近呢幾個月，全日本都係柯南乜乜乜，在全國開設計 11 間主題 cafe、新電影即將上映，連作者青山剛昌故鄉，鳥取的由良都有新搞作，開咗條「柯南之家 米花商店街」，仲可以親身走訪工藤新一（柯南）屋企，按門鐘，佢會同你 say hi。
青山剛昌ふるさと館
講到鳥取，大家第一時間可能會諗起沙丘或肥美多汁的松葉蟹，但作為日漫迷，仲會諗起《名偵探柯南》，事關東伯郡北榮町的由良是作者青山剛昌的出生地，所以由良亦有另一個暱稱「名偵探柯南之里」（コナンの里），連 JR 由良站都在 4 年前都加多個別名「柯南站」。走在大街小巷，處處都見到柯南嘅嘜頭，好似水渠蓋、燈柱、橋邊，連圖書館都有柯南，確實稱得上是名偵探柯南之里。如果夠 lucky 的話，仲可以坐埋全由良唯一一架柯南的士。
【延伸閱讀】
【#潮日放送】大阪直擊！ 少年Jump梅田期間限定必買items
最近，由良有大事發生，就係「青山剛昌故鄉館」開館 10 周年，除咗有慶祝活動，展出青山剛昌不同時期的作品外，仲在故鄉館不到 10 分鐘路程的地方，開咗條「柯南之家 米花商店街」，門口放了工藤新一及毛利蘭的銅像，仲有 cafe、麵包店、雪糕店及百貨店等等，不能錯過的，就是去工藤新人屋企，自拍打卡兼按門鐘，佢會同你 say 個 hi。
「柯南之家 米花商店街」門口，擺放工藤新一及毛利蘭的銅像。
米花商店街的 Poalo cafe，擺放大大隻柯南公仔，畀你邊自拍邊歎杯「怪盜基德」咖啡。（圖：xia___02i@IG、aura1251@IG）
行到餓餓哋，仲可以去麵包店買個包或者去cafe食柯南最愛的咖喱飯，繼續作戰。（圖：matcha_amr@IG）
仲可以食埋鳥取最出名的梨味雪糕。（圖：orin308@IG）
記得去新一屋企，按個門鐘，會聽到柯南歡迎你。（圖:t_k__h1231@IG）
最後，當然要去百貨店，買買戰利品啦！（圖:orin308@IG）
米花商店街
地址：鳥取県東伯郡北栄町由良宿 1293
電話：+81 (0) 8 5837 4057（北栄町商工會）
順道一去，青山剛昌故鄉館
離「柯南之家 米花商店街」不到 600 米，大概 5 分鐘路程，就會見到青山剛昌故鄉館，剛好今年是開館 10 周年，館內除咗有《名偵探柯南》角色人像畀你影相及柯南的查案道具外，仲展出青山剛昌多年來的畫作手搞及紀念商品。
門口擺放了一架鮮黃色甲蟲車，是阿笠博士與柯南查案的必備戰車。
每張入場券印有不同場景，值得收藏。（圖:orin308@IG）
館內擺放柯南不同姿勢的人像，仲會變化出唔同顏色。
當然唔少得青山剛昌多年來的珍貴手稿。
如果唔熟識柯南的朋友都唔緊要，館內有大大張人物關係圖。
青山剛昌的工作枱。
青山剛昌為由良設計的限定商品及街道水渠蓋。
展館當然唔會齋睇咁 dry 啦！有好多專為小朋友而設的小遊戲，好似模樣柯南玩滑板的電視 game 及小魔術遊戲。
臨走前，記得買 10 周年限定商品呀！
青山剛昌故鄉館
地址：鳥取縣東伯郡北榮町由良宿 1414
電話：+81 (0) 8 5837 5389
門票：成人 700 日圓（約 49 港元），高中及國中生 500 日圓（約 35 港元），小學生 300 日圓（約 21 港元）
開放時間：9am-5:30pm（最後入館時間 5pm）
同場加映：只此一架柯南的士
呢架柯南的士剛推出不久，全由良甚至全日本只此一架，每日會遊走由良不同地方，如果好彩見到的話，必定要影相打卡，順便坐番轉，吹吹風。
utravel
發表回應