唔講唔知,原來全球超過 800 個大大小小嘅馬拉松比賽,即係平均每日有 2.2 個比賽可以參加。所以話,年年練跑淨係跑渣馬好似太大嘥,不如跑出香港,實行邊跑邊旅遊。如果你勁到可以跑東京、紐約、波士頓、芝加哥、倫敦同柏林嘅馬拉松嘅話,呢啲大型比賽隨便上網都搵到,仲使乜介紹。反而近期睇到香港跑手分享嘅北韓平壤國際馬拉松經驗︰補給站冇水、獲得生锈奬牌等……淨係睇訪問都覺得大開眼界,如果可以親身體驗呢種另類少少又特別少少嘅馬拉松,跑包尾都抵!
#望住靚景跑
黃金海岸馬拉松
比賽日期:7 月 1 - 2 日
官方網站:http://goldcoastmarathon.com.au/
7 月跑馬拉松會唔會中暑?去澳洲跑咪唔會囉!因為南半球正值冬天,天氣清涼加上陽光充沛,絕對係跑馬拉松最理想天氣。再加上平坦賽道、優美景色,難怪好多人跑跑下停低 selfie。而最最最重要係呢個比賽人數不限!報名期亦夠長,6月尾腳痕想跑,自己報又得,報團亦得,得咗!今年仲特別增加咗以團隊報名,快啲 what's app 下有無跑友想一齊去先!
日本富士山馬拉松
比賽日期:11 月底 (2017 比賽日期未公布)
官方網站:http://fujisan-marathon.com/
日本馬拉松達人 Clive Ng 推介富士山馬拉松,全因路綫靚到要用「震撼」嚟形容。比賽時感覺到富士山就在旁邊,沿路大部分時間都是環繞富士山五湖中的西湖和河口湖兩個湖,大多數喺馬路上比賽,路綫兩旁的民宿及餐廳均有開放,歡迎選手人有三急時借用。同日本其他比賽風氣一樣,沿路的店主喜歡預備些自家製食物派給參加者補充體力,最感動的是有餐廳老闆親手搣橙遞給跑者,sweet 到喊。
#特色跑
北韓平壤國際萬景臺馬拉松
比賽日期:4 月 8 日
北韓首都平壤每年 4 月舉行「國際萬景台獎馬拉松賽」,自 2014 年起開放給海外業餘跑手參加,途經金日成體育場、凱旋門、朝中友誼塔、龍南街、清流橋等平壤的標誌性建築及景點,參加比賽之餘,可以親身參觀北韓的歷史名勝和革命遺迹。今年賽事仲特別安排改道,等跑手可以睇到更多市內面貌。眾所周知,到訪北韓必須隨團出發,參加馬拉松亦一樣,網上官方及非官方的旅行社有許多費用不一的馬拉松團供報名,跑手們需要花點時間比較價錢。2018 年賽事可以喺 5 月開始報名,話畀朋友聽你去過北韓跑馬拉松,夠你威足一世!
【延伸閱讀】又跑又食 倫敦運動當找數餐廳
【延伸閱讀】【#機艙道德】最乞人憎乘客龍虎榜 你有冇份?
耶路撒冷馬拉松
比賽日期︰ 3 月 9 日
全球馬拉松多數都係周末舉行,耶路撒冷嘅比賽就比較特別,因為猶太人由星期五日落開始,到星期六日落,都係佢哋嘅安息日,期間係唔可以參加任何活動,所以耶路撒冷馬拉松都係星期五舉行。耶路撒冷馬拉松至今規模約有 3 萬人參加,而大部分都係海外跑手。想像到喺有三千年歷史嘅古城跑步,淨係 selfie 放上 facebook,名次好似都變得唔重要。而事實上賽事過程感覺似嘉年華多過比賽,一路上會見到好多樂隊,主辦單位又會放咗好多卡通人物同跑手加油,而且唔少賽道都係開放嘅,好多當地人特地前來為跑者擊掌助威,呢啲喺香港就應該感受唔到嘞!
#極地跑
肯亞電訊馬拉松
比賽日期︰ 6 月 24 日
你可以想像自己喺東非肯亞野生動物保護區裡面跑步嗎?肯亞由 2000 年開始舉辦這個馬拉松,其實是為了保護野生動物而舉辦的,籌集資金保護肯亞自然社區。沿路有武裝警衛來回巡邏確保安全,但也有不少動物經常陪跑或橫越跑線,都係難得經驗。而最重要係舉辦咗 17 屆都冇跑手畀獵豹咬親,應該幾安全嘅。不過話分兩頭,話唔定喺獵豹追捕下,你可以跑出超水準呢!
意大利 Lavaredo 極限山地馬拉松
比賽日期:2017 年 6 月 23 日(已截止報名)
海外作賽經驗豐富的 Steve Lo ,征服過南北極撒哈拉等極地賽事,並於 2015 年成為首位獲頒發「馬拉松大滿貫殊榮」的香港人。佢推介意大利 Lavaredo 極限山地馬拉松,因為比賽路綫的景色真是靚得交關!Lavaredo 夏天是登山熱點,賽事沿途穿過森林草原湖泊,遠眺雪山的自然風景,加上部分賽道高達海拔 3,000 米以上(即係上落斜多、難度高),比賽期間見到有雲飄過絕對不足為奇。雖然 Lavaredo 從威尼斯租車自駕到比賽場地的小鎮都要成兩個半鐘,但每年都吸引唔少各地跑手朝聖參加。賽事分 119 公里、47 公里及 20 公里,最艱苦的 119 公里比出名辛苦的毅行者賽事還要長 19 公里,只建議高手或經驗跑者參加。
#食住跑
法國波爾多梅鐸紅酒馬拉松 Le Marathon du Médoc
比賽日期:2017 年 9 月 9 日(現正接受報名)
每年必到海外參加馬拉松及三項鐵人的 Cindy Wong,只要當地有美食佢就會參加比賽。盛產紅酒的波爾多自 1984 年起舉辦這呢個「跑到飽」嘅馬拉松。賽事途經約 50 個酒莊,沿路無限量紅酒供參賽者試飲,全部來自當地酒莊。雖然只是淺嘗的分量,但「水站」數目眾多,還是建議比賽初段最好忍口,最少完成了一半才開始慢慢試飲比較穩陣。除咗紅酒,仲有麵包、水果、甜點畀跑手補充體力,戲肉在賽事的最後幾公里。根據往年經驗,全長 42.195 公里的馬拉松,在 37 公里處會派發新鮮生蠔,之後每 1 公里分別有牛扒、風乾火腿、芝士、雪糕,食完剛好衝綫。跑畢全程送你紅酒一大枝,之後仲有大會嘅美食攤位繼續食食食。據說通常有 3 成跑手未能完成比賽,估計是酒池肉林般款待所致,冇心情追時間都好合理。
日本東北風土美食馬拉松
比賽日期:3 月 18 - 20 日(剛圓滿結束,未公布 2018 詳情)
提起日本馬拉松大家一定諗起大型嘅東京馬拉松,呢個以 food marathon 作招徠嘅小型賽事,表面上開開心心又食又跑,背後卻是日本 311 大地震後的延伸產物。賽事創辦人竹川隆司本身為經驗豐富的跑手,災後希望為東北災區做點事,為該區帶來些生氣,於是以美酒佳餚作賣點,再跟政府及贊助籌備一番,終在被譽為漁米之鄉的宮城縣登米市,成功舉辦了第一屆東北風土馬拉松。大會每兩公里設置的補給站,每個均提供一款獨特的地方食品:日本質高蔬果當然少不了,超個 20 款食物包括餃子、魚餅、飯糰、甜品、串燒等,以該區著名土產煮成在沿途提供,加上當地人的溫情款待兼落力打氣,可說是世上正能量最強的馬拉松。賽事所提供的食物,全部經過輻射及衞生檢查,確保跑手食得安全。
海外跑 10 大貼士:
#1 隨身帶備輕便雨衣,可保暖兼擋風雨
#2 選擇就近起點的酒店
#3 選擇起點與終點相同的賽事
#4 不少比賽都是秋冬季節舉行,提早最少 3 日到達適應當地天氣
#5 建議選擇 2、3 月舉行的賽事,與香港賽事同期訓練
#6 可以選擇一些冷門比賽,比較容易成功報名
#7 預訂民宿,可跟當地人了解在地情況備戰
#8 查閱大會的比賽補充食物表,不合適的話可在出發前自行預備
#9 到達後早、午、晚輕鬆在戶外試跑,進入狀態
#10 出發前用圖片搜尋當地山間流行的蛇蟲鼠蟻,並準備對應藥物
買套票確保參賽
坊間有唔少旅行社提供一站式馬拉松比賽團,而賣點當然係保證有得出賽!免卻自己上網登記等派籌仲要最後可能食白果,不過就先到先得,有心水賽事的話就要早點留意報名日期。近畿國際旅行社(香港)是日本最大嘅旅行社之一,日本總公司是 2 月東京馬拉松、8 月大阪馬拉松及 10 月北海道馬拉松的官方代理機構,2015 年度就分別有 20 及 50 位跑手經近畿香港分社報名參加北海道及大阪比賽。鍾意冷門嘅話,旅行社亦代理名氣較低嘅北海道洞爺湖、網走馬拉松及佐賀櫻花馬拉松等賽事。
套票價錢參考:
2017 年北海道馬拉松 4 日 3 夜住宿加參賽名額套票為 $6,100 港元,機票可以自己撲平價飛,唔介意貴少少可以向旅行社一並購買。
網址:knt-hk.com
假少揀就近賽事
另一專營海外馬拉松的旅行社 Flight Centre,2015 年海外馬拉松團錄得 100% 增幅!非常誇張!其中倫敦及紐約兩個大型賽事最受港人歡迎,每年的名額都很快賣清,今年 4 月23 日嘅倫敦馬拉松早已售罄,紐約嘅比賽報名仍然熱賣,一心想跑 NYC 嘅朋友請盡快報名喇!負責人表示,其他大大小小的賽事都開始受到港人留意,好像巴黎、柏林、吳哥窟馬拉松也很熱賣。若果打工仔假少去唔到太遠,負責人亦推介東南亞地區的比賽,包括布吉、越南峴港、緬甸浦甘等等。
Flight Centre Hong Kong
網址:flightcentre.com.hk
文︰TJ
整理︰jillsandy
To enable screen reader support, press shortcut Ctrl+Alt+Z. To learn about keyboard shortcuts, press shortcut Ctrl+slash.