唔好以為同另一半去旅行，就可以放任乜都唔使理，旅程有乜「閃失」，對方會記一世，之後會不斷秋後算帳！點先可以開開心心去旅行？熟讀情侶旅行 7 大守則先啦！
#1 一個＿＿的旅行？
旅行前應先與伴侶溝通一下，究竟想要一個點樣嘅旅行：食買玩？爆買之旅？美食之旅？悠閒之旅？陽光與海灘？
曾經有朋友與另一半去旅行，諗住等另一半可以 shopping，於是編排咗去好多個 shopping mall、Market 之類嘅地方，最後另一半喺去完整個旅程之後先講返，其實佢唔太想花咁多時間去買衫！所以，旅行之前一定要事先溝通好！
#2 行程齊齊 plan 最 sweet
旅行除咗要考慮行程，仲有 book 機票酒店、租 Wi-Fi 蛋或者買 SIM card、預先購買入場門票等等嘅瑣碎事情，另一半絕對可以幫忙，唔好依賴晒另一半 (或者自己做晒)，到時去到又 complain，係人都嬲啦！何況，當你有份參與，你就會清楚行程編排，有咩事都可事先與對方討論，多溝通都係增進感情嘅一小步嚟㗎！
#3 情侶都一樣 數目要分明
請！不！要！老！奉！要！另！一！半！找！數！既然預咗開心去旅行，請自備足夠旅費！即使對方話請你，你都唔係一蚊都唔帶，所有使費都要對方出晒呱！而且，對方唔係事必送錢畀你使，態度好返少少啦！
#4 注意！注意！注意時間
我明，我明，女生出門前比較麻煩，又要洗頭、沖涼、吹頭、護膚、化粧有排搞，所以請自己預早少少時間，有時就算對方肯等你，但可能趕車趕巴士，如果遲一班就浪費時間，到頭來你玩得唔會盡興。另外，每到一個景點，就盡量跟返原本預計嘅時間離開，唔好掛住玩過龍，到時只會又浪費咗時間！當然都有例外，如果係悠閒之旅唔需要趕急，又或者預先與對方溝通好，咁當然 no problem 啦！
//延伸閱讀//
#5 享受即興！行程不宜太滿
雖然 plan 咗行程，但大家都明白行程未必一定會跟足，所以行程編排得彈性少少，方便調動行程，隨機應變。盡量避免因小事而爭吵，去旅行而嘈交，真的很無癮 (我試過，我真係試過！)(圖：july82 @IG)
#6 杜絕 Mean 精上身
學 DO 姐話齋，意外即係「意料之外」，所以行程上有變化係理所當然嘅事，遇上交通阻塞、航班取消、博物館無開門嘅時候，第一時間控制好自己脾氣，要知道對方都唔想嘅，唔好畀 mean 精上身，令大家都難受，咁嘅話只會令整趟旅行都唔愉快。
#7 影相不濟點算好？帶定道具！
如果對自己或對方嘅拍攝技術無乜信心，就早早預備道具，唔好喺影完相之後先嫌棄，咁樣令人感覺好麻煩！最簡單方便就係準備一個自拍神器（即相機啦！），大 brand 嘅電器店二千零三千蚊都有一部；如果 budget 有限，亦可預先帶定輔助道具 (如魚眼鏡頭)、自拍神棍，肯定幫到手！
另外，你亦可以出發前喺電話 download 定影相 Apps，有啲調光度，有啲加入得意 stickers，有啲仲同你哋嚟個換臉大法㖭，令相片更加有趣！(圖：__ptthao2612__ @IG、tainadietrich @IG)
做齊呢 7 樣，就唔使驚同另一半去旅行啦，一定會「開心出發，開心返嚟！」
圖：abconlines.ny、google、rd.com
↓ 純黑咖啡、冷萃黑咖啡！讓您感受馥郁濃香！↓
↓ 大辣蝦米辣椒油 / 麻辣紅油辣醬！↓
utravel
發表回應