capsule hotel,香港人通常都稱呼為「棺材酒店」,以前講起棺材酒店,總係覺得污糟、「屈質」、寒酸、住客品流複雜、唔安全……總之,叫女仔住,嘩,咪玩啦!
其實日本嘅棺材酒店質素近年不斷升呢,甚至出現有專為女性而設的 capsule hotel,日本著名旅遊預訂網站「樂天 travel」就統計咗 2016 年 capsule hotel 的預訂數目,結果發現同 2013 年相比,入住晚數為後者的 2.5 倍,而單身女仔入住嘅晚數,16 年更加係 13 年嘅 4.4 倍!究竟東京地區最受女性歡迎嘅 capsule hotel ,又係邊幾間呢?
NO.1
新宿区役所前カプセルホテル
地區好交通方便唔在講,最正係 2013 年 7 月起開設咗女性專用樓層,住客大讚沖涼房加化粧室入面,有齊晒沖涼液、洗頭水、護髪素、落粧用品、洗面乳、化粧水、乳液等,姊妹們臨急臨忙唔記得帶、或索性唔想攞咁多嘢去宿一宵,都無有怕。
▲專為女士而設的樓層,感覺更放心。
▲Capsule Hotel 的上下層格局,乾淨整齊。
▲鬧鐘、插蘇位、緊急安全制等,一塊面板搞掂晒。
▲仲體貼地設有桑拿房。
▲化粧室有齊護理日用品,真係可以乜都唔使帶,非常方便。
地址:東京都新宿區歌舞伎町 1-2-5 東陽ビル 3F
電話:+81(0)3 3232 1110
交通:JR 新宿駅東口徒步 4 分鐘、或西武新宿站徒步 3 分鐘
capsule 大小:闊 1 米、深 2 米、高 1 米
capsule 內設備:燈、電視、收音機、鬧鐘
其他設施:大浴場、Sauna、Locker、Wi-Fii、收費洗衣機及乾衣機、大件行李放置處
每晚收費(女性專用capsule):2,000 日圓起
//延伸閱讀//
NO.2
カプセル&サウナ 池袋 プラザ
有池袋區首間女性專用 capsule 樓層,有該層住客專用的 locker、行李放置處等,而化粧室內都有如化粧水及乳液等姊妹恩物,連床褥都唔馬虎,用上寢具老舗日本橋西川的出品,話零舍好瞓仲有脊骨健康添;而大浴場唔係普通水喉水,而係北海道秘湯嘅二股ラジウム温泉泉水,仲有高溫 Sauna 房、遠紅外線 Sauna 房同岩盤浴,真係點只瞓一覺咁簡單。
▲有女性專用的 Capsule 樓層,仲有入口專用鎖匙,安全感大大提昇。
▲用上著名日本橋西川出品的寢具,一覺好眠話咁易。
▲化粧室設備齊全,體貼女生需要。
二樓有食事処「竹亭」,營業至深夜,一日三餐都可以喺度解決埋。住客評語包括「女性專用樓層入口有專用鎖匙,故安全感好高」、「locker 夠大可以放好多嘢」、「沖涼房有毛巾任用放題,非常體貼」。
地址:東京都豊島區池袋 2-12-3
電話:: +81(0)3 3590 7770
交通:池袋駅西口徒歩 5 分鐘
capsule 內設備:電腦及手機叉電插頭、燈、電視、收音機、鬧鐘
其他設施:免費高速 Wi-Fi、大浴場、岩盤浴、Sauna、淋浴間、化粧室、大件行李放置處、雪櫃、大型 LOCKER 區、吸煙室
每晚收費(女性專用capsule):2,880 日圓起
網址:www.asia-hd.co.jp/或 http://travel.rakuten.co.jp/HOTEL/32096/32096.html
NO.3
ファーストキャビン赤坂
去年 3 月 30 日先開幕,雖然地區同交通比起前兩間無咁方便,但講到設計感同型格,就真係贏晒!而女性專用樓層,仲有面積 4.4 平方米的 「first class」 同面積 2.5 平方米的「business class」兩款「房」選擇,絕對唔「屈質」,樓下仲有 KEY's CAFE,住客更會有優惠。住客評語都係大讚有齊拖鞋、洗面巾、牙刷、落粧用品及化粧水等,乜嘢都無帶都OK,而且男女樓層分隔開,出入要用 CARD KEY,夠晒安全感,一個女仔入住都無問題。
▲「business class」細啲,都放得落張 100 厘米床。
▲床側巧妙地設有隱藏收納空間。
▲樓下的 KEY’s Cafe,住客仲有優惠添。
地址:東京都港區赤坂 3 - 13 - 7
電話:+81(0)3 3583 1143
交通:東京 METRO 千代田線赤坂駅 2 號出口徒步 1 分鐘、或丸の内線・銀座線赤坂見附駅徒步 6 分鐘、溜池山王駅徒步 5 分鐘
capsule 大小:first class:闊 2.1 米、深 2.1 米、高 2.1 米;business class:闊 1.2 米、深 2.1 米、高 2.1 米
capsule 內設備:電腦及手機叉電插頭、Wifi、付鎖匙保險箱、first class: 32 吋電視機、120 CM 闊睡床;business class:26 吋電視機、 100 CM 闊睡床
其他設施:lounge、大浴場、化粧室、淋浴間、收費洗衣及乾衣機、衣帽寄存室、吸煙室、大件行李放置處
每晚收費(女性專用capsule):first class 由 6,000 - 7,800 日圓起,business class 由 4,000 - 6,300 日圓起
文:再思、圖:網上圖片
↓ 領取資助金,用$0去玩不是夢~↓
↓立即睇打卡熱點/地道隱世美食/必買手信等!↓