朋友去旅行，問佢會住邊，通常都聽到呢個答案「Airbnb」。以前外遊都係住酒店、Hostel，到底 Airbnb 係幾時開始興起、點解會成立，仲有仲有點解叫 Airbnb 呢？有請創辦人兼 CEO Brian Chesky 解答！
Airbnb 原名是 Air Bed and Breakfast，喺 2008 年成立，為全球 190 多個國家嘅屋主、旅客配對，將空置嘅物業出租作民宿，旅客可以平住有地道特色嘅民宿，屋主又可用空置物業賺租金，Win Win 兩贏，所以近年先會急速冒起。
Airbnb 由 3 張氣墊床起家，當時 Brian 嘅設計事業停滯不前，決定去三藩市闖一闖，於是帶晒啲家當連同 1,000 美元積蓄，去投靠設計學院同學 Joe Gebbia。
當 Brian 準備搬入嚟同 Joe 住嘅時候，Joe 卻遇上經濟問題唔夠錢交租。咁啱三藩市嗰排會舉行國際設計會議，附近酒店全都客滿，佢哋就諗到出租床位，以 Bed and Breakfast 形式賺錢補貼租金。
由於單位內已經無多餘床舖，Brian 及 Joe 就搵嚟 3 張 camping 用氣墊床出租，Airbedandbreakfast.com 就此成形。依家 Airbnb 已經由出租氣墊床位，發現到提供住宅、城堡、鄉間別墅，甚至樹屋、船屋、冰屋及私人島嶼！
utravel
發表回應