想帶母親大人去旅行同時又想儲大假自己去長線旅行,實行近近地去一轉台北,星期五帶埋行李返工,一放工就直奔機場同母親大人會合上機,2 日 2 夜乜都夠玩!
Sunday! 第 1 站
台北人氣早餐店
台北出名嘅早餐店好多,除咗嘢食出名,條人龍一樣咁出名,所以外賣俾娘親最為孝心。以豐盛號為例,排隊排到出 app,都咪話唔犀利。最出名花生吐司,花生醬多士碳烤完,再係面上撒上大量花生粉,入口濃濃花生香,配埋杯牧場紅茶牛奶,襯到絕!加埋都唔使 30 港元,已經可以食到阿媽心花怒放,真心抵。
豐盛號
地址:台北市士林區中正路 223 巷 4 號 1 樓
電話:+886 (0)2 2880 1388
營業時間:7am 至賣完為止(約 11am - 12nn)
Sunday! 第 2 站
搭貓空 賞桐花
一早起身不如先去郊區吸下新鮮空氣。有「5 月雪」之稱嘅桐花,母親節期間,台北木柵嘅桐花正係盛開嘅日子。搭貓空「杏花林」方向,從高空望落去,桐花樹上有為數不少嘅桐花,而樹下又有一大片掉落嘅「雪白桐花」景象,靚到不得了。如果阿媽鍾意嘅話,仲可以落車後往老泉街 45 巷 23 號路口向前行,地上有大片雪白桐花,可以慢步欣賞。
Sunday! 第 3 站
外省家常菜
呢間叫魚玄雞的餐館,連台北本地人都相當推崇,因為菜式精緻好吃得嚟仲要平。有趣嘅係台灣人口中嘅外省菜,香港人食起嚟又有幾分熟悉,好似蝦仁炒豆苗、海鮮豆腐煲、糖醋排骨……相信一定啱阿媽胃口。魚玄雞小館
地址︰116台灣台北市文山區興隆路三段225號
電話:+886-2-8230-1949
Sunday! 第 4 站
小烏來天空步道
食飽飽,跟住嘅行程就遠少少,去桃園嘅小烏來。呢度最出名就係有個玻璃吊橋嘅天空步道,其實另外仲有天空繩橋、水圳古道、龍鳳瀑布同埋兩條吊橋等景色可以觀光。有人會玩足一日,到時可以睇下阿媽反應如何再決定玩幾耐。
小烏來天空步道
地址:336台灣桃園市復興區義盛村42號東眼山森林遊樂區
電話:+886-3-382-1835
Sunday! 第 5 站
大溪花海農場
如果發現阿媽都係比較鍾情花海,行完天空步道可以即刻轉場,嚟呢個大溪花海農場。花海面積約 17 公頃,好震撼!真係扮自己去咗荷蘭都得!
大溪花海農場
地址:335台灣桃園市大溪區復興路一段1093巷27號
電話:+886-3-388-0801
Sunday! 第 6 站
蘆竹大夫第咖啡廳
回程機票唔好訂太夜,阿媽要早少少休息。去完花海嚟埋呢個大夫第咖啡廳,跟住去機場,返到香港食晚餐回家休息,時間啱啱好。叫做「大夫第」係因為呢個建築物以前朝列大夫、有功名之人士嘅府第。原本位於安徽,有心人將原裝嘅古典徽式書香世家宅邸運到桃園,一磚一瓦、一柱一樑都係經典重現。各式木雕、石雕、磚雕全部都極度精緻,歎住咖啡咁欣賞呢座難能可貴嘅建築物,可以話係呢個 trip 嘅完美句號。
蘆竹大夫第咖啡廳
地址:338台灣桃園市蘆竹區龍安街二段1632號
電話:+886-3-313-1095
帶阿媽去旅行 旅途愉快小貼士
1. 必遊最著名名勝
因為阿媽需要喺親朋戚友面前講自己去過台北,萬一人哋問起佢有無去中正紀念堂,如果佢話無,就會變得好尷尬。
2. 三餐最好定時食
若果阿媽已經上咗年紀,去旅行都盡量保持三餐定時,亦最好先預約好餐廳,等老人家可以舒服用餐。除非已經問咗阿媽佢話 OK,否則盡量唔好畀佢食生冷嘢或煎炸油膩嘅食物,如引起任何唔舒服,只會掃慶收場。
3. 行程唔好太密
阿媽始終唔後生,行程可以安排得疏少少,一有時間就搵個地方畀佢坐下休息下。
4. 唔好慳的士錢
如果阿媽表示攰,就唔好為咗慳錢而堅持搭捷運,搭的士啦,無謂要老人家折騰。
5. 封閉式浴廁
台北好多特色酒店,亦都唔少太新派,可能浴室廁所屬開放式,阿媽未必鍾意,訂房時最好問清楚。
6. 袋定錢+酒店卡片
有時阿媽係好任性嘅,你叫佢行東佢偏要行西。所以最好搵個袋仔入定的士錢同酒店地址,就算佢蕩失路都可以返酒店會合。
7. 傾清楚行程
last but not least,plan 行程前畀定個大概行程阿媽,最好畀啲相佢望吓,佢鍾意就落實行程,唔鍾意就改,最緊要阿媽鍾意得嚟,而你又覺得就腳去得到。如無必要唔好隨便改動行程,咁就旅途愉快啦!
繼續睇!母親節快閃台北攻略
星期五:晚上到着 Spa 歎完宵夜
星期六:hea 遊台北美食景點
星期日:回程日輕鬆賞花行步道
↓ 大灣區一小時生活圈!最新打卡熱點/熱門美食等!↓
↓立即睇打卡熱點/地道隱世美食/必買手信等!↓