日本各地櫻花陸續喺呢兩個星期「滿開」,如此燦爛嘅「櫻」景,最啱就好似卡通片入面啲人物咁,喺櫻花樹下野餐兼玩樂一番!日本 Jalan.net 網站近日公布 10 樣賞櫻必備法寶嘅調查結果!究竟有乜嘢?即睇!
由 Jalan.net 網站喺 2017 年 1 月至 3 月,訪問咗 569 位年齡介乎喺 10 歲至 60 歲嘅人,投選出 10 樣賞櫻時必須帶備嘅物品,咁實用,不妨 share 畀即將去賞櫻嘅朋友們!
【延伸閱讀】【#潮日放送】唔做自私鬼 4 個必知賞櫻禮儀
【延伸閱讀】【#潮日放送】尋找日本 5 棵最靚櫻花樹
第 10 位│保溫杯 4%
櫻花期正值忽冷忽熱嘅 3、4 月,初春天氣依然不穩,最近仲啱啱有落雨㖭!所以好多人都會帶定裝咗熱水嘅保溫杯,飲啖熱水暖一暖身,即刻 warm 番!仲可以順道去埋日本 Starbucks 掃貨!
第 9 位│Boardgames 4.2%
去睇櫻花景,都預咗你哋會喪影櫻花㗎啦!咁之後成班朋友圍埋做乜好?最啱就係搵啲 boardgames 玩啦,而家好多 boardgames 都推出紙牌版或輕便版,攜帶起嚟都幾方便,甚至最簡單帶啤牌都大把嘢玩啦!不過要注意一下遊戲時嘅聲量,唔好騷擾到其他賞櫻嘅途人呀~
第 8 位│啤酒 4.9%
日本人最愛飲啤酒,居酒屋開到成行成市都唔止,連賞櫻都會帶埋啤酒去㖭!如果想融入當地人嘅文化,不妨都帶啲 Asahi、Suntory 等等過去!
第 7 位│紙箱 7.7%
紙箱除咗可以裝到不少物品,仲可以當枱仔用,開餐又得、玩 game 又得,成功避開凹凹凸凸嘅地面㖭!
第 6 位│購物車 11.8%
你以為師奶推車仔買餸?Totally wrong!喺日本有好多架款式好靚嘅購物車㗎,用起嚟唔覺師奶,仲好方便,膊頭負擔亦都無咁重,正!
第 5 位│暖包 14.9%
暖包可算係日本名物,你入任何一間藥房 / 藥粧店甚至便利店都會見到暖包嘅蹤影!即使飲暖水,雙手難免仲係好冰冷,呢個時候揸住個暖包就最爽!
第 4 位│摺凳 37.3%
有時地面過於凹凸不平,真係坐好唔舒服,所以帶備一張野外用嘅摺凳就最啱,拎起嚟唔會好重,坐喺凳仔上面,雙腳都會舒服啲!
第 3 位│野餐墊 41.8%
講得野餐,點少得野餐墊呢?野餐墊並非一般膠餐枱紙,野餐墊一邊可防水,另一邊係絨布質地,坐上去比較舒服,而且清洗起來都幾方便!
第 2 位│毛毯 43.6%
賞櫻天氣咁涼快,即使有暖水、暖包,坐得耐手手腳腳都會幾凍㗎,拎定張毛毯就會穩陣啲,唔使「凍得我騰騰震」!
第 1 位│濕紙巾 53.1%
賞櫻第一必備法寶──濕紙巾!唔係個個賞櫻地點都有洗手間提供,再加上有時地面凹凸不平,好易倒瀉飲品,所以有濕紙巾方便勁多!
圖:jalan.net
↓透過發佈帖文賺取收入!立即參加!↓
↓立即睇打卡熱點/地道美食/住宿指南等!↓