每個like 搣開都有血有淚

 網上不時見到勁多呃 like 靚相，睇落好靚有型，超羨慕。但當睇完呢段片之後就……

唔好以為一張可以呃到勁多 like 嘅靚相好易影，好似之前好 hit，拖住女朋友對手自轉影佢嘅甜蜜樣，但原來要搵人幫拖，孭住個兄弟氹氹轉，慘過擔泥。影張窗邊 chok 樣，以為好 easy，但原來要好似少林和尚一樣，坐無影櫈。男人當入樽，好有型，原來要靠兄弟，幫自己做托塔天王。

不過，有啲靚相，就可以呃人兼呃埋自己；想話畀人聽，享受緊陽光與海灘，唔一定長途跋涉，樓下地盤沙堆都做到。又好似要學鄭四萬每日八公里，唔駛 join會又唔使流汗，只要去百貨公司運動用品部，搞掂。或者想親親大自然，又怕蛇蟲鼠蟻，只要去附近公園的草欄，就就角度，又得。騙途方法的確層出不窮，睇清楚先好畀 like。

難為自己

為幫女朋友影張自轉甜蜜靚相，出賣兄弟都冇所謂。不過見佢孭住個兄弟，又要拖住女朋友對手，不停自轉，真係難為了家嫂。

少林和尚chok功

練得一身好無影櫈，未必需要去少林寺拜師學藝，好似呢位靚仔，紮行馬再加chok 樣，在銀行提款機窗前影影影，一樣掂！

//延伸閱讀//

另類行山 buddy 帶兔仔行山郊遊

又跑又食　倫敦運動當找數餐廳

地盤變沙灘

唔想搭車又搭船，但可以影到沙灘相？當然無問題，只要你屋企附近有個地盤就搞掂。

零流汗八公里

不時都見到人好鍾意將自己做運動嘅相放上網，以為好辛苦好健康。No，只要在百貨公司體育用品部，企一企，影一影。呃 like so easy。

男兒當入樽

以為入樽好難，只係睇 NBA 先睇到？又錯喇，只要你有兩個好兄弟願意托你一把，想點入樽都冇問題。

親親大自然？

又不時見到好多少女，扮親親大自然，側面影草叢相，好 enjoy。又只要你屋企附近有個草欄，又係好 easy。