出門買旅遊保險,是常識吧?但到遇上意外先發現「份旅遊保原來唔包__」嘅個案實在聽得太多,出發前本想買個安心,到出事先驚覺:原來自己好被動!好似尋日劉德華於泰國拍廣告時意外墮馬,獲安排即晚乘坐醫療專機回港就醫,令我忽然驚醒:到底我哋平時出門買嗰份幾舊水旅遊保險,包唔包括呢項咁重要嘅醫療服務?
記者正常求證過程,當然係搵有關機構 PR 啦,但實在唔需要啲模稜兩可嘅官方廢話,所以我決定打電話問業界好友,講真話唔該!
出動醫療專機,每次費用最少十數萬港元,而設於香港的醫療專機團隊只有兩、三架飛機,其實有錢都未必有得飛。
【受訪者】香港某大保險公司分行經理 CM(化名),從業 10 年來處理過唔少個案,大至外遊傷亡,小至本人旅行唔見銀包整壞電腦,亦都係靠佢成功索償。
Q:如果我在外地瀨嘢,騎馬斷手斷腳啦你當,保險包唔包?
A:包。意外醫療賠償,好多旅遊保都包 50 萬,包括手術、住院、其他開支、保送一個屋企人嚟探你等等。總之有乜事,就即刻打保險嘅緊急支援電話,想轉醫院、畀唔到錢之類,佢都會教你,或者打畀個 agent,即係我,我所有客都係咁。保險公司做法通常都會「先賠後查」,賠咗先,之後先 check 番你是咪蓄意,即係所謂「呃保險」。
最終決定權在保險公司
Q:咁會唔會有醫療專機飛我返香港,好似劉華?
A:真係睇 case。視乎因素,最少有二,1. 當時你適唔適合上飛機,2. 當地嘅醫療水平係咪不足以醫到你--如果你係美國受傷,都冇理由即刻飛你返香港啦係咪?--上述兩點,都係由當地醫生 access 你個狀況,加埋當地保險人員嘅決定,所以最終決定權,係喺保險公司度。
Q:有冇成功爭取嘅個案?
A:唔……你睇塵爆事件(2015 年八仙樂園派對粉塵爆炸事件當中一名香港女生受傷),據稱當地醫療機構出嘅 report 係講明傷者不適宜上機。但記唔記得件事有好多好多輿論?結果嗰間公司係以 exceptional case 來將傷者送返香港治療。
其實呢啲所謂 general insurance(一般保險,如旅行、勞工、汽車保險等),變數實在太多,條文上係需要彈性,每個決定都視乎唔同機構嘅專業評估,當然保險公司 black and white 亦要保障番自己。
塵爆事件提起都心傷。我問 CM,知唔知點解該位女生最終都成功上機返到香港,佢反問我:「其實你做邊行?你覺得呢?」傳媒囉?……哦。
真實個案1:滑雪斷腳 經濟客位返香港醫
Q:咁你有冇處理過係成功運送傷者回港嘅個案?
A:有個客,去日本滑雪遇意外,一隻腳掌斷咗,已經即時入醫院,但佢要求即刻返香港,保險公司當地派員一直跟進,因為醫生判斷佢可以自行上機,所以保險公司安排咗經濟客位畀佢,最終佢受傷後第 5 日返到香港。不過佢個 case 未差到要做手術,只係釘鏍絲啫。
真實個案2:遊美國感染食肉菌 留當地治療
Q:唔成功嘅呢?
A:其實唔算,但都可以講吓:另一個客去美國,喺泳池遊水,唔小心擦損,點知食肉菌感染,留當地求醫。佢個 case 就係完全唔適宜飛返香港啦,而佢家人亦冇咁嘅要求,最終佢係 claim 足 50 萬醫療上限嘅。
Q:有冇聽過業界出動到醫療專機?
A:劉華呢單,同之前 Selina 嗰單(大陸拍劇遇爆破意外),可能係。平民,冇聽過。
旅遊保險,買來係求意外保障,但到底包乜、唔包乜,好多人買咗都未必知。
起飛前遇意外 旅遊保都包
Q:咁即係除非我係明星、或者我好有錢,否則我都未必可以即刻返到香港?
A:其實你呢個問題,再問多我十次,我都係話睇情況架喇。
不過劉華呢個 case,係快嘅,即日喎,好似我之前講個日本客都要 5 日啦。
好客觀咁講:有買,一定好過冇買,仲要愈早買愈好。好似你買緊嗰隻,至少有兩個好處,1. 出發前 30 日內你遇到意外而要 cancel trip,買咗嘅機票、酒店都有得賠(上限 HK$20,000);2. 到你出發當日,由踏出屋企門口到上飛機前一刻,如果在香港遇到意外,醫療同財物損失(包括手機,上限 HK$2,000)都有得賠。
↓透過發佈帖文賺取收入!立即參加!↓
↓立即睇打卡熱點/地道美食/住宿指南等!↓