沖繩大方得體手信 10 選

手信嘅嘢，講心嘅，要買啱嘅手信畀啱嘅人，確係要花唔少腦汁同心思。就快去沖繩嘅朋友就幸福喇，小編幫你出腦汁，諗定 10 大包含當地特產得嚟，又大方得體嘅別緻手信。 

 #01 海葡萄雪糕

簡單直接，就是將沖澠名產海葡萄加入雪糕內，共 6 款味道︰熱情果、鹽味牛奶、菠蘿、沖繩青檸、金楚糕和櫻桃。確實可以就咁帶海葡萄做手信嘅，但係感覺呢個雪糕會得體啲。

海葡萄唔單止好食，仲要係 super food，含鈣量係高鈣奶嘅 5 倍！真係要帶多幾盒返香港送禮自奉。

【延伸閱讀】【#潮日放送】雙層巴士遊沖繩 食盡地道美食！
【延伸閱讀】廣東話教授　沖繩潛水冇難度

#02 金菠蘿

沖繩水土非常適合種植菠蘿，呢罐「金菠蘿」正正係當地本土繁殖超過 20 年嘅菠蘿之王。無錯，都唔少人特登買手撕菠蘿做手信，但係始終食起嚟對手黐立立唔方便。

罐裝就唔同啦，新鮮入罐無添加，平均甜度 16 度以上，酸度只係 0.5%，真正嘅甜到漏。送畀嗜甜嘅朋友最啱。

#03 泡盛咖啡

唔少人話去沖繩一定要買泡盛米酒，米酒又真係唔係人人都鍾意飲。其實泡盛除咗米酒，仲有好多 side product。就好似呢款連全家便利店（Family Mart）都有得賣嘅泡盛咖啡，就連當地人都勁 like。

其實佢係咖啡味嘅蒸餾酒，係比米酒易入口嘅，但係留意返 12% 酒精濃度，當手信送畀朋友就要提下對方喇，日光日白喺街度飲醉就唔係幾好啦。

#04 紅型染雜貨

沖繩有種染布方式叫做「紅型染」，特色係色彩斑斕又細緻，民族風之中又帶點童真，確係幾吸引嘅。紅型染雜貨細至 MT 貼帶、領呔、到遮、和服都有。而比較多人喜歡買袋仔銀包仔，最啱民族風打扮嘅朋友。

#05 の字饅頭

の字是喜慶嘅意思，所以呢款饅頭在當地一般都係節慶喜宴場合先會食，就類似長洲嘅平安包咁。同平安包唔同，呢個の字饅頭係用沖繩紅豆做嘅，購買後店家會先問咗你，再用食用顏料喺饅頭上劃個「の」字。

之後就會用一塊叫月桃葉嘅樹葉包好饅頭，原來月桃葉唔止係用作包裝，佢嘅香氣會令饅頭更好食。與其成日買一式一樣嘅甜點做手信，不如買下呢啲特產仲過癮。

#06 石垣牛牛排仙貝

石垣牛好食，但做唔到手信，就算做到都唔係咁捨得。石垣牛牛排仙貝就唔同嘞，同牛仔片一樣，其實無乜牛味，但係就可以話俾人知，喂，我去完石垣島食完石垣牛喇，請你食塊仙貝啦！（笑）都咪話唔抵死。最啱送俾啲好恨去旅行但又好孤寒嘅朋友仔！

#07 豆腐棒

日本豆腐出名好食就係人都知，沖繩島豆腐一樣咁香滑好味。最近仲有人以豆腐為主要材料，造成捧狀小食。睇個包裝咁女性化就知道係甜嘅，味道方面有黑糖味、紫薯味、鹽味呢幾個特產味道外，仲有紅蘿蔔、朱古力等味道選擇。聽聞最賣得係紫薯味，買呢個味實無錯。

#08 啫喱鹽皂

手信感覺總係「唔等駛」，如果就咁睇呢舊好似紙鎮嘅物體，外表晶瑩，其實佢係一舊番梘。沖繩嘅鹽好出晒名，呢舊梘就係用上島產鹽嚟造，鹽可以殺菌，平衡肌膚的 pH 值，夏天用感覺清爽。就算唔用嚟沖涼，用嚟洗下手都幾實用。

#09 花生豆腐

唔知點解講起沖繩手信，佢總係俾人忽視，可能係私心發作，唔想無付出嘅人都食到好嘢。

講緊嘅係花生豆腐，一種用花生造成豆腐狀態嘅食物，但係食落去又唔似豆腐，話佢係啫喱佢又比啫喱黏同滑，而且係愈攪拌愈黏滑，非常得意，最啱買畀鍾意食滑潺潺質感嘅朋友。

#10 海底酒

好多人話去沖繩一定要買啤酒做手信，感覺好似 hea 咗啲。有時手信睇下買俾邊個，如果講緊係一啲重要嘅人，例如話未來外父呀未來老爺呀之類，點都要得體啲嘅。

咪睇呢枝酒霉霉舊舊咁，其實佢係海底酒，係沖繩特產。釀酒師專登將枝酒放入海裡面一年，聞說喺海中釀出嚟嘅酒，成熟得特別快，所以即使只係釀咗一年，枝酒都已經變得好香醇。識品酒嘅朋友不妨考慮吓。