旅遊記者總是身不由己。去年因工作逗留奧斯陸一周,不是不喜歡她,只是內心納悶:喂係人都知挪威的美並不在首都,而係野外的好山好水!其實你係度做乜?所以一放假,我決定自己玩!由首都出發,一直到北極圈去,遊歷山脈海峽島嶼,一人十一天光棍窮風流:遠足、野營、瞓機場、睡沙發、平酒店、截順風車,有些從前冇諗過夠膽 / 需要做,原來「開咗個頭」就會順理成章的發生下去。途中我學會了最少五件事,重中之重是,發現自己的 comfort zone 原來比想像中闊一點、大一點!
#01 土地,本應屬於所有人。
外國月亮特別圓、空氣都甜啲?唔知,但挪威嘅土壤,確實係自由嘅。同歐洲多國一樣,挪威沒有「土地問題」,早於 1957 年已落實「漫遊自由」條例(Allemannsretten,英譯 all men's right 或 right of access),未被開發的土地,可供人自由使用,當然大前提是用家同樣尊重別人,帳幕須與建築物距離 150 米。
野外露營,就是享受這個國家的奇山異水的最直接方法,熱愛行山之友必定認識挪威南部幾個著名峽灣景點:布道台 Pulpit Rock、謝拉格山 Kjerag 和巨人之舌 Trolltunga。不過我一早鎖定了北一點的 Besseggen Ridge,皆因每年 9 月,該處的 Gjendesheim 會舉行山中電影節 Fjellfilmfestivalen,三日兩夜享受著「漫遊自由」條例,野營、睇戲加行山,絕對是個精采體驗!
【三日兩夜,野營山影祭】
這個國內最大型的野外電影節已經舉辦第六年,每年 4 月,近千張通行證網上一出即被秒殺。出發前,其實我一直買唔到飛,但還是決定唔理照去:一來山中野營本是自由,加上 9 月以後,由奧斯陸直達 Gjendesheim 的專綫巴士已經停駛,如非自駕,交通係一大問題,而利用官方安排的特別班次就可以一程車到埗。事前網上買好車飛,我就同兩大車營友一齊熬足 6 粒鐘巴士,下午 3 時順利到達;傍晚時分在其他營友指導下,我成功透過一個非官方 facebook 專頁撲到黃牛飛一張,仲只需 956 港元,比原價平 300 蚊!後來三日我都可以順利進入會場和旅舍範圍睇戲聽歌,使用洗手間、充充電和飲番杯!
Fjellfilmfestivalen 2017
網址:fjellfilm.no
日期:2017 年 9 月 8-10 日
票價:DNT 會員 888 港元,非 DNT 會員 1,296 港元(為今屆票價,下屆價格請留意官網,2017 年 4 月預售 )
地點:Gjendevegen 9, 2683 Tessanden, Norway
交通:由奧斯陸市中心自駕到 Gjendesheim 約 4 小時,夏季可乘搭 NOR-WAY Bussekspress 巴士來回,由奧斯陸機場出發,車程約 6 小時,單程票價 513 港元
#02 條路自己揀,___唔好喊!
親親大自然係挪威人生活一部分,在郊外置間 summer cabin 係等閒事(奧斯陸周邊的山小屋,3、40 萬港紙已有交易),更普遍的當然是郊遊遠足。有 140 年歷史的 Norway Trekking Assocation(DNT),至今開發了全國遠足網絡共 2 萬公里、旅舍超過 500 間,係登山愛好者嘅天堂。不過沒有中港台那種將行程鉅細無遺地分享的行山 blogger、達人,要 plan 自由行,就全靠 DNT 官網。網站提供國內的路綫、互動地圖以及周邊 DNT 住宿,睇落資料齊全;真人實試過,又是咪咁可靠?
【Case study】
行程第六日,經歷完首晚瞓機場、兩晚山影祭、一晚過夜火車和一晚 couchsurfing 後,我來到挪威西北部的羅浮敦半島,準備由小鎮 Sørvågen 出發,登上標高 500 米的 Munkebu 山小屋。
UT.no 講明難度係中級 medium,4.7 公里路程,約 2.5 小時已可完走。但是問題來了:當日一直陰雨,我趁下午 4 時雨停後才出發,原來係要走過泥濘山澗、游鐵索攀上石崖,我爬咗咁多 blog 都冇講過嘅?而本人係背負着約 55 磅的超巨型背包!出動行山雙仗,每 15 分鐘就要小休回氣,足足 4 小時後,我先行到一半,已屆傍晚,天色開始轉暗,惟有就地紮營翌日再戰。
又好彩,夜雨後,早上回復風和日麗,我將細軟留在原地,改以輕裝上陣--還是要行多兩粒鐘先到 Munkebu!原定計劃再花兩小時登上海拔千米、羅浮敦西部最高山峰 Hermannsdalstinden,奈何我已經嚴重 behind schedule,為趕巴士去下一站,無奈放棄登頂!Lesson 好簡單:唔好高估自己嘅體能,更絕對不能低估山路的難行程度--喺香港行兩粒鐘石屎徑同挪威兩粒鐘山路,係完全兩回事--時間預算又最好鬆動啲,如不幸遇上壞天氣,路只會更難行,不如改計劃,唔好死頂!
#03 裝備的重要性。
獨遊挪威,出發前聽得最多的是:「嘩你唔怕危險呀?」和「你唔好死呀!」其實自己知自己事,本人雖野心勃勃,但唔敢 take 的 risk 絕對唔會 take,而其實所謂危險,其實有得預防,我肯肯定今次在裝備上做到足,應該就唔死得……意外另計。
#04 羅浮敦,I’ll Be Back!
羅浮敦群島(Lofoten Island),很多人的旅遊 bucket list、自駕友的天堂。有說她是世上最美麗的島嶼,今次先玩挪威大陸,再從 Bodø 乘船登岸,感受更深。須知道羅浮敦分為六大主島,外加過百小島,山多平地少,袖珍的山脈往往直接連着大海,山水細膩精緻;而我竟然只預留 4 天邊走邊睇。今次趁大晴天攀登過南半島「最危險頂峰」、欣賞到小鎮 Reine 的全景,晚上在鎮外公路旁紮營還看到北極光,也更是此行的意外收獲,雖然仲有很多隱世海灘、絕色小鎮未去。繼續上路時我同自己講:Lofoten,I willl be back!
#05 Be Water, My Friend。
人人都說北歐旅費唔嘢少,挪威尤甚,但家陣啲機票平到四五千蚊有交易,窮遊是否可行,往往睇你點 plan。外食最燒錢(如在北極圈城市 Tromsø ,普通一個 Burger King 套餐盛惠 160 港元),自煮才是王道,超市物價其實同香港差無幾,300 港元左右的食材基本可頂到三、四天。住宿方面,10 月打後野營將會是極限限運動,還是 hostel 和 couchsurfing 幫到手;而我不幸地在北部城市 Tromsø 被 couchsurfing host 甩底,漏夜搵平價酒店,單人房價 500 港元算超值。人在旅途多麼險阻?總之 be water 啦 my friend,「go with the flow」永遠係出門金句!
【窮遊挪威 10 天行程】
奧斯陸機場出發乘坐巴士
Day 1-3:Gjendesheim 山中野營 + 夜行火車前往 Trondheim
Day 4:Trondheim 觀光+沙發客
Day 5:Bodø 觀光 + 乘船往羅浮敦
Day 6-8:The Lofoten Islands 羅浮敦觀光 + 野營
Day 9:Harstad 觀光+沙發客
Day 10:Tromsø 觀光+酒店
Day 11:Tromsø 轉機往瑞典
↓ 請您免費飛轉日/韓/泰!↓
↓立即睇打卡熱點/地道美食/住宿指南等!↓