圓,兒童 300 日圓
好處:與 #02 「大阪地鐵・巴士 1 日乗車券」使用範圍一樣,平日於一天內搭巴士 4 次或最短程地鐵 5 次就抵返,著數位在於設有兒童版,而且地鐵站內自動售票機就買到,購票容易。
對象:小朋友、錯過了指定地點購買「大阪地鐵・巴士 1 日乗車券」的遊客
抵買度:3 星
#04 「大阪海遊卡」大阪市內版 抵住玩海遊館
簡介:包海遊館入場及同一日之內無限次乘搭大阪市營地鐵、新電車及巴士。另加超過 30 處觀光優惠。
售價:16 歲以上 2,550 日圓、7 - 15 歲 1,300 日圓
對象:一日內會去海遊館,兼多次搭乘大阪中心區域地鐵或巴士嘅遊客
好處:與 #02 及 #03 使用範圍一樣,唯海遊館入場票本身已經分別需要 2,300 日圓(16 歲以上)及 1,200 日圓(7 - 15 歲),所以再搭 2 程巴士或短程地鐵 2 次就抵返。假設你花半日參觀海遊館,其餘再加 2 個行程,用「大阪海遊卡」乘車、享受景點玩樂優惠就抵哂!
抵買度:4.5 星
↓ 請您免費飛轉日/韓/泰!↓
↓立即睇打卡熱點/地道隱世美食/必買手信等!↓