【潮日放送】 日本 3 大機場 邊買邊玩攻略

2017.05.23
文 : U Magazine
2017.05.23
旅行完到機場,你通常會做乜?走去兌返啲日圓做港元坐定定等上機?定係要盡興到上機前一刻?作為一個專業嘅旅行精,當然係後者,尤其依家日本好多機場都勁好玩!仲可以買到有好多限定版手信!真係早啲去機場認真玩返日都唔算過份!

 【北海道札幌新千歲機場】

只要上網打「札幌新千歲機場」就會出現「太好玩」、「可以逛一整天」,以及「好買又好食」的結果,實際上這個機場絕對適合大家預留一日去行去玩!話呢度係一個巨型遊樂場真係一點都不為過!

 

Sanrio 粉絲手信基地 

國內綫航廈 3 樓的「Hello Kitty 快樂飛行公園」,入去玩只需 800 日圓(約 55 港元),裏面有 8 大主題,由空服員 Hello Kitty 帶大家走入世界不同地區的場景拍照、玩體感遊戲,以及參加工作坊等,除了 Hello Kitty,其他 Sanrio 角色都有自己嘅主題小區,如果每個區域都玩齊,相信要預留兩個鐘先夠時間玩。旁邊仲有主題 cafe 畀大家休息。當然唔少得要行埋「快樂飛行商店」,有大量北海道同新千歲機場嘅限定商品,買手信冇煩惱!
 
星光大道在黑暗中投射 Kiki & Lala 的極光世界,幾浪漫。
Sanrio 版的魚尾獅互動遊戲,原來已經進入咗亞洲街道區域。

限定!限定!限定!買限定版手信真係好重要!

主題 cafe 每日限定供應嘅新地,只售約 55 港元,隻杯仲可以拎走,當係買隻杯都抵。
 
HELLO KITTY HAPPY FIGHT 歡樂飛行小站
位置:札幌新千歲機場國內線 3 樓
營業時間:10am-6pm
費用:成人約 55 港元,小童約 27 港元,3 歲以下免費入場


冬甩個爸爸 法寶任玩任買 

同樣位於 3 樓的「多啦 A 夢空中樂園」,相比本身係 fans 嘅本尊,其實更受家長歡迎,因為唔使畀錢入場,已經有「細蚊仔放電區」!為人父母嘅真係感動到喊出嚟!巨型豆沙包滑梯足以令一班細路玩到大叫大笑,阿爸阿媽終於可以喺旁邊坐低休息下。付費區費用都只係 55 港元左右,可以在館內參加工作坊,繪畫多啦 A 夢的模型,塗上自己心目中的顏色,仲可以帶走,小朋友最開心!

立體彩繪只需 68 港元,唔畫就咁買走純白模型都開心。
限定商品每幾個月就會有新款,永冇悶場。

連多啦 A 夢嘅著名法寶時間布都有得賣,正!
燒餅有紅豆、奶油及抹茶選擇,約 25 港元。即刻食又得,當手信又得!


多啦 A 夢空中樂園
營業時間︰10am - 6pm(最後入場時間為 5:30pm)
費用:成人約 55 港元,中學生約 34 港元,小學生約 27 港元,2 歲以下免費入場


甜品水產手工藝乜都齊

如果想掃手信,必到國內綫候機樓 2 樓的「甜品街」,13 間北海道甜品的店集中於此,試食買手信一 take 過!被稱為朱古力仙境的 Royce' Chocolate World,除了可以買到特別版的 Royce 朱古力外,更可以在落地玻璃外看整個製造朱古力的過程,絕對是最佳的免費娛樂。

Royce' Chocolate World 零零捨捨喺國內綫航廈大樓 3 樓,唔好去錯。

另外道產子產地直銷市場(どさんこ產直市場)區域,位於國內綫航廈大樓 2 樓,有著北海道的地道農產及水產商店,當中好多水產都係由札幌市中央批發市場的水產中介商所售賣,即是機場與水產市場賣的水產毫無分別,同樣優質!
成隻北海道毛蟹帶返香港慢慢拆,約 782 港元。

除了對食有興趣,同樣喺國內綫航廈大樓 2 樓嘅 Craft Studio 可以一次過睇晒北海道唔同地區嘅手工藝,除咗一般都會見到嘅玻璃,木工及陶瓷製品、擺設,更有手工護膚品同清潔用品等,每一樣產品都有標明產地區域,夠晒細心。
出自札幌嘅針氈綿羊,勁得意!約 118 港元。




【大阪關西國際機場】


同北海道唔同,關西機場真係一間店就 KO 晒各位旅客剩低嘅日圓︰呢間店嘅名字就係叫 BEAMS Planets。店中一半位置都是賣佢哋同其他品牌嘅聯乘商品。必買嘅當然係同袋王 Porter 合作有 B 印 Yoshida,機場別注版 Global Standard (GS) 系列的背包和配件,只有成田機場同關西機場獨有!最正係價錢實惠,比普通 Porter 袋平一截,而且顏色選擇多,尤其是多色尼龍大背囊長賣長斷,大路顏色更是影都唔見,一早被人掃清光。 

Global Standard 背包極度搶手,黑白藍等易襯顏色每次返貨都會被極速掃光。

detourlife 帆布 tote bag 4,800 日圓(約 326 港元),使用舊廣告橫額改造而成,每個袋身的字樣都是獨一無二。

fennica x Moonstar 久留米絣布布鞋 12,000 日圓(約 815 港元)、藍染雪太 14,040 港元(約 953 港元)

扭蛋機內是傳統鄉土玩具,抽一次 400 日圓(約 27 港元)包括達摩和據稱有除病之用的「雞與猿」混合神獸等。


關西空港 BEAMS Planets
地址:大阪関西国際空港旅客ターミナルビル3F 
電話:+81(0)7 2447 5802


【沖繩那霸機場】

日本機場出名多手信,偏偏沖繩那霸機場的國際綫大樓就細到難以置信,除咗得兩間餐廳外,手信店亦只得小小一間,入閘後選擇亦乏善足陳。假如想要最後衝剌,建議可稍移玉步到旁邊以天橋連接的國內綫大樓。從國際綫大樓步行約 5 分鐘便會見到一整個離境大堂都係手信天堂!由最大路的紅芋、黑糖、海鹽產品以至海葡萄、沖繩不同島嶼出產嘅原隻菠蘿、芒果同埋各色水果,真係應有盡有!不過來回國際綫及國內綫機場需時,建議預留多點時間。如果時間鬆動嘅話,仲可以去埋國際級大樓 4 樓嘅觀景台,可眺望飛機升降,天氣好時尤其爽!

Royce 沖繩限定石垣海鹽朱古力薯片,54 港元。

沖繩石獅造型面膜超可愛,記得液體類要放托運行李!70 港元。

原隻菠蘿抬上機,價錢由 35 至 70 港元一個不等。

連海葡萄都有得賣,果然係手信天堂。


那霸空港

即 like & follow U Travel Facebook / U Travel IG / 旅遊快搜 Facebook 專頁,緊貼世界各地最新旅遊情報!用WeChat掃一掃下面QR Code,follow埋U Travel精選內容!